Ƀă dó inâi ‘’Tơ’noăng pơhlêh nếo, tơmiât pêi rơkê, tơtêk djâ tơnêi têa mot tung chal nếo mơnhông mơdêk rơdêi, rơkê, kro mơdrŏng mơnhông rơdêi’’. Hneăng tơ’noăng pâ nhuô̆m tơnêi têa lâp tơnêi têa roh má XI tiô tối hdrối tơkŭm po khế 12 hơnăm kố. Phŏ Kăn xiâm hnê ngăn tơnêi têa tối rơdêi Hneăng hôp kô mơgêi hneăng cheăng ƀă hên tơdroăng châ tơƀrê, mâu ngế ki kơhnâ rơkê, tơdrêng amê, mơjiâng tơdroăng tơ’noăng tung lâp tơnêi têa, hbrâ ăm hneăng mơnhông nếo.

Hneăng hôp ôh tá xê to kheăn kơdeăn mâu tơdroăng châ tơƀrê, mê ối mơdêk hiâm mơno tơrŭm môi tuăn, khŏm mơ-eăm hên tung tâi tâng khu cheăng kal kí ƀă kuăn pơlê vâ pêi pro ƀlêi trâng hnoăng cheăng mơnhông mơdêk tơnêi têa tung chal nếo.