Pôa Trần Tranh Mẫn, Kăn xiâm hnê ngăn Kuô̆k hô̆i loi khât hneăng lăm pôu kô hdró tơdroăng kal, po môi troăng ki nếo ăm tơrŭm cheăng Việt Nam - Siam. Kăn xiâm hnê ngăn Kuô̆k hô̆i pơkâ thế péa pâ kô xúa ki pơxúa tơ’nôm tung mâu kơvâ mê cho cheăng kâ kơxô̆, on tơhrik krúa, tơdroăng cheăng pêi tung kơpong ƀă pêi chiâk rơkê xúa mâu tơdroăng kĭ tơhrâ tê mơdró tơniăn, mê cho Kĭ tơhrâ tơrŭm cheăng kâ tung tŭm tơdroăng tung kơpong (RCEP) vâ ai tiô pơkâ tê mơdró 25 rơtal dollars a hơnăm 2030.

Jâ Paetongtarn Shinawatra, Ngế pro xiâm hnê ngăn kong têa Siam ăm ‘nâi xiâm tơdroăng lăm pôu Việt Nam rôh kố vâ tơpui tơno ƀă mâu khu kăn xiâm pơkuâ hnê ngăn Việt Nam ‘na mâu tơdroăng mơdêk tơrŭm cheăng pơla péa pâ tung la ngiâ, ‘na cheăng kâ, ‘no liăn cheăng ƀă tê mơdró vâ djâ tơrŭm cheăng péa tơnêi têa rế tơƀrê.