Tiô tơdroăng dêi hneăng hôp, troh nôkố Dak Lak hiăng pêt châ lối 15.200 ha plâi sầu riêng, tâk 13.000 ha tâng pơchông ƀă hơnăm 2015. Kơxô̆ plâi châ xo hơnăm 2022 châ lối 150 rơpâu tâ̆n, ƀă tiô tối hdrối kô tâk troh 300.000 tâ̆n a hơnăm 2025. ‘Na tê ngi kong têa ê, hơnăm 2022 cho hơnăm apoăng plâi sầu riêng Dak Lak xuân môi tiah lâp tơnêi têa, châ tê ngi kong têa ê tiô troăng ki xiâm troh a kong têa Sinuâ, tíu tê 99% kơxô̆ plâi sầu riêng tung lâp plâi tơnêi. Tung tâi tâng kơxô̆ 53 kơpong pêt châ tê ngi kong têa ê tiô troăng ki xiâm, Dak Lak ai 23 kơpong, tâi tâng ƀăng deăng 1.450 ha.

Tung pơla kố nah, mâu khu tê mơdró tê ngi kong têa ê cho hôm ‘nâng tung tơdroăng hbrâ kơpong pêt, teăng mâ pro kăn teăng mâ pâ mah kơxô̆ ăm hên kơpong pêt plâi sầu riêng. Laga, xua tá krá tơniăn ki pơxúa ƀă hnoăng xua mê hiăng ai tơdroăng kuăn pơlê pêi chiâk deăng xăm tối khu tê mơdró lu lêa. Pôa Lê Văn Thành, Kăn pơkuâ kơ koan xiâm pêt tơmeăm khoăng ƀă rak vế kơchâi plâi pôm Dak Lak tối ăm ‘nâi, mâu khu tê mơdró kal thế kơchăng tâ tung pro mơ-éa pơcháu hnoăng pro teăng mâ kơpong pêt ƀă tung tơkêa tê tơmeăm, vâ ví mâu tơdroăng môi tiah mê kô chiâng ai:

“Khu tê mơdró thế châ kuăn pơlê pêi chiâk deăng môi tuăn, pơcháu hnoăng teăng mâ, ai hlá mơ-éa kĭ lế lĕm. Ối ai mơ-éa tơkê rôe tơmeăm, cho tơkêa ƀă kuăn pơlê pêi chiâk deăng, ôh tá xê tơkêa ƀă Kơ koan xiâm rak vế hdrê kơchâi, plâi, pôm, laga tơkêa mê xuân thế châ pơtroh ăm kơ koan xiâm rak vế kơchâi plâi pôm ‘nâi’’.

Tơmối lăm ngăn kơdrum plâi sầu riêng a tơring Krông Pač 

Pakĭng 23 mah kơxô̆ kơpong pêt ƀă 24 tíu kơxuô hiăng châ ăm ƀă châ môi tuăn tê ngi kong têa ê tiô troăng xiâm, Dak Lak ai 15 mah kơxô̆ kơpong pêt dế tơkôm kĭ ăm pêi, 35 mah dế mơjiâng, tâi tâng ƀăng deăng lối 2 rơpâu hectar. Tơpui tơno ƀă ngế chêh hlá tơbeăng VOV pakĭng hneăng hôp, pôa Trần Quốc Toàn, Kăn phŏ Kơ koan xiâm pơkuâ ki dâi lĕm tơmeăm pêi lo ing chiâk deăng, loăng pơlái kong kế, ká xi xŏng Dak Lak tối ăm ‘nâi, tuăn hiâm mơngế pêt plâi sầu riêng a kong pơlê nôkố ối hên tơdroăng tô tuăn, ôh tá vâ tơrŭm ƀă khu tê mơdró ngi kong têa ê.

Xua mê, tơdroăng tơdjêp, pro ăm mah rôe tê ngi kong têa ê, kal rak krá tơniăn tâ, ví mâu tơdroăng khéa kho kơ’nâi ah:

“Vâi tối ôh tá kĭ ƀă kơbố ôh, xua vâi tá hâi loi tơngah kơbố ôh. Á kơ-êng vâi ti lâi ôh tá loi, mê vâi tối nôkố kĭ, la ngiâ ai tơdroăng ki thế pêi tiô dêi tơná tê, pơklât ngin mê pro ti lâi ah. Xua mê, mâu tíu ki mê thế ai tơdroăng ki môi tuăn ƀă pơkâ nhên kơbố ngế ki pro ối tung dế vâ tơleăng mâu tơxup tơbriât mê. Luât cheăng kâ, luât xivil hiăng ai, laga tơleăng mâu tơdroăng tơxup tơbriât dêi kuăn pơlê xuân pá’’.

Vâ rak tơniăn tâi tâng mâu tơdroăng pá puât tung tơdjêp mơjiâng kơvâ plâi sầu riêng, mơdêk ivá tơbriât cheăng tung tê ngi kong têa ê, khu râ kăn pơkuâ Vi ƀan kong pơlê Dak Lak pơkâ thế mâu kơ koan ki tơdjâk mơdêk tơdroăng pơkuâ, tơrŭm tơ’lêi hlâu ƀă pơxâu phâk teăm tơdrêng mâu tơdroăng ki nếo ai, pêi pro mơjiâng khu pêt mơjiâng plâi sầu riêng vâ pêi tiô troăng nếo kơvâ ki kố.

Vi ƀan kong pơlê Dak Lak xuân hiăng tơbleăng pơkâ séa ngăn, mơjiâng mah kơxô̆ kơpong ƀă tíu kơxuô plâi sầu riêng. Tiô pơkâ nếo tơbleăng, 6 kơvâ a kong pơlê, mâu khu tơrŭm cheăng, Vi ƀan râ tơring, teăng mâ mâu kơpong pêt ƀă tíu kơxuô, hiăng châ xing xoăng 16 hnoăng cheăng ki nhên, tơtro ƀă kơvâ cheăng dêi tơná vâ mơjiâng mâu kơpong pêt plâi sầu riêng krá tơniăn, pro ăm mah kơxô̆ kơpong ƀă séa ngăn krá tơniăn ing pêt mơjiâng troh tê plâi sầu riêng tung mâu hơnăm la ngiâ.