Pơchuât tơbleăng ăm kăn xiâm pơkuâ hnê ngăn cheăng Đảng, pái kong pơlê pơrá tơbleăng kơtăng mâu troăng pơkâ kân dêi Tơnêi têa môi tiah Pơkâ kơxô̆ 60, Pơkâ kơxô̆ 45, Mơgêi kơxô̆ 150 ƀă hên ki ê ‘na klâ xoăng tíu pêi cheăng râ kong pơlê, pro lế lĕm kơ koan cheăng tơnêi têa, hbrâ ăm hneăng hôp Đảng rêm râ.

Mâu tơdroăng pơkâ ‘mot tơkŭm râ kong pơlê, ôh tá tơkŭm râ tơring, mơjiâng khu kăn pơkuâ péa râ châ tơbleăng kơtăng. Kăn xiâm pơkuâ hnê ngăn cheăng Đảng tối nhên, troăng pơkâ ‘mot tơkŭm pái to kong pơlê vâ mơjiâng kong pơlê Lâm Đồng nếo cho pơkâ kân, rế cho tơdroăng tung la ngiâ, rế cho tơdroăng ki kal vâ mơdêk tơƀrê, xêt pơkuâ ngăn.

Tơdroăng ‘mot tơkŭm mâu kơ koan, khu tơrŭm athế pêi pro rơkê, tơdrăng, tro. Athế xo túa rêh ối lĕm, ivá pêi cheăng, tơdroăng ki châ kuăn pơlê nhuô̆m, tơƀrê dêi tơdroăng cheăng pro kế ki vâ ngăn tro má môi tung xing xoăng kăn ƀô̆. Tơdrêng amê kal tơmâng ngăn troăng tŏng gum ăm kăn ƀô̆ tung khu ngế ki châ tah kơdroh, pơtê tiô pơkâ, pơhlêh tíu pêi cheăng. Mâu tơdroăng athế pêi tiô hiâm mơno ki rơkê plĕng, pôu râng, rơkê plĕng, tro pơkâ.