Kêng măng măng n’har bri Ia Nan, nkuăl Đức Cơ n’gor Gia Lai duh 38 độc C, bri duh nar ngăn. Ndeh rdeng dak bah Công ty TNHH du ntŭk kan 72, Binh đoàn 15 tât thôn Đức Hưng gay ma pă dak ân ƀon lan. Yuh Siu H’Úc mbơh, ăp ntu dak tâm thôn kro suăt lĕ, nŭih ƀon lan mô geh dak gay ma gâm sa:

 ‘Mô tŏng dak ri jêr ngăn, geh rnôk geh prăk kŏ mô geh ma rvăt dak. Lap lah tahen Công ty 72, Binh đoàn 15 ân dak ân kônh wa. Kônh wa rhơn ngăn”.

Ăp dŏng lĕ têk dĭng dak tă bah ndeh lăp tâm n’gâr dak ngih nơm, yuh Lê Thị Thu Hà, nkoch, kônh wa tâm ƀon tâm mbơh jă têm dak dŏng, ndrel tâm kơl dak geh pă:

‘Phung hên têm dak tŏng ngêt sa âk nar. Dak aơ hên knŭng gâm sa dơm. Dak rao byăp ri hên tŏng tơm sa play, ân djăr, ân sur. Têm nkrem tĭng ntruh ngăn”.

 Trung tá Nguyễn Phi Vân, Kruanh Chính trị Công ty TNHH du ntŭk kan 72, Binh đoàn 15 mbơh: Lah rmôt kan văng sa neh dak dâk kan tâm nkual, công ty geh ma rbăn nŭih công nhân lah ƀon lan xã Ia Nan, nkuăl Đức Cơ. Bah năp nau duh phang hô, rnâng kan rđau kan Công ty hŏ rgum cán bộ, tahen ăp nar pom ndrel rdeng 3 n’gar dak đah nau âk 24m3 gay ma kơl an ƀon lan rlet nau jêr aơ:

 ‘Bri duh nar khuch ngăn tât ăp ntil, n’ăp ma rmôt tahen hên. Rmôt tahen hên kŏ geh rnôk mô tŏng dak dŏng. Yơn cán bộ, tahen, nŭih pah kan bah Công ty mra pă dka dŏng bah nơm đah kônh wa tâm nkuăl đŏng”.

 Wa Trần Xuân Nghiên-Kruanh UBND xã Ia Nan, nkuăl Đức Cơ, n’gor Gia Lai mbơh: Thôn Đức Hưng tâm ntŭk prêh ngăn bah xã, di ma ăp năm kŏ mô tŏng dak tâm yan vai. Âk năm ma aơ, Công ty TNHH du ntŭk kan 72, Binh đoàn 15 kŏ kơl an dak ân ƀon lan tâm lôch du khay. Nau aơ lơn ma ƀư rjăp tay nau tâm boh tahen, ƀon lan, rgop nau mât đăp mpăn tâm nkuăl n’har bri Đức Cơ:

‘N’gâng kan bah nkuăl rnê prêh ngăn nau kan Công ty 72 pă dak dŏng ân ƀon lan. Tâm 15 nar ma aơ, nau kan dak dŏng ân bon lan thôn Đức Hưng hŏ geh mât đăp mpăn, ƀon lan rnơm. Geh công ty kơl an ân kônh wa ri rhơn ngăn, kơp dơn nau rgop bah Công ty 72 yor đăp mpăn ueh ăp ntil nau rêh bah ƀon lan”.

 Rnơm lah, tâm nkuăl n’har bri Ea Súp, n’gor Dak Lak, bri duh nar jŏ jong rơh rlau aơ hŏ ƀư ƀon lan mô tŏng dak dŏng. Rmôt tahen, công an bah nkuăl dôl rdeng âk bôk ndeh rdeng dak kơl an ƀon lan đăp mpăn nau rêh. Tam nklang bri duh nar rlau 40 độ C, wa Vy Thị Mun, tâm thôn 12, xã Ea Rvê, nkuăl Ea Sup rhơn ngăn yor n’gâr dak 500 lít ndrel 1000 lít bah rnăk nơm geh ăp công an pă ân bêng bir:

 “Ăp năm lah hôm găp ma tŏng ngêt ndrel tŏ tơm tăm, yơn năm aơ kroh suăt tâm bah rnôk năm e ơm. Lah ueh bah oh nô âk ngăn, pă dak ân ƀon lan ngêt sa kơt aơ lah rhơn ngăn”.

Kŏ geh ăp tahen công an pă dak năn, wa Lò Văn Kiều, tâm thôn 12, xã Ea Rvê, nkuăl Ea Súp, n’gor Dak Lak rhơn ngăn:

 ‘Bar khay bah năp ri hên dŏng dak ngih bu êp nê, yơn rnôk aơ ngih bu kŏ suăt hôm. Pă du tŏ kơt aơ ri dŏng geh 4-5 nar dŏng têm nkrem. N’gâng kan ƀon lan ndrel tahen, công an pă dak ân nơm dŏng mô hôm geh nau mô tŏng ôh”.

 Thiếu tá Đoàn Huy Tưởng, Kruanh Công an xã Ea Rvê, nkuăl Ea Súp mbơh, ăp nar ăp thôn, ƀon mra mbơh rnoh moh săk mô tŏng dak. Jêh nê, công an xã n’hao nau nchrăp tâm rgop ma rmôt kan neh dak 737 (Quân khu 5) tâm pleh pă dak ân kônh wa. Tâm nê, công an xã Ea Rvê geh Công an nkuăl Ea Súp pă ân 2 ndeh, hôm rmôt kan văng sa neh dak 737 geh 3 ndeh rdeng dak pă ân ƀon lan:

 ‘Du tŏ pă dak du rnăk ri geh ntơm 1-3m3. Nar lơn ma mô tŏng dak dŏng đŏng. Nau kan pă dak aơ hŏ geh tâm bôk nau kan, nau nchrăp kơl an bah bah Công an nkuăl tâm nê geh nkô̆ nau pă dak dŏng ân ƀon lan mô tŏng dak’./.