-Tiô tiên sih Fahad Razak, môi ngế rơkê Canada ‘na pơreăng COVID-19 tối ăm ‘nâi, mâu pơreăng ki nếo dêi virus corona hmâ xông tâ tú tung plâ rơnó khía rơxăm ƀă rơnó hngíu, chiâng ai tơdroăng ki tâk kơxô̆ ngế tro tâ ƀă hlâ. Ƀă tơdroăng tiah kố cho chiâng ai môi xôh nếo tung hơnăm kố. Tiên sih Fahad Razak tối rơdêi, tâng pin ôh tá hlo môi tơdroăng tâ tú nếo tung rơnó COVID-19 xông tâ tú ó, mê mâu ngế rơkê kô tơbleăng mơgêi pơreăng a rơnó hơngui.

-Vâ pơtối mâu tơdroăng mơ-eăm vâ tơtêk roh tơplâ mơdât COVID-19 dế a hneăng ‘’thâ’’, WHO pơchân tối 6 troăng hơlâ mâu kong têa ối tung khu tơrŭm. Ahdrối cho mơ’no liăn pâk tŭm ăm 100% khu ngế ki tơ’lêi tâ tú má môi. Má péa, cho pơtối khăm ngăn ƀă tiâ tối gen virus vâ séa ngăn mâu pơreăng ki pro chiâng tơ-ê, tơdjêp mâu tơdroăng séa ngăn ƀă khăm ngăn SARS-CoV-2 ƀă mâu pơreăng troăng hiâm ki ê, tá pơreăng kơ-ôk. Má pái, cho tơniăn ai hngêi pơkeăng rak ngăn hbrâ tơdah pơlât mâu ngế tro tâ COVID-19, tơdjêp tung mâu tơdroăng rak ngăn ivá apoăng; pro pơkâ pêi ăm mâu roh xông tâ tú ƀă tơdroăng hbrâ ‘na tơmeăm khoăng, kơmăi kơmok ƀă mơngế pêi cheăng. Má pŭn, cho rak mâu troăng hbrâ ƀă mơdât pơreăng tâ tú a hngêi pơkeăng. Pơtối mê, mâu Chin phuh kal tơpui tơno nhên ƀă mâu kong têa lâp plâi tơnêi ‘na mâu tơdroăng pơ’lêh ki lâi tung troăng hơlâ hbrâ mơdât pơreăng kân COVID-19.

Ngế tro tâ COVID-19 pơlât a hngêi pơkeăng kân kơpong Tây Nguyên

-A Việt Nam, riân dêi Khu xiâm pơkuâ ngăn pơkeăng ƀă khăm pơlât, sap apoăng khế 10 troh hâi lơ 24/10, Việt Nam châ hlo vâ chê 22 rơpâu ngế tro tâ COVID-19 nếo, tơdâng tá hâi troh 1 rơpâu ngế/hâi, kơdroh lối tơdế tâng pơchông ƀă khế 9. Riân troh hâi lơ 23/10 lâp tơnêi têa hiăng pâk châ vâ chê 262 rơtuh kong kếo pơkeăng vaccine hbrâ mơdât COVID-19.

-Xông tơpui hnê mơhno a Hneăng hôp thăm hbrâ mơdât pơreăng ƀă tơdroăng pâk vaccine COVID-19 tơkŭm po sap hâi lơ 20/10 pơla kố nah, jâ Nguyễn Thị Liên Hương, Ngế xiâm phŏ pơkuâ ngăn pơkeăng ƀă khăm pơlât pơkâ thế mâu kong pơlê pơtối tơmâng po rơdâ pêi pro mâu troăng hbrâ mơdât pơreăng tiô hnê mơhno dêi Chin phuh, Ngế pro xiâm hnê ngăn Chin phuh ƀă tiô hnê mơhno dêi Khu xiâm pơkuâ ngăn pơkeăng ƀă khăm pơlât, mâu khu xiâm ki tơdjâk. Pêi pro kơtăng, rơdêi, tơdâng tơ’mô mâu troăng hbrâ, mơdât pơreăng; ki rơhêng vâ tối pơtối thăm pâk vaccine hbrâ mơdât pơreăng COVID-19, chêh rak tŭm tơdroăng pâk a kơmăi tĭnh chêh tơdroăng pâk ƀă pơtâng tối vâ mơdêk pôu râng hnoăng cheăng, hlê plĕng kuăn pơlê, pơlê pơla… ki má lối cho rơnó xeăng tô hiăng vâ chê troh tơ’lêi tâk kơxô̆ mơngế tro tâ ƀă mot pơlât a hngêi pơkeăng.

Pơtâng hnê tối 2K hbrâ mơdât pơreăng COVID-19 tung rơxông nếo

-A Dak Lak, tơdroăng COVID-19 tung khế 10 cho kơdroh ‘na kơxô̆ mơngế tro tâ. Riân troh hâi lơ 24/10 kong pơlê châ hlo vâ chê 200 kơxô̆ mơngế tro tâ, kơdroh tơdế tâng pơchông khế 9. Ki tơtrŏng má môi. Riân troh hâi lơ 24/10, kong pơlê châ hlo vâ chê 200 ngế tro tâ, kơdroh tơdế tâng pơchông ƀă khế 9. Tơtrŏng, ai mâu hâi tung khế 10, Dak Lak ôh tá ai ngế tro tâ pơreăng COVID-19 ki nếo. Laga, khế 10 kong pơlê xuân ai 2 mơhế hlâ xua tro tâ COVID-19, tŭm 2 ngế kố pơrá cho mơngế ki hiăng krâ, ai hên pơreăng tung châ ƀă tá hâi pâk vaccine hbrâ mơdât COVID-19.

-Tơdroăng pâk vaccine hbrâ mơdât COVID-19 xuân châ kơvâ ngăn pơkeăng ƀă khăm pơlât kong pơlê Dak Lak khŏm pêi pro tung khế 10. Riân troh hâi lơ 20/10, Dak Lak hiăng tơniăn pâk trum 1,2 ăm khu ngế sap ing 12 hơnăm tơngi klêng. Trum má 3 ăm khu mơngế 18 hơnăm tơngi klêng châ 87,2% ƀă trum má 4 châ lối 70%. Trum má 3 ăm khu ngế sap ing 12 hơnăm tơngi klêng châ vâ chê 75%. Dak Lak xuân hiăng pâk trum má 1 ăm vâi hdrêng sap ing 5 troh 11 hơnăm ƀă trum má 2 ăm khu ngế kố xuân châ vâ chê 56%. Kong pơlê pơtối rak mâu troăng hbrâ, mơdât pơreăng COVID-19 ƀă 03 troăng pêi xiâm, mê cho: khăm ngăn, klâ ối kơtăn, pơlât. Tơdrêng amê pơkâ mâu khu cheăng, đoân theh, mâu kơ koan tíu cheăng, khu pú hên ƀă kuăn pơlê rơtế dêi pó pêi pro, pơtối pêi pro kơtăng tơdroăng pơtâng hnê tối 2K ƀă pêi pro kơtăng mâu tơdroăng kheăn hnê ‘na hbrâ, mơdât pơreăng COVID-19 tung rơxông nếo dêi kơ koan ngăn pơkeăng ƀă khăm pơlât mâu râ.