Kăn xiâm pơkuâ hnê ngăn Đảng kheăn kơdeăn pái kong pơlê hiăng châ tơƀrê ‘na tơdroăng cheăng kâ – rêh ối pơlê pơla, ki má lối cho kơlo tơtêk cheăng kâ tơniăn tung hơnăm 2024 ƀă apoăng hơnăm 2025. Kăn xiâm pơkuâ hnê ngăn Đảng tối rơdêi, tơdroăng tơmot chiâng môi pái kong pơlê cho roh tơ’lêi hlâu vâ pơhlêh ing troăng pêi mơnhông chiâng lâp kơpong, vâ mơhnhôk mơ’no liăn cheăng ton xŏn, mơjiâng hngêi trăng, troăng klông tơdjêp, cheăng kâ krúa lĕm kong prâi ƀă pơhlêh xúa kŏng ngê̆ kơxô̆.

Pôa pơkâ thế pái kong pơlê tơkŭm séa ngăn tơdroăng pêi pro mâu pơkâ Hneăng hôp Đảng hneăng hơnăm 2020 – 2025, teăm tơdrêng ai troăng pêi lêi tah ăm mâu tơdroăng ki pá vâ châ, tơdrêng amê mơjiâng troăng pêi la ngiâ mơnhông mơdêk klêi kơ’nêi tơmot chiâng môi, tơmiât troh mơjiâng tíu xiâm tơtêk nếo ai ivá tơbriât tơnêi têa, mơnhông krúa lĕm kong prâi, rơkê, hên tíu xiâm ƀă mot tơrŭm lâp plâi tơnêi.