Jĭ kôn mon kon hơ ‘lơ̆p hơdrung Êđê, mŏ H Pha Ayun – đảng viên sơnăm mơlôh, Ƀĭ thư Đoàn tơring Cuôr Dăng, apŭng Cư Mgar, dêh char Dak Lăk - rơbot tôm ƀai tôn chĭng chêng lơ̆m rim pơyan kơ̆m kang kơnang giĕng. Hưch hanh hơmanh bơnê hăm tơdrong oei sa joăt joe ‘lơng rŏ đơ̆ng sơ̆, pơngơ̆t mưh chĭng chêng roi năr roi hiong răm, mŏ tơchơ̆t “krao hơvơn đơ̆ng jơva chĭng chêng” hăm trong iung jang hloi.

Hăm hơnăp jang jĭ bơngai Ƀĭ thư tơring, mŏ hlôi chă apĭnh pơih lăm pơtho tôn chĭng chêng ăn đoàn viên, hơdruh tơdăm lơ̆m tơring; atŭm hăm bôl boăl lơ̆m chi đoàn, năm truh rim hnam chă hơvơn dôm đe kră băt tôn chĭng chêng chă pơtho tôn chĭng chêng ăn đe tơdăm. Đơ̆ng lăm hŏk iĕ ‘măng mă blŭng, truh dang ei, tơring Cuôr Dăng hlôi pơjing đei ƀar khul tôn chĭng chêng păng mĭnh khul pơma pơđơ̆k.

Mŏ H Pha Ayun tơbăt, tơ̆ rim lăm hŏk tôn chĭng chêng, ưh khan lăp pơtho băt tôn chĭng chêng mă oei chă pơtho hloi jơhngơ̆m đon hưch hanh hơmanh bơnê kơ chĭng chêng ăn đe tơdăm. Tơdrong ‘noh jĭ tơdrong tơgoăt dih băl pôm nơ̆r ƀơ̆r đon kon pơlei pơla, jơhngơm đon băt ‘mêm kơ eng, ƀlŏk hơdơ̆r kơ mĕ ƀă yă ƀok păng vei răk tơƀăk mong tơdrong oei sa joăt joe ‘lơ̆ng rŏ kơ hơdrĕch hơdrung:“Đe boăl hŏk pơhrăm tôch pơnam. Đơ̆ng noh tơƀôh hơdăh jơhngơ̆m đon hưch hanh hơmanh bơnê hăm tơdrong oei sa ‘lơ̆ng rŏ kơ hơdrĕch hơdrung. ‘Moi kiơ̆ rim khul tôn chĭng chêng păng nơ̆r pơma pơđơ̆k kơ tơring, đe boăl đei năm vang chă pơlong tôn chĭng chêng lơ̆m tơring, lơ̆m apŭng, lơ̆m dêh char. Đơ̆ng tơdrong pơgơ̆r ou, đe boăl hlôi vei răk păng lang să tơdrong oei sa ‘lơ̆ng rŏ joăt joe đơ̆ng dơ̆ kơ hơdrĕch hơdrung bơ̆n.”

Găh tơ̆ hnam trương jăl pêng Buôn Hô, thĭ xăh Ƀuôn Hô, um rup bơngai kô pơtho Phạm Thị Thu Thảo – Ƀĭ thư Đoàn hnam trương, đảng viên sơnăm mơlôh gơh hơgei kơ hơnih pơtho pơhrăm dêh char-hlôi joăt joe hăm đe hŏk tro păng rim bôl boăl ƀok thây kô. Hăm hơnăp jang bơngai chĕp kơ̆l lơ̆m rim tơdrong jang Đoàn-Hô̆i kơ hnam trương, kô pơtho hlôi tơlĕch nơ̆r apĭnh rim ‘măng pơlong pơm video clip tơbăt rim năr lêh tih; pơgơ̆r rim ‘măng năm tơmang hơnih gĭt kăl dăr sơnăm, năm tơmang hơnih ‘lơ̆ng rŏ kơ tơring; pơjing fanpage Đoàn hnam trương hơnơ̆ng chih tơbăt dôm bơngai ‘lơ̆ng, jang ‘lơ̆ng lang să dôm tơdrong ‘lơ̆ng hơ iă ăn lơ̆m hnam trương. Đơ̆ng dôm tơdrong jang ou, lơ hok tro ưh khan lăp hŏk pơhrăm gơ̆h mă oei pơjing ăn trong hơrih sa trŏ lăp vă đei jing kon pơlei oei sa ‘lơ̆ng. Kô pơtho Phạm Thị Thu Thảo tơbăt:“ ‘Moi kiơ̆ rim jơ chao kơ, hŏk pơhrăm, hnam trương pơjing rơvơn ăn rim đe oh vang mơ̆t lơ̆m khul, đơ̆ng noh hŏk pơhrăm đei jơhngơ̆m đon ‘lơ̆ng ‘mêm kơ eng teh đak. Sơnăm hŏk 2024–2025, hlôi đei 2 ‘nu hŏk tro vang năm hŏk hlôh vao găh Đảng.”

Jĭ đảng viên sơnăm mơlôh găh Chi đoàn Hơnih bơ̆ jang Tư pháp dêh char Dak Lăk, mŏ Hoàng Thị Diễm Xuân – Ƀĭ thư Chi đoàn - ưh khan lăp mĭnh ‘nu kang ƀô̆ tơnăp lơ̆m bơ̆ jang mă oei jing bơngai pơtruh ăn jơhngơưm đon hưch hanh ‘moi kiơ̆ rim ‘măng năm “pơtho tơbăt khôi luơ̆t” truh hăm tơring hơtăih yăih.

Ưh kơ ‘nhoen trong hơtăih, plăih kơjung, mŏ hăm bôl boăl chĕp ba kơsơ̆p hla bơar khôi luơ̆t iung jang hơdoi hăm rim chi đoàn tơring pơgơ̆r pơma dơnuh, pơtho tơbăt trong pơm hla bơngai ăn kon pơlei ƀônh hlôi vao. Mŏ oei jing bơngai pơchoh trong jang hơlou trong jang “Hơdruh tơdăm năm iung jang tơgŭm djru kon pơlei jang kiơ̆ pơm hla bơar kiơ̆ trư̆k tuyên” tơ̆ Hơnih bơ̆ jang pơm hla bơar dêh char. Trong jang ou hlôi tơgum ăn vă jê̆ 15.000 ‘nu kon pơlei pơm keh đang hla bơar lĭ lĭch tư phap lơ̆m sơnăm ou ki - tơgop kơtang lơ̆m iung jang gơ̆h hơgei tơdrong bơ̆ jang, tơ iung pơjing khul kơdră chĕp pơgơ̆r tơring tơklep hăm kon pơlei, kơ yuơ kơ kon pơlei.

Hăm dôm tơdrong tơgop kơtang, mŏ Hoàng Thị Diễm Xuân đei Hơnih Đoàn dêh char Dak Lăk pôk pơ ư jĭ đang viên mơlôh gơh hơgei sơnăm 2025. Mă lei hăm mŏ, tơdrong chơt hyôk hloh ‘noh jĭ ưh kơ pơdơ̆h iung jang tơgŭm kon pơlei pơla, kơ yuơ tơdrong jang tơ iung pơjing Teh đak ‘lơ̆ng kơ jăp đơ̆ng dôm tơdrong yan ou tơ̆ pơlei pơla:“ ‘Moi kiơ̆ bơ̆ jang tơdrong jang păng bơ̆ jang đoàn ou to, nhôn ba khôi luơ̆t truh hăm kon pơlei, tơgŭm ăn kon pơlei băt hlôh ƀôh hơdăh, pơm kiơ̆ kơjăp khôi luơ̆t, pơjing đei tơdrong joăt lơ̆m hơrih sa păng bơ̆ jang kiơ̆ khôi luơ̆t tơm teh đak, kiơ̆ khôi luơ̆t.”

Mă đơ̆ng bơ̆ jang lơ̆m rim tơdrong jang phara dih băl, mă lei hăm jơhngơ̆m mơlôh, jơhngơ̆m đon pran kơtang, hơbĕch hơbal, tơnăp ‘lơ̆ng păng jơhngơ̆m đon pơm jŭk yŭk trong hơlou, dôm đang viên sơnăm mơlôh tơ̆ Dak Lăk tŏk bok roi năr roi tơgop pơm lang să jơhngơ̆m đon lui yom, pơm hơtŏk jơhngơ̆m đon hơpơi ‘meh vă tơgop ‘lơ̆ng păng chih dơ̆ng dôm tơdrong bơ̆ jang găh jơhnơr mơlôh tơ iung pơjing tơring tơrang, pơlei pơla pơdrŏng ‘lơ̆ng liĕm, gơh hơgei.