Drêng Tơbâ 100 hơnăm Hâi Hlá tơbeăng kăch măng Việt Nam (21/6), kơxê lơ 11/6, kong pơlê Dak Lak po leh diâp Pri Hlá tơbeăng kong pơlê Dak Lak hơnăm 2024 ƀă mơgêi 5 hơnăm tơkŭm po pri ki kố. Pri Hlá tơbeăng kong pơlê Dak Lak po sap ing hơnăm 2021, diâp tiah hmâ rêm hơnăm ăm mâu ƀai chêh ki rơkê má môi dêi hơnăm hdrối. Klêi kơ’nâi 5 hơnăm tơkŭm po, hiăng ai vâ chê 600 ƀai chêh dêi mâu ngế ki chêh tung lâp tơnêi têa veăng. Krê hơnăm kố, ai 96 to ƀai châ mot tung chung khảo.

A rôh po tơdroăng, Hô̆i đong Pri Hlá tơbeăng kong pơlê Dak Lak diâp pri ăm 49 ƀai ki rơkê má môi. Vi ƀan hnê ngăn kong pơlê Dak Lak xuân khĕn kơdeăn 1 khu pú hên ƀă 7 ngế krê ai ƀai chêh ki rơkê tung cheăng tơkŭm po Pri. VOV Tây Nguyên hâk tơngăm châ kâ 7 to pri túa pơchuât tung rơ’jiu, tung mê ai 1 pri A, 1 pri B.