Pêi cheăng ƀă kơmăi kơmok tâk lối 20% tâng vâ pơchông ƀă hơnăm nah, kơlo ki hên má môi riân sap apoăng hơnăm troh nôkố. Kơvâ pêi pro ƀă xing xoăng on tơhrik pơla hnoăng cheăng ki xiâm ƀă tơdroăng cheăng  mơhno lối 2,4 rơtal kWh, tâk 16%. Tê mơdró, ôm hyô xuân châ mơnhông tơƀrê, tâi tâng kơlo tê ‘ngré tơmeăm ƀă kơxô̆ liăn châ xo ing tê mơdró xua mơngế rôe xúa tâk vâ chê 15%, kơxô̆ tơmối lăm ôm hyô tâk luâ tơdế tâng vâ pơchông ƀă hơnăm hdrối.

Malối, xo liăn ngân nâp ăm hngêi rak liăn vâ chê 5.000 rơtal liăn, tâk lối 35% tâng pơchông ƀă hơnăm nah. Tung pêi cheăng, mơhé hâi troh rơnó xo tơmeăm ki khât, păn mơnăn pơtối mơnhông rơdêi, tâi tâng kuăn kiâ ki păn tâk lối 17%, hơ’nêh tâk vâ chê 6%. Tơdroăng hbrâ, mơdât pơreăng ƀă pơtối păn nếo mơnăn châ pêi pro tơdrêng, ai pơxúa, tơniăn tung păn mơnăn.