Khŭl pơgơ̆r jang lơ anih jang Trung ương hlôi pơjing 5 khŭl bơ̆jang akŏm lơ̆m tơdrong hơtŏk loi dơ̆ng dăr hơlen, hơlen lăng lơ anih jang đơ̆ng trung ương truh tơ̆ xăh lơ̆m năr Tết Nguyên đán Ất Tỵ păng pơyan lêh Puih mak 2025. Hơdai hăm athei tơ̆ rim tơring, pơgơ̆r pơjing dôm khŭl dăr hơlen, hơlen lăng lơ anih jang đơ̆ng rim tơring, đơ̆ng rim dêh char truh tơ̆ rim xăh. Hơvơn tôch ai dôm hơnih chih kơtơ̆ng ang tơroi tơbăt dôm tơdrong hơgăt đơ̆ng khôi luơ̆t găh vei sơđơ̆ng tơgoh tơmam sa kŭm nhen dôm tơdrong hlôh vao lơ̆m rơih iŏk, vei lăng, pơm tơlĕch păng răt yua tơmam sa truh kon pơlei. Kiơ̆ kơ Anih tơm vei lăng găh Choh jang sa păng Hơtŏk tơiung tơring tơrang, năr Tết Nguyên đán jĭ khei ‘năr ‘meh vă răt yua tơmam sa, mă loi ‘noh jĭ tơmam sa kon tơrong tŏk lơ, Anih tơm hlôi jang hơdai hăm dôm anih jang kơpal pơjing 9 khŭl bơ̆jang hơlen lăng, vei lăng hơnih ket ƀuh kon tơrong, hơlen lăng rơgoh thú y tơ̆ 17 dêh char, pơlei tơm, mă loi ‘noh jĭ vei lăng kơjăp ‘nhĕm răt tơmơ̆t đơ̆ng teh đak đe, lơ̆m noh, lăng kăl 3 grŭp tơdrong găh jĭ toi, sơđơ̆ng rơgoh tơmam sa păng tơchă băt anih pơm tơlĕch. Ƀok Tống Xuân Chinh, Phŏ Kơdră Anih vei rong kon tơrong, Anih tơm vei lăng găh Choh jang sa păng Hơtŏk tơiung tơring tơrang roi tơbăt:

Hăm akŏp kon tơrong hrei ‘nâu ‘noh nhôn akhan kĕ vei sơđơ̆ng tơmam ‘nhĕm, kơtăp iĕr bip, đak toh ăn răt yua hơtuch sơnăm, lơ̆m năr đei lơ lêh têt, mă loi ‘noh jĭ năr tết nguyên đán. Kiơ̆ kơ ‘noh, Anih vei lăng găh Choh jang sa păng Hơtŏk tơiung tơring tơrang athei dôm dêh char, pơlei tơm athei anih joăt jang, khŭl kơdră rim tơring jang hơdai tơroi tơbăt tơdrong hơgăt khôi luơ̆t găh vei sơđơ̆ng rơgoh tơmam sa, tơdrong răm păng hiong răm đơ̆ng tơdrong tơdrong yua kơ chơ̆t kơ̆m, ‘ngoăih hơnăn chih đei ăn gơh yua lơ̆m pơm tơlĕch blŭng a, iŏk yua, vei lăng, pơm tơlĕch tơmam sa đơ̆ng choh jang sa đei, bri ‘long păng ka hơdang...

Tơpă yan âu tơ̆ Anih tơm Hà Nội Anih pơgơ̆r jang 389 pơlei tơm Hà Nội ăn tơbăt, đĭ hrôih tơlĕch ăn Trong jang kăl vei lăng rơgoh ‘lơ̆ng tơmam sa pơyua ăn Tết Nguyên đán Ất Tỵ păng Lêh Puih mak sơnăm 2025. Anih vei lăng kon pơlei pơlei tơm Hà Nội pơjing 4 khŭl hơlen lăng lơ anih jang hơlen lăng găh vei rơgoh ‘lơ̆ng tơmam sa kơ pơlei tơm. Kăl hơlen lăng akŏm lơ̆m dôm hơnih pơm tơlĕch, tĕch mơdro, răt tơmơ̆t đơ̆ng teh đak đe dôm tơmam sa,  đei yua lơ lơ̆m năr Tết păng prăt pơyan lêh. Tơ̆ apŭng, thị trấn, gô pơjing dôm khŭl hơlen lăng tơdrong tơlĕch jang kiơ̆ tơdrong jang vei rơgoh ‘lơ̆ng tơmam sa pơyua ăn năr lêh, tết tơ̆ dôm xăh, phường, thị trấn. Ƀok Đoàn Thanh Phong, Kơdră Anih vei lăng rơgoh ‘lơ̆ng tơmam sa pơlei tơm Hà Nội ăn tơbăt:

Hăm tơdrong jang ‘noh jĭ hơnơ̆ng vei rơgoh ‘lơ̆ng tơmam sa lơ̆m tơdrong ‘nao, mă loi ‘noh jĭ năr têt păng lêh ‘noh Khŭl hơlen lăng lơ anih jang năm hơlen lăng kơtă tơ̆ dôm anih tĕch mơdro pơm tơlĕch tơmam sa păng kiơ̆ đơ̆ng hơlen lăng ‘noh tơdăh nhen đei chă ƀôh dôm hơnih tĕch mơdro pơm glăi găh vei rơgoh ‘lơ̆ng tơmam sa ‘noh nhôn gô sek phak păng athei dôm anih mơdro sa pơm kiơ̆ tơpăt. Oei hăm dôm anih pơm tơlĕch tĕch mơdro mă tŏk bŏk pơm kiơ̆ tơpăt ‘noh nhôn kŭm hơnơ̆ng athei dôm anih mơdro sa gô hơnơ̆ng hơtŏk jơhngơ̆m đon ‘lơ̆ng ‘noh.

Pơm kơhret tơdrong vei lăng tĕch mơdro tơmam pơyua ăn ‘meh vă răt yua năr Tết păng prăt pơyan lêh, khŭl lĭnh Vei lăng tĕch mơdro lơ̆m teh đak tơlĕch jang đơ̆ng hrôih Trong tơlĕch jang kăl tang găn tĕch ôn, hơlĕnh pơgơ̆m păng tơmam ya Tết Nguyên đán Ất Tỵ sơnăm 2025; hơtŏk loi dơ̆ng tơdrong jang hơlen lăng, vei lăng anih tĕch mơdro păng sek phak tơpăt dôm tơdrong pơm glăi găh mong tơmam vă hơtŏk kơjă măk, pơklep kơjă, tĕch mơdro điện tử, tĕch mơdro, chơ, mong răk tơmam kơ̆m, tơmam răt ôn đơ̆ng teh đak đe, tơmam ưh kơ băt hơdăh anih pơm tơlĕch, tơmam ya, tơmam pơm glăi tơdrong iŏk yua tơdrong gơh hơgei, tơmam ưh kơ ‘lơ̆ng, lăng kăl dôm tơmam đei ‘meh vă yua lơ lơ̆m năr hơtuch sơnăm păng Tết Nguyên đán. Hơtŏk loi dơ̆ng tơdrong jang dăr hơlen, hơlen lăng, vei lăng rơgoh ‘lơ̆ng tơmam sa lơ̆m dôm tơdrong đơ̆ng pơm tơlĕch truh răt yua; hơdrin iung jang tang găn păng sek phak tơ păt dôm bơngai, khŭl jang, anih pơm tơlĕch, tĕch mơdro pơm glăi găh vei rơgoh ‘lơ̆ng tơmam sa.

Ƀok Nguyễn Quang Huy, Phŏ Kơdră Anih jang akŏm, tơlĕch jang jên hu, Anih jang vei lăng tĕch mơdro, Anih tơm vei lăng găh Kơmăy kơmŏk mơdro sa roi tơbăt: khŭl lĭnh vei lăng tĕch mơdro gô jang hơdai kơjăp hăm dôm anih jang kơpal păng khŭl kơdră tơring pơm kơ hret hơlen lăng tơmam đơ̆ng ‘măng jang sơlam mơ̆t lơ̆m anih tĕch mơdro lơ̆m teh đak bơ̆n:

Hăm tơmam sa tơring tơ jê̆ sơlam teh đak ‘noh khŭl lĭnh vei lăng tĕch mơdro jang hơdai kơjăp hăm rim khŭl lĭnh kơpal tơ̆ ‘măng jang sơlam teh đak pơgơ̆r hơlen lăng vei lăng tang găn tơmam kon tơrong răt tơmơ̆t ôn đơ̆ng tơring sơlam trong teh, trong đak dơsĭ, trong gre păr chơ mơ̆t lơ̆m anih tĕch mơdro lơ̆m teh đak chă tĕch. Tơ̆ anih tĕch mơdro lơ̆m teh đak, khŭl lĭnh vei lăng tĕch mơdro akŏm hơlen lăng, vei lăng tơmam tơ̆ dôm anih tĕch mơdro, kơchơ tĕch mơdro tơm, kơ chơ kon pơlei tĕch mơdro... lăng kăl tơdrong pơklep kơjă, tĕch hăm kơjă pơklep... Hơnơ̆ng tŭn pran tơdrong jang tang găn tĕch mơdro ôn, hơlĕnh, pơgơ̆m păng tơmam ya lơ̆m mạng, mă loi ‘noh jĭ mạng tơpôl.

Vei lăng kơhret sơđơ̆ng rơgoh tơmam sa năr Tết Nguyên đán Ất Tỵ 2025 păng pơyan lêh 2025, hơnăp jang đơ̆ng rim tơring tôch kơgĭt kăl. Mă loi ‘noh jĭ, dôm anih pơm tơlĕch, tĕch mơdro tơmam sa đơ̆ng choh jang sa đei krê hơmơt lơ, pơm ưh kơ sơđơ̆ng tơmam sa rơgoh, ‘meh vă răt yua lơ̆m năr lêh, tết đơ̆ng kon pơlei. Dôm tơdrong pơm glăi vei rơgoh ‘lơ̆ng sơmam sa chă ƀôh athei sek phak kơhret, vei sơđơ̆ng tơdrong tơhli păng roi tơbăt hơdăh lơ̆m tơdrong kơtơ̆ng ang tơpôl kiơ̆ ƀlep tơdrong hơgăt đơ̆ng khôi luơ̆t. Rim ‘nu kon pơlei athei jing bơngai răt tơmam hiôk vă vei sơđơ̆ng jơhngơ̆m pran ăn kơdih păng ŭnh hnam, kŭm hăm teh đak sơng pơyan Puih mak hiôk chơt.