
Mơngế Việt Nam a kong têa Pơhlăng ai lối 300.000 ngế, tung mê ai dâng 50.000 ngế rơkê ƀă chât rơpâu khu mơdró krê dêi kuăn pơlê. Ngế pro xiâm hnê ngăn tơnêi têa ăm ‘nâi, hneăng lăm pôu Pơhlăng rôh kố cho mơhno ki mơ-eăm khât dêi Việt Nam vâ mơnhông tơrŭm cheăng tung tŭm tơdroăng pơla Việt Nam - Pơhlăng rế xông rơdêi trâu rơdâ, ai pơxúa khât.
Tung mâu rôh pêi cheăng, Ngế pro xiâm hnê ngăn tơnêi têa hiăng pơkâ thế mâu kăn dêi Pơhlăng pro tơ’lêi hlâu ăm mơngế Việt Nam ki ối a Pơhlăng châ tơrŭm ƀă rêh ối lĕm tro a kong têa ki vâi ối, pơtối rak vế túa lĕm tro, vêa vong ƀă ‘na tơpui nâl Xuăn, veăng ‘no hnoăng pêi cheăng kơhnâ khât tung cheăng kâ -rêh ối pơlê pơla dêi Pơhlăng.

Ngế pro xiâm hnê ngăn tơnêi têa pơkâ thế, peăng Pơhlăng pơtối pro hlâu vâ mơngế Việt Nam châ tơrŭm krá, râk rơkong tơpui dêi Xuăn ƀă khôi túa, vêa vong lĕm tro, pro xiâm tíu tơdjêp tơrŭm tơrôa pơla péa tơnêi têa. Ngế pro xiâm hnê ngăn tơnêi têa krếo thế mâu kuăn pơlê pơtối rak túa lĕm tro ki môi tuăn dêi rơpó, hâk tơngăm hdroâng mơngế, veăng ‘no hnoăng pêi cheăng kơhnâ khât mơnhông tơnêi têa Việt Nam ƀă hnê pơtôu hiâm mơnê rêm ngế rơxông nếo ‘nâi pâ nhoăm tơnêi têa.
Viết bình luận