Rêm kong pơlê tung kơpong pơrá ai 5 troh 6 kăn teăng mâ veăng Hneăng hôp Droh rơtăm rơkê pêi tiô rơkong Pôa Hồ roh má VIII a Pơlê kong kân Hồ Chí Minh. Roh kố, Khu pơkuâ Đoân Droh rơtăm Dak Nông tơkŭm po kheăn kơdeăn 28 ngế droh rơtăm ki kơhnâ rơkê pêi tiô rơkong Pôa Hồ ƀă 17 đảng viên hơnăm ối nếo kơhnâ rơkê kong pơlê Dak Nông hneăng hơnăm 2023 – 2025.

Xuân roh kố, Khu pơkuâ xiâm Đoân Droh rơtăm hiăng diâp Ƀâng kheăn kơdeăn ăm 2 ngế krê, 1 khu pú hên ƀă Khu pơkuâ Đoân Droh rơtăm Gia Lai diâp ƀâng kheăn kơdeăn ăm 5 ngế krê, 5 khu pú hên xua hiăng kơhnâ rơkê tung pêi pro tơdroăng xiâm Tơnêi têa mơjiâng thôn pơlê nếo hneăng hơnăm 2021 – 2025.

Ngoh Kpuih Rung, Kăn pơkuâ hnê ngăn Đoân cheăm Hla, tơring Chư Pưh, kong pơlê Gia Lai tối ăm ‘nâi mâu tơdroăng a cheăm:

“Leh tơbâ hâi kot mâ dêi Pôa Hồ, Đoân Droh rơtăm cheăm Ia Hla tơkŭm po hên tơdroăng pêi ki kơnâ ƀă pơxúa. Ki nhên Đoân Droh rơtăm cheăm tơrŭm ƀă Khu pơkuâ vâi kơdrâi ƀă mâu đoân theh ki ê tơkŭm po roh trâm mâ tơpui tơno ‘na dó inâi ‘na Pôa Hồ, vêh tơbâ khôi túa kăch măng, tơkŭm po xah hêi rơhdruê xuăng, tơ’noăng ivá môi tiah rơhdruê ƀai kheăn kơdeăn Pôa Hồ ƀă tơ’noăng peăng ƀalong...Pakĭng mê, tơkŭm po tơdroăng tŏng gum diâp kơxuô tơmeăm ăm vâi hdrêng chó chêng tơvê kŏng, lăm pôu ƀă diâp kơxuô tơmeăm ăm mâu ngế pêi cheăng kăch măng, mâu rơpŏng ai hnoăng tơnêi têa’’.