Đah aƀaơ 49 năm bah năp nơh, khay 3/1975, Tây Nguyên dơi rklaih luh, njêng đăt ndal jŏ jong, mpôl ngụy quyền tŭp chrai lam hvi, njêng jâng nsan an trong hăn lơh Hồ Chí Minh geh nău dơi lam lĕ rngôch 30/4/1975. Tahen n’hanh ƀon lan Tây Nguyên dŭt n’hao êng săk hŏ rgop tâm nău dơi lơh jêng nău nkoch dja. Xã Đắk Nia, nkual ƀon têh Gia Nghĩa, n’gor Dak Nông lah ntŭk gŭ  ơm  yău bah kônh wa nuĭh Bu Nong. Tâm ăp rơh tâm lơh, kônh wa way krêp dêh đah cách mạng, nsing nơm n’hanh tĭng Đảng. Xã Đắk Nia lah ntŭk nchih nkah rơh mbluh soih trong Hồ Chí Minh jêng nău nkoch. Tâm 4h kêng măng nar 30/10/1960, ta xã Đắk Nia, Đoàn B90 ta mpeh Bắc n’hanh Đoàn C200 ta mpeh Nam hŏ dơi tâm chruh mâp, nthoi bar gâl trong jong khlay Tây Nguyên n’hanh Đông Nam Bộ, mbluh soih trong Hồ Chí Minh, đăp mpăn geh trong hăn kơl bah miền Bắc an ntŭk tâm lơh miền Nam tâm rơh rlăch ndăng rklaih luh lĕ rngôch miền Nam, dơn ngoăy neh dak. Ntŭk ma bar Đoàn B90 n’hanh C200 tâm mâp aƀaơ hŏ dơi Chính phủ dăp ntŭk têl ơm yău gưl neh dak mha êng. Wa Ksrai, Kruanh Mặt trận Tổ quốc xã Đắk Nia, nkual ƀon têh Gia Nghĩa, n’gor Dak Nông lah:

“Tâm ăp rơh tâm lơh tâm su, đah ƀon  lan rnoi  mpôl đê̆ ƀon tơm ta aơ way nsing nơm  tâm Đảng. An tât nar aơ, kônh wa nha hôm way nsing nơm tâm gung trong bah Đảng, pháp luật bah Ngih dak đŏng, way tâm rnglăp gay mât đăp mpăn aƀaơ n’hanh way tâm rnglăp mbro gay rdâk njêng wăng sa nar lơn ma hun hao, nău rêh nar lơn ma n’hao geh, hun hao gay ƀon lan geh ndrŏng, neh dak têh dăng. Ăp rơh kơn hăn lor bôk năp way ntĭm nti an rơh kơn druh ndăm mpeh nău way ơm cách mạng n’gloh ang đŏng.”

Tâm nau khuch n’gôr bah lam dak, nkah 49 rklaih đăp mpăn miền Nam đăp mpăn neh dak, tahen ơm Y’Joan Niê, rnoi Rđe, tâm ƀon Alê A, Phường Ea Tam, nkual ƀon têh Buôn Ma Thuột, n’gor Dak Lak nkah tât nau janh dăng bah rnoi nơm. Wa nkoch, rnôk nê păng mhe lah kon se jê̆ dơm, geh me mbŏ đă hăn anh ndơ sa, dak si...kơl an ân tahen. Wa nkoch mpeh rnôk mâp tahen kơl an nau đăp mpăn ndrel geh nau rhơn tâm nau đăp mpăn neh dak:

“Rnôk rlaih đăp mpăn Buôn Ma Thuột geh nau dơi tâm lơh nau kan Tây Nguyên lah rnôk bôk khay 3/1975, gâp rnôk nê mhe 14-15 năm dơm. Bŏ gâp vay ân gâp hăn anh dak si, phe, mbo, bum, puăch kro, byăp bri...tât ăp nkuăl tahen rklaih bu gŭ kan tâm nkuăl têh Buôn Ma Thuột kŏ pă ân tahen. Tahen nơm rnôk nê jêr ngăn yor mô geh ndơ sa, dak si, âk nŭih ji kop sâr, rnôk geh ma kônh wa geh nau kơl an ri khân păng ndơn ri khân păng rhơn ngăn. Khân păng nkoch ma kônh wa, geh nsĭt Tây Nguyên lah mra rklaih miền Nam. Jêh ri 2 pơh ba kơi, lah lơ 30/4, ăp nŭih tâm ƀon Alê A ndơn geh nau mbơh kơl an rklaih hŏ geh nsĭt Dinh độc lập tâm rnôk 10h45 rklaih đăp mpăn Sài Gòn”./.