‘Măng pơlong lĕch ‘măng khoă jăl pêng 3 sơnăm ‘nou dêh char Kon Tum đei hlŏh 5.300 ‘nu hŏk tro chih măt vang pơlong, lơ̆m noh đei vă jê̆ 1.800 ‘nu hŏk tro jĭ bơngai kon kông. Vă pơm ‘lơ̆ng ăn tơdrong pơlong adoi nhen hơtŏk măt bơngai hŏk tro pơlong kĕ, dôm hnam trương găh tơring hơtăih yăih păng dôm hnam trương teh đak rong ‘me hŏk tro kon kông lơ̆m dêh char tŏk bŏk lơ̆m jơ năr hŏk pơhrăm ming tôch kơtang, pơtho tơbăt ăn đe hŏk tro băt pơm rim ƀai pơlong. Tŏk bŏk lơ̆m jơ ‘năr hơdro hơsi glơ gleng, 36 ‘nu hŏk tro lăm 12A3 Hnam trương teh đak rong ‘me apŭng Tu Mrông oei hơ ngŭr hŏk pơhrăm ming ƀai hŏk Địa lí. Jơ hŏk pơhrăm ming năr ou rim đe oh hŏk tro đei ƀok thây kô pơtho pơm ƀai hơlen lăng kơsô̆ 1 kơ Hơnih vei lăng hnam trương pơtho pơhrăm dêh char tơlĕch ăn. Oh Y Diễm, tơbăt:“Kiơ̆ kơ ĭnh ƀôh mĭnh ƀar ƀai pơlong mă đe ƀok thây kô tơlĕch ăn jei tơchă ƀôh tôch mơmat tat tơpă mơ̆n. Mălei jei tơchă hơlen băt mơ̆n ‘noh apĭnh ƀok thây kô, tơchă lăng lơ̆m mạng dăh mă năm mơng kơsơ̆ hla bơar tơ̆ hơnih mong răk kơsơ̆p hla bơar apŭng vă chă đŏk lăng”.

Oh Y Thiệp, hŏk tro lăm 12A2, tơbăt oh hăm rim boăl đei ƀok thây kô chă pơtho ăn băt hơdăh dôm trong pơlong kơna sơđơ̆ng jơhngơ̆m năm pơlong kiơ̆ trong hle: “ ‘Nou ‘măng pơlong mă blŭng mă Hơnih tơm vei lăng Hnam trương pơtho pơhrăm tơplih ƀai pơlong. Pŭn ai ‘noh ĭnh đei ƀok thây chă pơtho ăn tôch phăl hơlăng păng tơlĕch ăn chă pơlong lăng đơ̆ng sơnăm hŏk lăm 11 hloi. Rim ƀai pơlong đe ƀok thây kô ăn kơ nhôn chă pơlong kiơ̆ trong pơlong hle ou. ‘Nao hloh ‘noh ‘măng pơlong năng pơlong lĕch ‘măng khoă jăl pêng hnam trương adoi nhen ăn nhôn chă pơlong lăng kiơ̆ trong pơlong hle ou. Ba jei pơm kiơ̆ lơ ‘măng kơna jei ưh kơ măh tơnap yă kiơ mơ̆n”.

‘Măng pơlong lĕch ‘măng khoă jăl pêng sơnăm ou Hnam trương teh đak rong ‘me apŭng Tu Mrông, dêh char Kon Tum đei 110 ‘nu hŏk tro chih măt năm pơlong păng đĭ đăng ‘noh kôn mon kon sou bơngai kon kông ngăl. Vă kơ rim đe oh băt hlôh dôm tơdrong hŏk pơhrăm, trong pơm ƀai lơ liơ ‘noh hnam trương hlôi klăh asong pơjing 3 khul. Khul hŏk ưh kơ gan gơh; Khul hŏk gơh ƀiơ̆ păng Khul hŏk gơ̆h vă pơtho pơhrăm ming. Ƀok thây pơtho Văn Trọng Lưu, Kơdră chĕp pơgơ̆r Hnam trương jăl pêng teh đak rong ‘me apŭng Tu Mrông tơbăt, jơ ‘năr vă jê̆ truh hnam trương tơlĕch iung jang kơtang pơtho ming dơ̆ng ăn đe hŏk tro:“Nhôn hơnơ̆ng iung jang rim tơdrong pơtho pơhrăm ming mă ‘lơ̆ng păng pơgơ̆r ăn pơm ƀai vă hơlen lăng đe oh gơh pơm dang yơ đơ̆ng noh pơtho pơhrăm ming dơ̆ng vă đe oh băt pơm ƀai. Mă hơdăh ‘noh kăl chă đŏk, hlôh vao vă pơm ƀai ƀlep hloh. Lơ̆m jơ pơtho hŏk pơhrăm ming ‘noh hnam trương pơjing rơvơn hloh vei lăng năng tông hơrih sa, jơhngơ̆m đon ăn rim đe oh păng ăn ƀok thây kô pơtho chă pơtho ming”.

Tơ̆ Dak Lăk, hơnih vei lăng Hnam trương pơtho pơhrămtŏk bŏk iung jang keh đang rim trong hơmet ăn muk drăm păng bơngai bơ̆ jang vă sơđơ̆ng ăn ‘măng pơlong sơđơ̆ng, trŏ ƀlep păng trŏ lăp hăm tơdrong pơkoel găh ‘măng pơlong kiơ̆ trong pơtho pơhrăm sơnăm 2018. Dak Lăk pơjing 1 jơnŭm vei lăng pơlong, hăm 53 hơnih pơlong păng 948 lăm pơlong đei hơmet ăn tơ̆ rim hnam trương jăl pêng păng Hơnih tơm pơtho pơhrăm thường xuyên lơ̆m dêh char. Akŏp măt bơngai hŏk tro chih hơnăn năm pơlong hloh 22.600 ‘nu hŏk tro, lơ̆m ou đei hloh 530 ‘nu hŏk tro kơdih năm pơlong hăm jơnŭm vei lăng pơlong pha.

Truh dang ei, bơ̆ jang dăr lăng păng hơmet ăn dôm tơmam drăm tơ̆ rim hơnih pơlong hlôi jang keh đang. Bơ̆ jang vei lăng rơgoh cham char, sơđơ̆ng rơgoh tơmam drăm sa, tơdrong jang pơgang păng trong jang vei lăng sơđơ̆ng, vei lăng trong nơnăm jei đei rim hơnih bơ̆ jang iung jang hơdoi kơjăp ‘lơ̆ng. Atŭm hăm ‘noh, Hơnih vei lăng Hnam trương pơtho pơhrăm dêh char Dak Lăk hlôi pơgơ̆r rim lăm pơtho ming tơdrong jang ăn hloh 2.200 ‘nu kang ƀô̆, ƀok thây kô, bơngai jang đei krao hơvơn vang iung jang lăng pơlong.

Tơdrong pơhrăm akŏm lơ̆m dôm tơdrong ‘nao lơ̆m tơdrong tơchơ̆t pơlong sơnăm ou, pơtho tơbăt hơmet pơ ‘lơ̆ng dôm tơdrong đei ƀôh pơm glăi lơ̆m lăng pơlong, adoi nhen iŏk yua phân mêm vei lăng pơlong, sơđơ̆ng jang kiơ̆ ƀlep trong jang păng tơdrong kih thuơ̆t. Yă Lê Thị Thanh Xuân - Kơdră chĕp pơgơ̆r Hơnih vei lăng Hnam trương pơtho pơhrăm dêh char Dak Lăk tơbăt:“Nhôn tơlĕch jang pơtho pơhrăm ming tơdrong jang ăn bơ̆ jang lăng pơlong, dăr lăng pơlong kiơ̆ trong kơtă hloi păng pơgơ̆r trư̆k tuyên truh hăm rim ƀok thây kô păng bơngai jang, rim kang ƀô̆ bơ̆ jang lơ̆m Jơnŭm lăng pơlong vă rim bơngai băt hơdăh tơdrong tơchơ̆t, tơdrong jang kơna jang kiơ̆ ƀlep tơpăt, sơđơ̆ng, trŏ lăp păng hơtŏ hơnơ̆ng”.

‘Măng pơlong lĕch ‘măng khoă jăl pêng sơnăm ou jing jơ ‘nar gĭt kăl hloh hăm rơbou ‘nu hŏk tro tơ̆ Kon Tum păng Dak Lăk, mă kăl hăm đe oh hok tro kon kông oei tơ̆ tơring tơtăih yăih. Tơdrong hơdrin đĭ ai đơ̆ng hŏk tro atŭm hăm tơdrong hơdrin đơ̆ng ƀok thây kô păng hơnih pơtho pơhrăm lơ̆m tơdrong hơmet ăn tơdrong hlôh vao, hơnih pơgơ̆r ‘noh hơyak kơjăp iăp kơtang hloh vă ‘măng pơlong đei pơgơ̆r sơđơ̆ng, tơpăt păng jơnei kơtang.