Klêi leh tơdah, kăn xiâm péa tơnêi têa hiăng tơpui tơno  tơdrăng, loi nhoăm dêi pó. Péa pâ tơpui ‘na tơdroăng tơrêm tơnêi têa, tơpui troăng hơlâ ki kân ƀă mâu tơdroăng vâ pêi pro nhên khât vâ mơnhông tơrŭm cheăng péa pâ tung la ngiâ. ‘Na tơdroăng kal kí- tơpui kâ, péa pâ vâ môi tuăn mơdêk tơpui tơrá mâu râ kăn, malối cho râ kăn xiâm, vâ mơnhông tâ nếo loi nhoăm tơdroăng kal kí ƀă hlê dêi rơpó.

‘Na cheăng kâ, tê mơdró, ‘no liăn cheăng, péa ngế kăn xiâm tối kố cho tơdroăng ki kal tung tơrŭm pơla péa pâ; vâ môi tuăn péa tơnêi têa ối ai hên tơdroăng ki vâ mơnhông ‘na tê mơdró; po rơdâ mâu luât tơrŭm cheăng mê cho mơhnhôk mơjiâng Vi ƀan tơrŭm cheăng Chin phuh ‘na tơrŭm cheăng kâ ƀă khoa hok kih thuât; tơbleăng ai pơxúa kĭ tơhrâ tê mơdró tơniăn pơla Việt Nam - EU (EVFTA), pro hlâu vâ tơmeăm dêi rêm tơnêi têa pơtối châ tê a kơchơ dêi rơpó, ing mê mot tê tung kong têa EU ƀă ASEAN.