Kơxo lơ 11/6, Kuô̆k hô̆i hneăng 15 pơxiâm mot tung rôh má 2 Hneăng hôp má 9, ƀă tiô tối hdrối po sap ing nôkố troh tâi hâi lơ 27/6. A rôh pêi cheăng kơxo lơ 11/6, Kuô̆k hô̆i tơmâng pơchuât tơbleăng hlá mơéa séa ngăn ƀă tơpui a tôh ‘na mâu kơxop mơ-éa pơkâ, tơdroăng luât, tung mê ai Pơkâ klâ xoăng tíu pêi cheăng râ kong pơlê hơnăm 2025.

Tiô Pơkâ, Chin phuh pơkâ 23 túa klâ xoăng ƀă 52 to kong pơlê, pơlê kong kân, pro 23 to kong pơlê, pơlê kong kân nếo, rak 11 to tíu pêi cheăng, ăm tâi tâng kơxô̆ lâp tơnêi têa ối 34 to kong pơlê, pơlê kong kân. Tâi tâng ƀiên chê̆ mâu kơ koan, tíu pêi cheăng râ kong pơlê klâ xoăng cho lối 447.000 ngế. Mâu kăn môi tuăn ƀă mâu túa pơkâ, mơnhên tối tơdroăng chêh pro pơkâ kố tro ƀă hnê mơhno dêi Tơnêi têa, tro ƀă Pơkâ 60/2025 dêi Rôh hôp Tơnêi têa 11, hneăng 13.