Pôa Đỗ Tiến Sỹ, Kăn xiâm pơkuâ Rơ’jíu Việt Nam rơtế mâu rơxông khu chêh hlá tơbeăng vêh tơbâ troăng pêi ƀlêi trâng kân, mơnhên hnoăng djâ troăng ahdrối dêi VOV tung tơdroăng mơnhông hlá tơbeăng kăch măng. Pôa Đỗ Tiến Sỹ tối nhên: Drêng ối rêh nah, Pôa Hồ Chí Minh, Kăn xiâm hnê ngăn tơnêi têa hneăng apoăng hiăng 6 roh troh lăm pôu Rơ’jíu, hiăng ai hên tơdroăng pơchân trâu hơhngế.

Pâ vế rơkong Pôa Hồ, vâ chê 80 hơnăm hiăng luâ, VOV đi đo rak hnoăng cho lêng djâ troăng ahdrối tung mât trâ̆n troăng tơmiât – khôi túa lĕm, rơtế hdroâng mơngế tơkâ hluâ rêm hneăng tơdroăng  roh ton nah. Ƀă hnoăng cheăng troh lâp lu tơdroăng tuăn pâ, tơdjêp pơlê pơla mơngế Việt Nam tung ƀă kong têa ê, Rơ’jíu Việt Nam mơnhên tíu pêi cheăng cho kơ koan tơpui ki xiâm, kum mơjiâng tơdroăng chêh hlá tơbeăng tiô rơxông nếo, rơkê, veăng tơpui tối ó rơdêi tung tơdroăng gâk kring ƀă mơnhông tơnêi têa.