Rak git rêm kơtâ um châ xup tơdjuôm ƀă pôa Nguyễn Phú Trọng - Kăn xiâm pơkuâ hnê ngăn Đảng, jâ H Yam Ƀuôn Krông, ối a ƀuôn Tơng Jŭ, cheăm Ea Kao, pơlê kong kơdrâm Ƀuôn Ma Thuột, kong pơlê Dak Lak khéa mơjo hơ’muăn, jâ hiăng veăng 2 roh châ trâm Kăn xiâm pơkuâ hnê ngăn Đảng. Ki rơhêng vâ tối, hơnăm 2011, jâ ƀă mâu nâ o ối teăn ếo xâp Rơđế lĕm mơnâ mâ ngăn diâp ăm Kăn xiâm pơkuâ hnê ngăn Đảng drêng pôa vêh lăm pôu pơlê:

“Drêng tâng tối mê pơxiâm hdrâ kơxái prế vê prế teăn ếo vâ châ diâp ăm Pôa, pơtroh tơdroăng tuăn pâ, tơdroăng ki nhuô̆m dêi tơná ƀă Pôa. Roh má péa trâm Pôa cho drêng á veăng Hneăng hôp kheăn kơdeăn mâu ngế tuăn ngôa rơkê, khu tê mơdró ki rơkê ƀă mâu ngế ki kuăn pơlê loi tơngah mơngế hdroâng kuăn ngo a Hà Nội. Á tâ hlo kơnía khât rơkong Pôa pơchân ƀă kuăn pơlê hdroâng kuăn ngo tối krê ƀă lâp tơnêi têa tối tơdjuôm, thế mơjiâng khu rŭm môi tuăn, ai tơrŭm môi tuăn mê nếo châ tơƀrê’’.

Pâ vế tung hiâm mơno rơkong pôa Nguyễn Phú Trọng - Kăn xiâm pơkuâ hnê ngăn Đảng, hơnăm hơnăm hiăng hluâ, jâ H Yam rơtế ƀă 45 ngế tơrŭm cheăng teăn ếo pơtâk hdroâng kuăn ngo Tơng Bông (pơrá cho mơngế Rơđế tung cheăm Ea Kao), hiăng đi đo rŭm môi tuăn mơ-eăm, chiu pá puât ti tăng plĕng, teăn pro mâu ếo pơtâk tiô túa ki nếo, hlối rak vế khôi túa lĕm vâi krâ nah vâ mơjiâng pơlê ôm hyô pơlê pơla.

Ƀă ngê̆ nhân ưu tú A Ƀiu ối a pơlê Klếch (cheăm Ngọc Bay, pơlê kong kơdrâm Kon Tum, kong pơlê Kon Tum) mơhé hơnăm hiăng krâ, mâ hiăng tá xâu hlo, chêng hiăng pá kâi trâng to lâi xếo, laga pôa xuân ối kơhnâ ƀă tơdroăng ti tăng plĕng ‘na têng nêng, prôa ƀă hnê ăm mâu rơxông ối nếo. Pôa mơ’no hên ivá, chôu phut ti tăng plĕng chêng, têng nêng, hơkâ, um ki pong rơgi ƀă loăng... tung pơlê pơla Bơhnéa, djâ vêh a toăng hngêi dêi tơná ƀă pro tíu kố chiâng môi tíu ôm hyô pơlê pơla. Pôa A Ƀiu tối:

 “Vâ tơbleăng ‘na khôi túa lĕm tro ‘na Tây Nguyên mê hơnăm hiăng krâ laga a hngêi á hiăng pro môi tíu ôm hyô, ti tăng rôe vâ chê pái chât kơtâ khu chêng. Nôkố á xuân tơbleăng khôi tuá hên ‘nâng, ing mâu vâi o hok tro klêi mê kuăn cháu tung hngêi, kuăn pơlê tung kơtâu. Thăm nếo pơla kố nah á ối lăm hnê tôu chêng koăng Bơhnéa. Pói tơngah châ tơdroăng tơmâng tŏng kum dêi Tơnêi têa môi tiah kố mơni kuăn pơlê kô ngăn hlo tơdroăng tơrŭm môi tuăn krá tơniăn tung pơlê pơla á, rơtế vêh hriâm tơdroăng tôu chêng koăng’’.

Tơdroăng rak mâu ki kơnía tơmeăm khoăng Tây Nguyên ối châ tơdah tơdroăng tơmâng hâk vâ, pơtối răk dêi hên rơxông ối nếo. Rơ Châm Tứ, ối a pơlê Mrông Yô̆ 1, cheăm Ia Ka, tơring Chư Pah, kong pơlê Gia Lai nếo 15 hơnăm laga hiăng vâ châ ƀai hơ’muăn hdrôu dêi mơngế Jarai. Á tâ mơhúa xua ai jâ pôa chiâng hơ’muăn hdrôu xua mê thế mơ-eăm hriâm hên.

 “Hriâm tơ’nôm rế hên ƀai rế lĕm, tâng pin ôh tá ‘nâi mê drêng pôa hlâ ah mê kô hía tâi, khôi túa hdroâng kuăn ngo pin mê pin thế ‘nâi rak, hnê ăm ƀă pêi tiô. Mơhé ôh tá ‘nâi hên ƀă pôa mê xuân rak vế môi iâ ăm la ngiâ ah’’.

Rak vế ƀă mơnhông mâu ki kơnâ khôi túa lĕm tro vâi krâ nah, ngê̆ sih Ưu tú A Đuh, ối a pơlê Trang, cheăm Đăk La, tơring Đăk Hà, kong pơlê Kon Tum đi đo vêh ƀă mâu pơlê vâ ti tăng mâu tơdrá rơhdruê, rơngêi, ting ting vâi krâ nah. Pôa xuân hriăn plĕng pro tiô túa nếo mâu tơmeăm ki rêi xah môi tiah: chêng, koăng, không, têng nêng, klông put ƀă pro mâu ƀai rơhdruê nếo. Pôa tối, mê xuân cho troăng vâ mơnhông khôi túa lĕm tung rơxông nếo.

“Tơdrá xiâm xuân ối rak môi tiah mê, ngăn tiô ki xiâm mê vâi pro ki nếo. Xúa ing tơdrá ki ro tơniâ mê pin pro ăm gá ro tơniâ tâ nếo vâ la ngiâ ai mâu ƀai mơđah tơbleăng ăm kuăn pơlê pin lĕm tro tâ’’.

“Khôi túa lĕm tro cho mơhúa dêi hdroâng mơngế, khôi túa ối mê hdroâng kuăn ngo u ối’’ – rơkong xông tơpui dêi pôa Nguyễn Phú Trọng - Kăn xiâm pơkuâ hnê ngăn Đảng a Hneăng hôp khôi túa lĕm tro lâp tơnêi têa hơnăm 2021 ối ai ki kơnâ. Tơbâ troh Kăn xiâm pơkuâ hnê ngăn Đảng, kuăn pơlê mâu hdroâng kuăn ngo Tây Nguyên pơtối rak, mơnhông khôi túa lĕm vâi krâ nah, xuân cho rak mơhúa hdroâng kuăn ngo ăm la ngiâ ah.