Tung 25 hơnăm veăng APEC, Việt Nam hiăng veăng hên, hbrâ ƀă Hneăng hôp tơpui tơno APEC, pơkâ hên troăng tơmiât pêi rơkê, tơdroăng tơkêa bro tơrŭm cheăng châ mâu khu tơrŭm cheăng kheăn kơdeăn; veăng kum mơdêk hơniâp lĕm, tơniăn, tơrŭm cheăng, tơdjêp cheăng kâ kơpong, rak hnoăng dêi APEC cho troăng tơdjêp cheăng kâ má môi a châu Á – Thái Bình Dương.

Ƀă ki kơnâ má môi dêi Hneăng hôp mâu khu râ kăn pơkuâ cheăng kâ APEC hơnăm kố ƀă tung pơla tơrŭm Việt Nam – Mih pơtối mơnhông ó rơdêi tung pơla kố nah, roh lăm pôu pêi cheăng veăng Hneăng hôp khu râ kăn xiâm APEC ƀă mâu tơdroăng pêi cheăng a Mih dêi Kăn xiâm hnê ngăn tơnêi têa Võ Văn Thưởng ai kơnâ kal khât, tá tung mâu tơdroăng pêi cheăng hên troăng ƀă pơla péa pâ, kum pơtối rak ƀă pro krá tơniăn tơpui kâ ƀă kong têa ê hơniâp lĕm, tơniăn, tơ’lêi hlâu ăm tơdroăng mơnhông dêi tơnêi têa.