Pôa Bùi Viết Tiệm, ối a tơring Chư Sê, kong pơlê Gia Lai, tối tơdroăng tơmot chiâng môi tíu pêi cheăng tơnêi têa râ kong pơlê ôh tá xê to roh tơ’lêi hlâu vâ pro tơniăn khu pêi cheăng tơnêi têa, mê ối cho roh vâ mơdêk tơdroăng mơnhông mơdêk cheăng, hngêi trăng troăng klông.

‘’Á pói vâ klêi kơ’nâi tơmot chiâng môi kong pơlê Gia Lai nếo kô châ mơdêk troăng klông vâ tơdjêp lĕm tro tâ pơla kơpong kong ngo Gia Lai ƀă kơpong tơbăng dêi Bình Định. Pói vâ tơnêi têa pơtối mơjiâng mâu tơdroăng kơdroh kơtiê, ki rơhêng vâ tối cho ƀă pơlê pơla hdroâng kuăn ngo ƀă kuăn pơlê a kơpong hơngế hơngo’’.

Kuô̆k hô̆i hiăng tơbleăng pơkâ tơ’mot, kơdroh kơxô̆ kong pơlê, pơlê kong kân tung lâp tơnêi têa sap 63 chu ối 34 tíu pêi cheăng râ kong pơlê ƀă ki tơdâng. Ing mê, Dak Nông kô châ tơ’mot ƀă Lâm Đồng ƀă Bình Thuận, chiâng kong pơlê Lâm Đồng ki nếo.  Kăn ƀô̆ ƀă kuăn pơlê kong pơlê Dak Nông xuân tối vâ môi tuăn ƀă môi tuăn rơdêi troăng hơlâ mê.

Pôa Phạm Cự Tâm, Phŏ Kăn hnê ngăn Vi ƀan cheăm tơkăng kong Dak Buk So, tơring Tuy Đức, tối troăng hơlâ.

“Dak Nông ƀă Lâm Đồng cho péa kong pơlê ki rơdêi mơnhông ‘na ôm hyô ngăn chiâk deăng, tung pơla mê Bình Thuận cho kong pơlê  rơdêi ‘na têa kơxĭ. Klêi tơ’mot mê 3 kong pơlê kô mơnhông dêi kong pơlê kro mơdrŏng ing tơdroăng ki rơdêi ai pơxúa’na têa kơxĭ troh kơpong kong ngo. Tâi tâng kô tơrŭm vâ mơnhông tơƀrê”.