Ƀlep ƀât tơbăt 10 sơnăm pơjing Grŭp bơngai tang măt Quốc hội oei mơlôh Việt Nam (đơ̆ng sơnăm 2015-2025), kơsơ̆ ‘năr 24/6, tơ̆ Anih jang kơ Trung ương Đảng, Tổng Bí thư Tô Lâm hlôi tơƀâp Grŭp bơngai tang măt Quốc hội oei mơlôh jăl XV. Tổng Bí thư pơma hơdăh, Hop akŏm Đảng jơ̆p tơring năm truh hop akŏm Bơngai tang măt lơ̆m teh đak ‘măng mă XIV kơ Đảng, jĭ tơdrong jang tôch gĭt kăl, vă hơlen năng tơ̆ yăn âu, chih hơmet nơ̆r tơblang hai, vă chă rơih đe kăn ƀô̆ rơgei, đei jơhngâm đon ‘lơ̆ng ăn chăl ‘nao hai.

Khul tang măt Quốc hội oei mơlôh hơnơ̆ng tơgop nơ̆r ăn dôm hla ar chih kăl, roi tơbăt dôm tơdrong đei tơ̆ yăn âu păng tơlĕch dôm trong jang tŏk gĭt kăl vă pơgơ̆r bơ̆ jang, vei lăng tơpôl, jang tŏk pran kơjăp, vei lăng dôm tơdrong krê ‘nao đei. Vă bơ̆ jang đei hơnăp jang gĭt kăl đơ̆ng kơdih, Tổng Bí thư pơma hơdăh, rim bơngai tang măt Quốc hội oei mơlôh athei hơnơ̆ng lăng hơlen kơdih kâu, pơtâp pơhrăm, hŏk iŏk đơ̆ng đe nai păng hơnơ̆ng bơ̆ jang plang đĭ jơhngâm. Dôm bơngai tang măt Quốc hội oei mơlôh athei vei kơjăp jơhngâm đon jang kăch mang, mĭnh jơhngâm hăm Đảng, hăm teh đak păng kon pơlei; hơtŏk hơnăp jang tưk tơiung jơhngâm đon tơplih ‘nao, ưh đei hli tơ̆ hơnăp tơdrong pơmat tat, ưh đei đon pơvĕr vă đei yoa ăn kơdih, ưh đei hŭt hơkâu tơ̆ hơnăp tơdrong pơlung găh tơmam drăm, jên hu; pơ̆n tơchĕng pơ̆n jang, pơ̆n tơplih ‘nao, pơ̆n chĭu pŭ.