Tiô Khu xiâm ngăn Hnê hriâm ƀă Hnê mơjiâng tuăn ngôa rơkê hơnăm hriâm 2024 – 2025, tung lâp kơpong Tây Nguyên ai lối 4.500 hngêi trung hriâm sap ing mầm non troh kao đăng, đăi hok, ƀă vâ chê 1,5 rơtuh ngế hok tro sap ing mầm non troh râ má pái. Mâu hngêi trung phôh thong klâ xoăng tơ’mô a lâp lu, châ tiô púi vâ hriâm tâp dêi hok tro ƀă tơdroăng hnê hriâm; hngêi trung hdroâng kuăn ngo ai tíu kâ koi ối pơtê châ pro, tiô tơdroăng púi vâ hnê hriâm mâu ngế cheăng cho hdroâng kuăn ngo. Mâu kong pơlê gum 20% liăn ngân vâ gum ăm hnê hriâm, tơdrêng amê hlối mơhnhôk veăng tơlo ing pơlê pơla vâ mơnhông tơdroăng hnê hriâm.

Laga, tơdroăng Hnê hriâm ƀă Hnê mơjiâng Tây Nguyên xuân ối ai hên tơdroăng ki ối ‘ro, ƀă ki rơkê plĕng tá hâi châ tiô púi vâ; kơxô̆ hngêi trung pêi châ tơdroăng pơkâ a tâi tâng rêm râ hriâm ối iâ, kơxô̆ kế tơmeăm xúa tung hriâm tâp pêi châ tiô púi vâ a râ hriâm tá hâi châ hên, kơxô̆ thái cô châ tiô púi vâ ối kal tiô pơkâ; mâu troăng hơlâ tŏng gum tá hâi hlo mơnhông tơƀrê, tơdjâk kân troh mơnhông ki rơkê plĕng tung hnê hriâm dêi kơpong.

Hlo tơdroăng ki ai khât kố, Khu xiâm ngăn hnê hriâm ƀă hnê mơjiâng tuăn ngoâ rơkê hiăng chêh pro tơdroăng “Mơdêk ki rơkê plĕng tung hnê hriâm, hnê mơjiâng tuăn ngoâ rơkê ăm kuăn pơlê hdroâng kuăn ngo Tây Nguyên” ƀă ki xiâm troh hơnăm 2030, hnê hriâm ƀă hnê mơjiâng tuăn ngoâ rơkê tung lâp kơpong châ pơhlêh nếo tiô troăng tro pơkâ, rơkê plĕng; rak tơniăn ăm mâu kuăn pơlê pơrá châ hriâm rơkê plĕng, pêi châ tơdroăng pơkâ thế mơnhông dêi kơpong tung hneăng nếo.

A rôh hôp, mâu kăn hiăng tơpui tơno ‘na tơdroăng ki pêi pro a kong pơlê tơná; tơdrêng amê hlối pơkâ mơ’no mâu troăng hơlâ vâ veăng tơpui tối ăm kơxop mơ-éa pơkâ dêi Khu xiâm ngăn hnê hriâm ƀă hnê mơjiâng tuăn ngoâ rơkê. Mê cho thăm mơnhông hnoăng cheăng pơkuâ, hnê mơhno dêi rêm râ tung tơdroăng mơdêk mơnhông hnê hriâm; pơhlêh nếo túa hnê hriâm; tơbleăng tơƀrê hnê nâl hdroâng kuăn ngo; pơkâ mâu troăng hơlâ tơ’mot mâu thái cô lăm hnê a kơpong xơpá ƀă hên ki ê. Pơkâ tơdroăng ki ai khât ‘no liăn roê tơmeăm, pro hngêi trung lâm hriâm, pôa Lê Bá Cường, phŏ kăn pơkuâ Khu ngăn hnê hriâm ƀă hnê mơjiâng tuăn ngôa rơkê kong pơlê Dak Nông tối tiah kố: tơdroăng pơkâ pro hngêi trung lâm hriâm cho pơrá pơkâ thế vâ ăm krá kâk mâu hngêi trung lâm hriâm.

‘Na mâu hngêi trung lâm hriâm athế ai pơkâ krê ăm kơpong Tây Nguyên, tâng mâu Tơdroăng pơkâ Tơnêi têa mê xuân athế mơnhên kơxô̆ to lâi kơpêng hrĭng vâ ‘no liăn pro mâu hngêi trung lâm hriâm, kơƀăng tăng krá kâk. Tung mê ai tối nhên kơlo tŏng gum ăm thái cô ai hngêi ối, tíu ối tơdjuôm cho môi tung mâu troăng hơlâ vâ ‘mâi rơnêu tơdroăng ki thái cô hnê kơpong hngế hngo vâi vêh dêi a pơlê xua ôh ti ai hngêi ối, ôh ti ai tíu mung ối, mê vâi ôh tá vâ hnê”.

Ƀă pôa Lưu Tiến Quang, phŏ kăn pơkuâ Khu ngăn hnê hriâm ƀă hnê mơjiâng tuăn ngoâ rơkê kong pơlê Dak Lak ăm ‘nâi, Dak Lak ai lối 1,9 rơtuh ngế kuăn pơlê ƀă 49 hdroâng kuăn ngo rơtế rêh ối tơdjuôm, kuăn pơlê hdroâng kuăn ngo châ lối 30%. Vâ mơdêk ki rơkê plĕng tung hnê hriâm, kal thăm mơnhông pro mâu hngêi lâm hriâm ai tíu kâ koi ối pơtê; ai troăng tŏng gum vâ tơ’mot thái cô lăm hnê; po rơdâ mâu hok tro ki châ tŏng gum liăn, troăng hơlâ tơrŭm ƀă mâu khu tơrŭm, cheăng kal kí rêh ối pơlê pơla, malối cho mơnhông hnoăng cheăng dêi krâ pơlê, ngế pơkuâ pơlê, ngế ki châ kuăn pơlê loi nhuô̆m tung pơlê pơla vâ mơdêk kơxô̆ hok tro lăm hriâm ƀă hên ki ê.

Mâu kăn xuân tối mâu rơkong tơpui tối ‘na tơdroăng kal mơnhên nhên mâu ngế ki châ tŏng gum ƀă tơnêi tơníu châ tŏng gum liăn ngân, pơkâ tung tơdroăng ki ‘mot tơkŭm dế vâ tah lôi tơnêi tơníu ƀă tơdroăng cheăng krê kơpong dế trâm. Jâ Vũ Thị Ánh, phŏ kăn pơkuâ Yăo yuk phôh thong ăm ‘nâi, mâu rơkong tơpui tối a rôh hôp cho tơdroăng ki kal vâ chêh pro hlá mơ-éa pơtối ‘mot tơ’nôm, chêh pro klêi mâu tơdroăng kal dêi pơkâ, hdrối vâ pêi pro mâu tơdroăng ki pơtối vâ pơtroh ăm Chin phuh séa ngăn, tơbleăng.

“Rơkong veăng tơpui dêi mâu kăn sap ing mâu Khu ngăn hnê hriâm ƀă hnê mơjiâng tuăn ngoâ rơkê tơbleăng tối gá pơxúa khât ăm Khu ki chêh pro hlá mơ-éa ngin vâ tơmâng xo, ‘mot tơ’nôm tung mâu tơdroăng ki mơnhên tối ki ai khât xuân môi tiah cho pơkâ mơ’no mâu troăng hơlâ tung la ngiâ vâ pêi pro châ tơdroăng pơkâ pêi, malối cho mâu tơdroăng ki Đảng ƀă Tơnêi têa dế kal vâ ‘nâi plĕng khât tung hnê hriâm ƀă hnê mơhno kơpong Tây Nguyên môi tiah hnê ăm mâu ngế ôh ti ‘nâi chư, hnê hnê hriâm ƀă kơxô̆ mơhnhôk vâi hdrêng troh hngêi trung, malối cho mâu vâi hdrêng hdroâng kuăn ngo a mâu kơpong hngế, hngo; veăng gum mơdêk ki rơkê plĕng ăm mâu ngế cheăng kơpong Tây Nguyên”.

Rôh hôp “Tơdroăng ki hnê hriâm ƀă hnê mơjiâng tuăn ngoâ rơkê kơpong Tây Nguyên ƀă veăng tơpui tối ‘na kơxop mơ-éa Pơkâ Mơdêk ki rơkê plĕng tung hnê hriâm, hnê mơjiâng tuăn ngoâ rơkê ăm kuăn pơlê hdroâng kuăn Tây Nguyên” po a Dak Lak hiăng mơhno tơdroăng tơmâng ngăn trâu hngế dêi Khu xiâm ngăn Hnê hriâm ƀă Hnê mơjiâng tuăn ngoâ rơkê, rơtế ƀă mâu kong pơlê tung tơdroăng rế hía rế tŏng gum xơpá, ôh tá tơniăn dế trâm hlo a kơvâ hnê hriâm kơpong tơnêi ai tơ pơloăng mơnúa kố.

Mâu rơkong veăng tơpui tối khât, tro ƀă ki ai khât sap ing mâu kăn cho tơdroăng ki kal vâ chêh pro klêi tơdroăng pơkâ, pơkâ troăng tơmiât pêi troh hơnăm 2030, hnê hriâm Tây Nguyên hiăng pơhlêh khât, rơkê, pêi châ tơdroăng púi vâ mơnhông krá tơniăn, tơdâng ƀă tŭm têk ăm rêm ngế kuăn pơlê - malối cho kuăn muăn hdroâng kuăn ngo.