Iung pơma tơ̆ hop akŏm, Kơdră chĕp pơgơ̆r Kuô̆k hô̆i Trần Thanh Mẫn tơbăt, tơ̆ hop akŏm ou, Hơnih bơ̆ jang Khul kơdră chĕp pơgơ̆r Kuô̆k hô̆i ăn tơgop nơ̆r tơgoăt iŏk, tơblang hơdăh, hơmet ming 28 tơdrong vă pơjing khôi luơ̆t, tơdrong tơchơ̆t hlôi đei pơma dơnuh tơ̆ ‘Măng mă 1 kơ ‘măng hop akŏm, tơchĕng lăng gô pơtruh ăn Kuô̆k hô̆i pơdrơ̆ng kiơ̆ tơ̆ ‘măng mă 2, đei: Khôi luơ̆t hơmet ming, tơmơ̆t dơ̆ng mĭnh ƀar apăng kơ rim khôi luơ̆t lơ̆m tơdrong vei lăng sơđơ̆ng teh đak; Tơdrong tơchơ̆t kơ Kuô̆k hô̆i găh hơmet ming dăh mă hŭt hloi trong bơ̆ jang vei lăng kon jên hu, jang sa iŏk đei gĭt kăl kơ rim hơnih bơ̆ jang kơ Teh đak; Tơdrong vă jang hơmet ming hơnih bơ̆ jang dêh char sơnăm 2025. Kơdră chĕp pơgơ̆r Kuô̆k hô̆i Trần Thanh Mẫn athei:“Rim tơdrong đei lăng hơlen ưh khan lăp pơm pơkeh trong jang khôi luơ̆t, mă oei tơgop pơjing đei jơhngơ̆m pran ‘nao ăn atŏk tơ iung kơ teh đak păng sơđơ̆ng ăn bơ̆ jang chĕp pơgơ̆r ‘lơ̆ng hơ iă kơ Khul kơdră chĕp pơgơ̆r Teh đak lơ̆m chăl hle. Rim hơnih bơ̆ jang pơtruh ăn, hơnih bơ̆ jang lăng hơlen păng rim hơnih jang đei ƀơm truh  iung jang hơdoi kơjăp, pơm hơdăh rim tơdrong oei đei nơ̆r tơgop phara dih băl, sơđơ̆ng ăn rim hla bơar tơchơ̆t đei pơdrơ̆ng kiơ̆ tơpă ‘lơ̆ng păng trŏ lăp hăm yan ou”.

Tơ̆ jơ hop akŏm, rim kơdră jang lơ̆m Hơnih bơ̆ jang chĕp pơgơ̆r Kuô̆k hô̆i hlôi tơgop nơ̆r hăm tơdrong vă pơjing Khôi luơ̆t Hơnih bơ̆ jang chĕp pơgơ̆r tơring (hơmet ming). Hơnih bơ̆ jang chĕp pơgơ̆r Kuô̆k hô̆i lăp đon hăm dôm tơdrong tơgoăt iŏk, hơmet ming đơ̆ng Khul kơdră chĕp pơgơ̆r Teh đak. Mă lei, athei kăl hơlen mă brĕ tơdrong tơchơ̆t Jơnŭm vei lăng kon pơlei dêh char đei pơjao ăn Hơnih vei lăng kon pơlei dêh char dăh mă Jơnŭm vei lăng kon pơlei tơring. Kơdră chĕp pơgơ̆r Hơnih bơ̆ jang Khôi luơ̆t păng Tư pháp Hoàng Thanh Tùng akhan:“Jơnŭm vei lăng kon pơlei ‘noh hơnih bơ̆jang tang măt ăn jơhngơ̆m đon, tơdrong hơpơi ‘meh vă păng tơdrong pơm tơm kơ dih kơ kon pơlei tơ̆ tơring. Kơ yuơ lơ loh, tơdrong pơjao rim tơdrong jang, tơdrong gơ̆h jang mă khôi luơ̆t tơchơ̆t sơkơ̆t hơdăh găh gơ̆h jang, hơnăp jang kơ Jơnŭm vei lăng kon pơlei ăn Hơnih vei lăng kon pơlei ‘noh Hơnih bơ̆ jang teh đak tơ̆ tơring ‘noh ưh kơ trŏ lăp hăm hơnih dơ̆ng, tơdrong gơh jang păng trong bơ̆ jang kơ rim hơnih bơ̆ jang, pơm ăn truh hơnih bơ̆ jang teh đak iŏk jang tơgum ăn hơnih bơ̆ jang kon pơlei pôk tơmơ̆t tơ̆ tơring, ưh kơ trŏ lăp hăm tơdrong bơ̆ jang teh đak pơjao jang, iung jang hơdoi păng dăr lăng hơlen tơdrong bơ̆ jang”.

Tơblang hơdăh găh tơdrong ou, Kơdră chĕp pơgơ̆r Ƀô̆ Nô̆i vŭ Phạm Thị Thanh Trà tơbăt:“Nhôn hơlen kiơ̆ rim trong jang, mă blŭng ‘noh trong jang chinh trĭ kiơ̆ trong pơrô̆ jang đơ̆ng Khul kơdră chĕp pơgơ̆r Trung ương, akŏm lơ̆m tơlĕch jang kiơ̆ tôm tong pơjao jang, gơh jang ƀar păh Trung ương hăm tơring păng ƀar păh rim khul chĕp pơgơ̆r bơ̆ jang tơring. Mă ƀar ‘noh jei iŏk đơ̆ng tơdrong yan ou kăl tơplih đơ̆ng trong jang bơ̆ jang vei lăng hăm jing trong bơ̆ jang chĕp pơgơ̆r tơring hơdăh tơpăt hơtŏ hơnơ̆ng, bơ̆ jang ‘lơ̆ng tơgŭm ăn kon pơlei. Tơdăh dang ei ưh kơ pơih să trong bơ̆ jang kơ Jơnŭm vei lăng kon pơlei lei jei tôch tơnap tap”.

Iung pơma tơ̆ jơ pơma dơnuh, Kơdră chĕp pơgơ̆r Kuô̆k hô̆i Trần Thanh Mẫn athei hơnih bơ̆ jang chih tơlĕch păng hơnih jang dăr lăng hơnơ̆ng lăng hơlen, tơlĕch jang keh đang hloi tơdrong pơjao gơ̆h jang, vă đơ̆ng rŏng trong vă pơjing khôi luơ̆t đei Kuô̆k hô̆i pơdrơ̆ng nơ̆r, rim tơring iung jang kiơ̆ hloi: “Kiơ̆ kơ ĭnh bơ̆n kăl lăng hơlen mă brĕ hloh dơ̆ng. Đơ̆ng dang ei truh Kuô̆k hô̆i pơdrơ̆ng kiơ̆ tơdrong yă kiơ mă Khul kơdră chĕp pơghơ̆r Teh đak hơnơ̆ng pơjao ăn tơring lơ̆m Khôi luơ̆t ou ‘noh bơ̆n hơlen mă brĕ vă ning nai kai ning mônh mưh pơdrơ̆ng bơih ‘noh tơring pă gơh vă pơma akhan ưh kơ gơh kơjang kơ yuơ pơjoăl. Khôi luơ̆t hơlen ‘noh đei pơih să pơjao ăn Khul kơdră chĕp pơgơ̆r teh đak tơchơ̆t ưh kơ glăi hăm Khôi luơ̆t Tơm teh đak vă kơ bơ̆n tơlĕch jang kiơ̆ ăn khul bơ̆ jang iung jang kiơ̆”.

Jei lơ̆m ‘măng hop akŏm giĕng ou ki, Hơnih bơ̆ jang chĕp pơgơ̆r Kuô̆k hô̆i hlôi pơdrơ̆ng kiơ̆ Tơdrong tơchơ̆t hơmet ming Apăng 10 kơ Tơdrong tơchơ̆t Măt bơngai kon pơlei. Kiơ̆ kơ ‘noh, rim klo hơkăn, rim bơngai gơ̆h ‘meh vă đei kon hơ ‘lơ̆p khei ‘năr ayơ, đei kon hơ ‘lơ̆p dôm yơ păng đei kon hơ ‘lơ̆p tơtil hloi dăh mă đunh sơnăm, găh tơdrong pran jăng, tơdrong hŏk pơhrăm, tơdrong jang, bơ̆ jang, jang sa iŏk đei păng rong ‘me kon hơ ‘lơ̆p kơ rim bơngai, rim ŭnh om ‘moi kiơ̆ hơtŏ hơnơ̆ng lei lăi dih băl.