Roh hôp vâ séa ngăn, mơhnhôk mâu tơdroăng cheăng klêi roh hôp má 13 ƀă tơpui mâu troăng pêi, pơtối tah lôi pá puât, tơvâ tơvân, mơdêk rĕng tơdroăng mơjiâng pro mâu tơmeăm, tơdroăng tơkêa bro. Xông tơpui pơxiâm po, pôa Phạm Minh Chính, Ngế pro xiâm hnê ngăn tơnêi têa tối nhên, troh nôkố, inâi mâu tơdroăng tơkêa bro ki Khu hnê mơhno séa ngăn ai 40 tơdroăng tơkêa bro kân tung tâi tâng kơxô̆ 92 tơdroăng tơkêa bro hên tơmeăm tung 3 kơvâ: Troăng prôk chêng, troăng rơxế lơtreng ƀă tơƀai, tơkâ hluâ kơpong 48 kong pơlê, pơlê kong kơdrâm ối tung Tơnêi têa.

Ngế pro xiâm hnê ngăn tơnêi têa tối nhên, sap ing kố troh mơ’nui hơnăm 2025, bu u ối dâng 15 khế nếo, kơxô̆ tơdroăng cheăng kân. Xua mê, Ngế pro xiâm hnê ngăn tơnêi têa pơkâ thế kal tơpui tơno troăng mơdêk rĕng tơdroăng pêi pro, rak tơniăn ki dâi lĕm mâu tơdroăng tơkêa bro; xúa mâu túa ki rơkê kơnía ing tơdroăng tơkêa bro troăng kơxái on tơhrik 500 kV măch 3.