A roh hop mê, mâu ngế ki hriăn plĕng, mâu ngế cheăng ‘na khoa hok, mơngế pơkuâ ngăn, rơtế ƀă khu kong pơlê, pơlê kong kân tơkŭm séa mơnhên ki păng ‘nâng, tối tơbleăng tơdroăng ki rơkê, pơkâ pêi pro mâu troăng hơlâ, ƀă túa cheăng ki nhên vâ veăng mơ’no dêi ki rơkê plĕng, pơkâ pêi pro mâu troăng hơlâ mơnhông kong pơlê Lâm Đồng ki nếo, ƀă hnoăng cheăng: “Mơjiâng ƀă mơnhông tŭm têk kong pơlê Lâm Đồng, xo ki tơniăn pro xiâm vâ mơnhông; xo ki mơnhông pêi cheăng kâ, pêi lo kế tơmeăm cho hnoăng cheăng ki xiâm; xo tơdroăng ki hơniâp ro, ƀă phâi tơtô dêi Kuăn pơlê cho ki xiâm vâ mơnhông mơ-eăm; troh hơnăm 2030 kong pơlê Lâm Đồng kô chiâng kong pơlê ki mơnhông krá tơniăn, pêi lo liăn ngân hên, tơtro ƀă troăng hơlâ, hnoăng cheăng ngăn tung mơnhông tơnêi têa la ngiâ”. Tiô Ngế ki hriăn plĕng ‘na mơjiâng pro tơmeăm khoăng, pôa Trần Ngọc Chính, Kăn hnê ngăn Khu pơkâ vê hdró mơnhông kơphô̆ Việt Nam tối, troăng hơlâ mơnhông kong pơlê Lâm Đồng ki nếo athế rak tơniăn ai 3 hnoăng cheăng, mê cho tơdrêng-krá tơniăn-tơrŭm kơpong, tung mê, kal vêh mơnhên tối ăm kơvâ ki lâi cho ki kal má môi.

“Drêng tơ’mot 3 kong pơlê mê pin athế mot tung pêi cheăng kâ ki tiah lâi cho kal má môi. Tơdroăng pêi lo kế tơmeăm ing têa kơxĭ dêi kong pơlê Lâm Đồng ki nếo cho troăng hơlâ ki kơjo má môi, pơtối mê cho kŏng ngê̆ ki xiâm dêi kơpong Đà Lạt ƀă Dak Nông cho mâu tíu ki mơjiâng pro bauxite. Xua ti mê, tơdroăng ki tơdjêp pơla 3 kong pơlê kố ƀă mơnhông cheăng kâ mê ga ai tơdjâk troh tơdroăng ki mơnhông kơphô̆. Á tơmiât ai 3 kơphô̆ ki kân xiâm, tung mê, xuân cho Đà Lạt, Gia Nghiã ƀă Phan Thiết, ƀă tơrêm kơphô̆ tiah mê, ga ai môi kơpong kơphô̆ ƀă pin tơdjêp mâu tíu ki mê kô tơ’lêi mơnhông ó rơdêi tâ”.

Roh hôp vêh mơnhên, klêi kơ’nâi tơ’mot 3 kong pơlê, Lâm Đồng tíu ki ai kong, ai têa kơxĭ, ai bo cheăng tơkăng kong, ai kơno tuk, hiăng chiâng pơlê kong xiâm dêi mâu hdrê loăng, loăng plâi kâ ƀă tơdroăng cheăng kơmăi kơmok bauxite. Kố cho tơnêi tíu, ki ai ivá kân ƀă xuân cho roh ki tơ’lêi hlâu vâ Lâm Đồng mơjiâng chiâng hnoăng ki pêi lo liăn ngân ki nếo, ai ivá cheăng kân rơdâ, ivá rơdêi ƀă ki tơdjâk troh tơdroăng cheăng trâu rơdâ, rak vế ki tơniăn ăm tơdroăng ki vâ tơtêk tŭm têk, veăng gum ăm tơdroăng ki xiâm tung mơdêk 2 to kơxô̆ tung hneăng hơnăm 2026-2030.

Tiô pôa Trần Hồng Thái, Kăn hnê ngăn Vi ƀan kong pơlê Lâm Đồng tối, roh hôp xuân hiăng mơhno tối mâu tơdroăng ki xiâm ki ta hâi teăm châ pêi pro châ tơƀrê hdrối mê hía nah, tơdrêng ƀă mâu tơdroăng pêi pro ki ta hâi kâi tơxông dế mơdât tơdroăng mơnhông, ing mê, gum ngăn nhên tâ um méa ki vâ mơnhông dêi  kong pơlê Lâm Đồng nếo tung roh ki nếo. Kố cho mâu tơdroăng ki vâ tơpui tối, veăng hnê khĕn kal kân khât vâ Lâm Đồng chiâng ai hnoăng cheăng ki xiâm tung kơxop hlá mơ-eá dêi Hneăng hôp kân Đảng ƀô̆ kong pơlê la ngiâ. Pôa Trần Hồng Thái vêh mơnhên tối:

“Mơnhông pêi cheăng kâ-rêh ối pơlê pơla dêi Lâm Đồng athế tơdjêp ƀă  hnoăng cheăng xiâm ki vâ mơnhông, krá tơniăn ƀă tŭm têk kơvâ cheăng ing tơdroăng ki mơnhông pêi cheăng kâ tơ’lêi, pêi lo kế tơmeăm pơhlêh nếo tung pêi cheăng. Tơdroăng ki mơnhông mê athế tơdjêp tung hên kơpong ki vâ mơdêk. Pơtối mơdêk hên tâ hnoăng cheăng dêi môi kong pơlê ai kong kế, ngo ngối, ai tơbăng, ai têa kơxĭ, ai tíu tơkăng kong, tơkŭm tung tơdroăng ki mơnhông tro tiô túa cheăng, hên khu xiâm ƀă tơdjêp châ tơƀrê pơla mâu hnoăng cheăng. Mơnhông hên tŭm mâu tơdroăng cheăng ƀă xo kuăn mơngế cho ki xiâm vâ mơdêk, kuăn pơlê cho mơngế xiâm, khu mơdró kâ cho ivá ƀă khu kăn pơkuâ cho mơngế ki djâ troăng, tŏng gum. Á pâ thế Khu hnê mơhno cheăng dêi Khu rah chêh Hneăng hôp kân dêi Đảng ƀô̆ kong pơlê Lâm Đồng nếo pơtối i nhên khât mâu tơdroăng ki tơpui tối dêi mâu ngế ki hriăn plĕng”.

Nếo achê pơla kố, a chôu phut pêi cheăng ƀă 3 kong pơlê hdrối vâ mơjiâng kong pơlê Lâm Đồng ki nếo, pôa Tô Lâm, Kăn xiâm pơkuâ hnê ngăn hiăng pơkuâ ngăn ƀă tối nhên: “Lâm Đồng, Bình Thuận ƀă Dak Nông cho mâu kơpong tơnêi ki kro mơdrŏng, ai hên hnoăng cheăng kăch măng, kro ‘na túa lĕm tro dêi hdroâng kuăn ngo, dế kơdo mơ-eăm mơnhông, pơhlêh nếo tung rêm kơvâ cheăng ƀă vêh mơnhên hnoăng cheăng tơná rế hiá rế kal tung tơdroăng ki mơnhông pêi cheăng kâ-rêh ối pơlê pơla dêi kơpong pêa Tơdế-Tây Nguyên. Rêm kong pơlê pơrá pơtroh mâu khôi túa, vêa vong, môi ivá ki ó rơdêi, ing mê, veăng gum pro ăm kơpong kố thăm rế krá tơniăn, ó rơdêi, hên túa cheăng ƀă kro mơdrŏng hên tâ.

Pôa Tô Lâm xuân ối tối: “Tơdroăng ki roh ton nah hiăng gum ăm kong pơlê Lâm Đồng ki nếo mâu troăng hơlâ, ivá cheăng, ƀă roh ki tơ’lêi hlâu vâ pơtối mơnhông, xua ti mê, kal athế hlê plĕng, ai hnoăng cheăng xiâm tung tơdroăng ki vâ mơjiâng pro ki pohlêh nếo, ivá rơdêi ƀă ai pơxúa mơjiâng chiâng ivá cheăng vâ mơnhông mơdêk tơdroăng rêh kâ ối kâ-cheăng kâ pơlê pơla.