A rôh hôp tâi tâng dêi Rôh hôp khu râ kăn xiâm ‘na têa kơxĭ dêi Khu lâp kong têa rôh má 3 (UNOC 3), châ po a Pơhlăng, pôa Phạm Minh Chính, Ngế pro xiâm hnê ngăn Chin phuh hiăng ai tơchuât ki kal teăng mâ ăm 10 to kong têa tơrŭm cheăng mâu kong têa Đông Nam Á (ASEAN), tơdrêng amê hlối tối túa tơmiât dêi Việt Nam ‘na rak vế ƀă xúa krá tơniăn têa kơxĭ ƀă kế tơmeăm tung têa kơxĭ.

Ngế pro xiâm hnê ngăn tơnêi têa  pơkâ mơ’no 4 tơdroăng ki kơjo mê cho: rak vế hơniâp lĕm, tơrŭm a têa kơxĭ; mơdêk pơkuâ ngăn têa kơxĭ krá tơniăn; ngăn têa kơxĭ cho ivá mơnhông; ƀă thăm mơnhông lâp plâi tơnêi ăm tơdroăng pơkâ pêi mơnhông krá tơniăn. Pôa xuân tối rơdêi ki kal dêi Tơkêa Khu lâp kong têa ‘na Luât têa kơxĭ hơnăm 1982 môi tiah pơkâ ivá pơkuâ ngăn têa kơxĭ.

Ngế pro xiâm hnê ngăn tơnêi têa mơ’no tối mâu troăng tơmiât pêi: tơrŭm khoa hok ƀă ki ai khât ton nah, mơdêk xúa kong ngê̆ ƀă pơhlêh kơxô̆, mơnhông tơlo mâu liăn ngân cheăng kâ têa kơxĭ, tơrŭm hên kơvâ cheăng, tơdjêp mâu kong têa, ƀă thăm mơnhông tơrŭm ƀă lâp plâi tơnêi. Việt Nam tơhrâ pêi pro rơdêi, tŭm têk vâ pêi pro pơkâ, ƀă hiâm mơno “3 hbrâ”: tơbleăng troăng hơlâ mơnhông cheăng kâ ngiât, thăm mơnhông tơrŭm tung lâp plâi tơnêi, ƀă djâ troăng ahdrối tung mâu tơdroăng tơmiât pêi rơkê rak vế têa kơxĭ.