Kơ’nâi 1 hơnăm tơbleăng pêi Pơkâ 57 dêi Khu xiâm Kal kí, ‘na kơvâ khoa hok, kong ngê̆, hơ’lêh hriĕn plĕng ki nếo ƀă hơ’lêh kơxô̆ hiăng châ pêi tơƀrê hên rôh apoăng ki kal, tơdrêng ƀă tơdroăng pê klêi luât pơkâ, khu kăn hnê mơhno, pơkuâ cheăng ing Tíu xiâm tơnêi têa troh kong pơlê, cheăm bêng.

Hơ’lêh kơxô̆ a tơnêi têa pin hiăng hlo tâk rĕng ƀă hên tơdroăng ki nhên tung lâp plâi tơnêi môi tiah: kơlo kơxô̆ tơmeăm khoăng  hyôh măng ối má 67, internet châ pơxá ói má 18, Chin phuh điê̆n tưh ối má 71... Malối tơdroăng hơ’lêh nếo hriĕn plĕng ki nếo dêi Việt Nam ối má 44 tung lâp plâi tơnêi. Lâp tơnêi têa ai dâng 4.000 khu mơdró  pơxiâm pêi cheăng hriăn plĕng ki nếo.

A rôh hôp, pôa Tô Lâm, Kăn xiâm pơkuâ hnê ngăn Đảng tối nhên hnoăng cheăng ki kal - cho xiâm dêi khoa hok, kong ngê̆, hơ’lêh hriăn plĕng ki nếo ƀă pơ’lêh kơxô̆. Kố cho tơdroăng pơkâ pơklât thế vâ mơnhông rĕng ƀă krá dêi tơnêi têa tung la ngiâ. Kăn xiâm pơkuâ hnê ngăn Đảng tối 7 troăng hơlâ ƀă xuân cho mâu tơdroăng ki kal hnê mơhno pơkâ mâu khu xiâm, kơvâ cheăng kong pơlê tơkŭm hnê, pêi pro; tung mê vâ môi tuăn ‘nâi nhên troăng ki vâ pêi dêi hơnăm 2026 cho “pêi pro tơƀrê, tơbleăng tơdroăng pêi”.