Pôa Trần Mạnh Toàn châ pôk pro kăn pơkuâ; mâu pôa Tạ Đức Hậu, Phan Ngọc Luận, Đỗ Thị Hằng ƀă Đà Thị Thanh Quế pro phŏ kăn pơkuâ. Ƀaoh hiâm xah hô̆i kơpong XXVI păng ‘nâng pêi cheăng ing lơ 1/6/2025 ƀă 1 ngế kăn pơkuâ,  4 ngế phŏ kăn pơkuâ, 8 ƀơrô cheăng ƀă 22 Ƀaoh hiêm xah hô̆i kong pơlê, tíu pêi cheăng a pơlê kong kơdrâm Ƀuôn Ma Thuột.

Poa Trần Đình Liệu, phŏ kăn pơkuâ Ƀaoh hiêm xah hô̆i Việt Nam pơkâ thế tíu pêi cheăng rĕng tơniăn tíu pêi cheăng, séa ngăn tung tơdroăng ki ai khât kong pơlê, veăng tí tăng ‘nâi plĕng teăm tơdrêng vâ rak vế troăng hơlâ tŏng tum pôi tá tro pơtê tơdroăng cheăng. Tung mê, ai tơdroăng rak vế mâu Pơkâ tŏng gum mâu ngế ki roê ƀaoh hiêm xah hô̆i ki mơhnŏng vâ roê xêh ƀă ƀaoh hiêm khăm pơlât, rak tơniăn hnoăng pơxúa, pôi tá vâ tro pơtê.