Kơxo má lơ 5/6, pôa Phạm Minh Chính, Ngế pro xiâm hnê ngăn Chin phuh ƀă Kơdrâi pôa rơtế ƀă Khu râ kăn xiâm Việt Nam lo ing pơlê kong xiâm Hà Nội vâ veăng hôp a Rôh hôp Đại dương Khu lâp kong têa rôh má 3 (UNOC 3), hlối po mâu tơdroăng cheăng pơla péa pâ a Kŏng hòa Pơhlăng; pôu păng ‘nâng Kŏng hòa Estonia ƀă Kong têa Thụy Điển sap ing hâi lơ 5 – 14/6/2025 tiô rơkong krếo thế dêi pôa Antonio Guterres, Ngế xiâm chêh tôm xo rơkong Khu lâp kong têa ƀă pôa Emmanuel Macron, Kăn xiâm pơkuâ kong têa Pơhlăng, Ngế pro xiâm hnê ngăn Kŏng hòa Estonia Kristen Michael ƀă Ngế pro xiâm hnê ngăn kong têa Thụy Điển Kristersson.

Rôh lăm pôu kố dêi pôa Phạm Minh Chính, Ngế pro xiâm hnê ngăn tơnêi têa pơtối tơbleăng troăng prôk tơpui kâ tơniăn krê, hên kơvâ, hbrâ rơnáu, kơhnâ tơrŭm ceăng ƀă kong têa ê tŭm têk, trâu hngế ƀă châ tơƀrê tiô tơdroăng pơkâ dêi Hneăng hôp 13 dêi Đảng, mâu tơdroăng Pơkâ dêi Khu xiâm pơkuâ tơdroăng kal kí.