Kơxê hâi lơ 9/6, a hngêi Kuô̆k hô̆i, pôa Trần Thanh Mẫn Kăn xiâm hnê ngăn Kuô̆k hô̆i hiăng pơkuâ Hôp má pái dêi Vi ƀan  hbrâ pơkâ ‘nâi hơ’lêh luât, tơ’nôm  mâu tơdroăng dêi Luât hơnăm 2013. Kăn xiâm hnê ngăn Kuô̆k hô̆i khê̆n kơdeăn Chin phuh, Vi ƀan Măt trâ̆n tơnêi têa Việt Nam, khu xiâm ngăn ‘na Luât, Khu xiâm Kŏng an tung hơnăm kố hía nah hiăng hbrâ pơkâ hlá mơ-éa chêh tơbleăng, xoăng hnoăng cheăng, hnê mơhno ăm  mâu  kơ koan, khu tơrŭm cheăng pêi tơƀrê ‘na tơmâng xo mâu tơdroăng veăng hnê tối, tơkŭm mâu tơdroăng kuăn pơlê veăng hnê tối tơniăn tro tiô pơkâ.

Mâu kơ koan thong tâ̆n, hlá tơbeăng hiăng ai hên tin bai  tro tiô tơdroăng veăng hnê khĕn  ƀă tơdroăng veăng tối dêi tung khu râ kuăn pơlê  ‘na  tơdroăng hbrâ Pơkâ..  Klêi tơkŭm, hiăng ai lối 280 rơtuh tơdroăng veăng hnê tối dêi kơ koan, khu tơrŭm cheăng, mâu ngế ƀă tâi tâng mâu tơdroăng kal, tơdroăng chêh tung luât Pơkâ; tung mê, tâng riên ki kơxô̆ ngế vâ môi tuăn ai 99,75%, tơdroăng kố mơhno ăm hlo nhên troăng hơlâ ló tro dêi Đảng ƀă Kuô̆k hô̆i hiăng mơhno ki vâ môi tuăn tung hên ngế pơla “Troăng hơlâ dêi Đảng, hiâm mơno kuăn pơlê”.

Kăn xiâm hnê ngăn Kuô̆k hô̆i pơkâ thế pê klêi, mâu kơ koan thâ pro klêi hồ sơ hbrâ tơpui ‘na chêh tơdroăng Pơkâ pơtroh ăm Kuô̆k hô̆i rĕng tơbleăng pêi pro tung la ngiâ, mơ-eăm troh hâi lơ 16/6 vâ ai tiô púi vâ thâ pêi dêi tơdroăng xĭng xoăng pro rế lĕm mơngế pêi cheăng ăm tơnêi têa ƀă pêi tiô tơdroăng túa mâu kăn pêi cheăng 2 râ.