Cho ngế kuăn dêi hdroâng kuăn ngo Rơđế, nâ H Pha Ayun - đảng viên hơnăm ối nếo, kăn hnê ngăn Đoân Droh rơtăm dêi cheăm Čuôr Đăng, tơring Čư̆ Mgar, kong pơlê Dak Lak rơbot chôu pâ tơrêm rơrêk idrâp chêng tung mâu rơnó leh mơdĭng. Hâk tơngăm khôi túa, vêa vong ton nah, tô tuăn drêng chêng koăng rế tơklâ hngế, nâ mơ-eăm “krếo nếo idrâp chêng” ƀă tơdroăng pêi pro.

Ƀă hnoăng cheăng cho Ngế pơkuâ hnê ngăn Đoân dêi cheăm, nâ pâ thế po lâm hnê tŏn chêng ăm mâu đoân viên, droh rơtăm a pơlê; tơdrêng ƀă vâi pú tung chi đoân, troh a tơrêm to hngêi krếo mâu ngê̆ nhân cho mâu ki rơkê tŏn hiăng hên hơnăm hnê ăm mâu ối nếo. Sap lâm hriâm iâ mơngế apoăng, troh nôkố, cheăm Čuôr Dăng hiăng mơjiâng péa Kâu lăk ƀô̆ hriâm tŏn chêng koăng ƀă môi Kâu lăk ƀô̆  rơkong tơpui pơto pơtih.

Nâ H’Pha Ayun tối, a mâu lâm hriâm tŏn chêng, ôh tá xê to tơdroăng hnê vâ rơkê tŏn... mê ối hnê tơdroăng hâk vâ tŏn chêng ăm mâu hơnăm ối nếo. Ing tơdroăng ki mê cho tơrŭm ƀă kuăn pơlê, hiâm mơno ‘nâi mơnê kơ jâ pôa ƀă ‘nâi hlê rak vế túa lĕm tro hdroâng kuăn ngo:  

“Mâu vâi pú hâk vâ hriâm. Mâu vâi pú mơhno ki rơkê dêi tơná, ing mê kô ‘nâi hlê hnoăng tơná ƀă hiâm mơno hâk vâ, nhoăm hdroâng mơngế. Ing mâu kâu lăk ƀô̆ tŏn chêng ƀă rơkong tơpui pơto pơtih dêi cheăm, mâu vâi pú châ lăm tŏn ukố umê, veăng tơ’noăng râ cheăm, tơring troh kong pơlê. Ing mâu tơdroăng mơhnhôk mê, mâu vâi pú hiăng rak vế ƀă tơbleăng troh lâp lu túa lĕm tro ton nah dêi kuăn ngo tơná”.

A hngêi trung râ má pái phôh thong Buôn Hồ, pơlê kong krâm Buôn Hồ, um méa cô Phạm Thị Thu Thảo - Kăn hnê ngăn Đoân hngêi trung, đảng viên hơnăm ối nếo dêi kơvâ hnê hriâm  kong pơlê - hiăng chiâng hmâ ƀă hok tro ƀă vâi pú. Ƀă hnoăng cheăng ngế pơkuâ tung mâu tơdroăng cheăng dêi Đoân – Hô̆i dêi hngêi trung cô yăo hiăng pâ thế mâu rôh tơ’noăng xup um pro video clip tơbâ mâu hâi leh kân; tơkŭm po mâu rôh lăm troh, lăm ngăn tíu tơbâ ton nah, tíu ki lĕm dêi kong pơlê; pro fanpage Đoân dêi hngêi trung đi đo xup tâ um mơngế ki pêi tơdroăng lĕm tro, tơdroăng ki lĕm tro tơbleăng lâp lu tung hngêi trung. Sap ing mâu tơdroăng pêi pro mê, hên mâu hok tro ôh tá xê to hriâm kơhnâ rơkê mê ối ‘nâi tơmiât troh tơdroăng rêh ối lĕm tro vâ chiâng kuăn pơlê ki lĕm. Cô Phạm Thị Thu Thảo ăm ‘nâi:

“Ing mâu rôh koh hlá cờ, hriâm tơ’nôm ƀă hriâm pât, hngêi trung pro hlâu ăm mâu vâi o veăng tung kâu lăk bô̆, đô̆i khu, ing mê mơnhông ivá cheăng, tăng ‘nâi plĕng hên tơdroăng pâ nhoăm tơnêi têa. Hơnăm hriâm 2024-2025, hiăng ai 2 ngế hok tro veăng hriâm hmâ  vâ mot Đảng”.

Cho đảng viên hơnăm ối nếo dêi Chi đoân Khu ngăn ‘na luât kong pơlê Dak Lak, nâ Hoàng Thị Diễm Xuân - Kăn hnê ngăn Chi đoân - ôh tá xê to kăn ƀô̆ kơhnâ tung tơdroăng cheăng pêi mê ối cho ngế ki hnê tối ing mâu rôh lăm “hnê ‘na luât’’ troh mâu pơlê cheăm hơngế hơngo.

Ôh tá xâu troăng hơngế, nâ ƀă vâi pú  djâ  hlá mơ-éa luât, mâu kơtâ hlá mơ-éa chêh ‘na luât, tơrŭm ƀă mâu khu grup a pơlê cheăm tơkŭm po hôp tơpui tơno, hnê tơdroăng pro hlá mơ-éa ki hmâ achê kuăn pơlê, tơ’lêi, rĕng hlê. Nâ xuân cho ngế ki xiâm djâ pêi tơdroăng cheăng túa “Droh rơtăm pleăng hnoăng tơná veăng kum kuăn pơlê pro hlá mơ-éa tiô troăng hyôh măng’’ a Tíu xiâm Pêi cheăng dêi kong pơlê. Túa pêi mê hiăng kum vâ chê 15.000 hdroh ngế kuăn pơlê pro klêi hlá mơ-éa lý lịch ‘na luât tung hơnăm hdrối - veăng pêi kơhnâ a tơdroăng cheăng tiô túa nếo ‘na pro hlá mơ-éa, mơjiâng mâu kăn achê kuăn pơlê, xua kuăn pơlê.

Ƀă mâu hnoăng veăng ‘no ăm hlo, nâ Hoàng Thị Diễm Xuân châ Khu pơkuâ ngăn Đoân kong pơlê Dak Lak khĕn kơdeăn cho đảng viên  hơnăm ối nếo kơhnâ rơkê hơnăm 2025. La ƀă nâ, tơdroăng ki ro kân tâ cho ôh tá la lâi pơtê cheăng xua kuăn pơlê, xua tơdroăng pơkâ mơjiâng Tơnêi têa tro tiô luât ing mâu tơdroăng ki hlâu hlĕng má môi dêi a pơlê:

“Ing tơdroăng cheăng pêi rêm hâi ƀă  tơdroăng cheăng dêi grup, ngin djâ hnê luât troh achê kuăn pơlê, kum kuăn pơlê hlê, ‘nâi rak luât, mơjiâng tơdroăng hmâ rêh ối ƀă pêi cheăng tro tiô tơdroăng luât, luât xiâm”.

Kô ăm hlo, mơhé pêi cheăng ulâi, pêi ki klâi, cheăng kân lơ kŭn, la ƀă ivá hơnăm ối nếo, hiâm mơno hâk vâ ƀă tuăn hiâm vâ pêi pro ahdrối, mâu đảng viên hơnăm ối nếo a Dak Lak dế rêm hâi veăng tơbleăng tuăn loi, tơbâ tơdroăng púi vâ pleăng hnoăng tơná ƀă pơtối pêi tơdroăng ‘na rơxông nếo mơjiâng pơlê xiâm tơná lĕm ro kro mơdŏng, rơkê plĕng.