‘Măng hop akŏm hlôi ăn tơgop nơ̆r găh 8 tơdrong. Mă kăl ‘noh găh tơdrong vă pơjing Hla bơar tơbăt pơtôch bơ̆ jang dăr lăng tơdrong jang:“Tơdrong jang kiơ̆ trong bơ̆ jang, khôi luơ̆t găh atŏk tơ iung păng iŏk yoa khul bơ̆ jang trŏ lăp hăm tơdrong ‘meh vă atŏk tơ iung mŭk drăm-tơpôl, mă kăl ‘noh khul bơ̆ jang hơgei”; hơmet ming Tơdrong jang pơjing khôi luơ̆t tơm teh đak sơnăm 2025; ăn tơgop nơ̆r găh pơgơ̆r pơtôch Hop akŏm mă 9 păng ăn tơgop nơ̆r ‘măng mă blŭng tơdrong hơmet ăn ‘Măng hop akŏm mă 10...

Hơnih bơ̆ jang chĕp pơgơ̆r Kuô̆k hô̆i jei lăng hơlen, pơdrơ̆ng kiơ̆ 3 tơdrong tơchơ̆t đei: Tơdrong tơchơ̆t hơmet ming, tơmơ̆t dơ̆ng mĭnh ƀar apăng kơ Tơdrong pơkăp bơ̆ jang kơ Hơnih bơ̆ jang chĕp pơgơ̆r Kuô̆k hô̆i; Tơdrong tơchơ̆t găh tơlĕch kon jên jang pơgơ̆r păng bơ̆ jang kơ ƀao hiêm tơpôl, ƀao hiêm hiong tơdrong jang jăl jang 2025-2027; Tơdrong tơchơ̆t găh trong pơkăp, sơkơ̆t hơdăh tơmơ̆t dơ̆ng kon jên bơ̆ jang kơ kon jên bơ̆ jang teh đak sơnăm 2026.

Kơdră chĕp pơgơ̆r Kuô̆k hô̆i Trần Thanh Mẫn tơbăt, ‘măng hop akŏm, đei pơgơ̆r đơ̆ng rŏng ‘Măng hop akŏm mă 9 kơ Kuô̆k hô̆i jơnei ‘lơ̆ng liĕm. ‘Măng hop akom hlôi pơdrơ̆ng kiơ̆ Tơdrong tơchơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t tơm teh đak sơnăm 2013; pơdrơ̆ng kiơ̆ 34 khôi luơ̆t, 34 Tơdrong tơchơ̆t. Dang ei rim kơdră tang măt Kuô̆k hô̆i tŏk bŏk jang kiơ̆ ‘măng năm tơƀơ̆p pơma dơnuh hăm bơngai tăh hla tơ̆ 34 dêh char, pơlei tơm lơ̆m teh đak. Mă kăl, lăp đơ̆ng rŏng Hop akŏm mă 9, Kuô̆k hô̆i, Khul kơdră chĕp pơgơ̆r Teh đak, rim Hơnih tơm, hơnih bơ̆ jang păng rim tơring tơlĕch iung jang hloi tơdrong bơ̆ jang, mă kăl tơdrong jang kiơ̆ khul kơdră chĕp pơgơ̆r tơring 2 kâp.

Kiơ̆ đơ̆ng Kơdră chĕp pơgơ̆r Kuô̆k hô̆i, tơdrong tơgop nơ̆r ‘măng blŭng găh trong bơ̆ jang pơjing Hla bơar tơbăt pơtôch bơ̆ jang dăr lăng tơdrong jang: “Tơdrong jang kiơ̆ trong bơ̆ jang, khôi luơ̆t găh atŏk tơ iung păng iŏk yoa khul bơ̆ jang trŏ lăp hăm ‘meh vă atŏk tơ iung mŭk drăm-tơpôl, mă kăl khul bơ̆ jang hơgei” jĭ tôch kơ trŏ lăp, mĭnh păh đei tơdrong kăl lơ̆m khei ‘năr teh đak bơ̆n tŏk bŏk yak mơ̆t lơ̆m jăl atŏk tơ iung ‘nao, kăl đei khul bơ̆ jang hơgei pơjing hơyak pran ăn tŏk kơtang păng kơjăp ‘lơ̆ng.

Khei năr ou kơnh, Hơnih tơm Chinh trĭ jei gô pơjing rim Tơdrong tơchơ̆t akŏm ăn atŏk tơ iung pơtho pơhrăm păng lơ̆m tơdrong jang vei lăng năng tông jơhngơ̆m pran jăng grăng akou ăn kon pơlei. Ou ki, Kuô̆k hô̆i hlôi pơdrơ̆ng kiơ̆ 3 Tơdrong tơchơ̆t kăl găh tơdrong jang khoa hŏk, tơplih ‘nao tơchăr, tơplih kơsô̆; Tơdrong tơchơ̆t găh tơplih ‘nao bơ̆ jang tơ iung pơjing păng jang kiơ̆ khôi luơ̆t trŏ lăp hăm tơdrong atŏk tơ iung teh đak lơ̆m chăl ‘nao; Tơdrong tơchơ̆t găh atŏk tơ iung Mŭk drăm ŭnh hnam.

‘Ngoăih kơ ‘noh, tơ̆ hop akŏ mă 9, Kuô̆k hô̆i hlôi pơdrơ̆ng kiơ̆ Khôi luơ̆t Ƀok thây pơtho, Tơdrong tơchơ̆t găh tưh kơ iŏk jên, tơgŭm djru kon jên hŏk pơhrăm ăn đe hơ ioh mâm non, hŏk tro. Khul kơdrqă teh đak pơjing Tơdrong tơchơ̆t găh tơdrong vei lăng năng tông ăn hŏk tro oei tơ̆ tơring groi kông... 

Găh tơdrong lăng hơlen hơmet ming Tơdrong jang pơjing khôi luơ̆t sơnăm 2025, Kơdră chĕp pơgơ̆r Kuô̆k hô̆i athei lăng kơjăp kiơ̆ dôm tơdrong ‘meh vă yan ou. Kơdră chĕp pơgơ̆r Kuô̆k hô̆i Trần Thanh Mẫn pơma hơdăh, sơnăm 2025, tơdrong jang pơjing khôi luơ̆t kăl trŏ lăp hăm tơdrong ‘meh vă atŏk kơtang hơmet pơ ‘lơ̆ng tơnap tap, tơhlăk tơhlĭn lơ̆m tơdrong jang mŭk drăm-tơpôl, vei lăng sơđơ̆ng teh đak, sơđơ̆ng tơring adoi nhen tơ iung pơjing khul kơdră chĕp pơgơ̆r tơring 2 kâp:“Đơ̆ng rŏng rim ‘măng hop akom, bơ̆n kăl iung jang lăng hơlen, hop akŏm pơtôch tôm tong, đơ̆ng noh, hơlen brĕ dôm tơdrong yă kiơ kăl hơnơ̆ng iung jang kiơ̆, tơplih ‘nao vă hơnhăk đei jơnei kơjăp, pơjing đei hơyak pran lơ̆m bơ̆ jang kơ Kuô̆k hô̆i. ‘Măng hop akŏm mă 10 ‘noh ‘măng hop akŏm hơtuch jăl jang, jang keh đang dôm tơdrong jang hlôi tơlĕch ăn, adoi pơjing đei hơyak ‘lơ̆ng ăn jăl jang truh ou kơnh. Hăm tơdrong kăl lơ lou, tơdrong hơmet ăn kăl mă trŏ lăp ‘lơ̆ng, iung jang hloi tơplih ‘nao kơtang pơđĭ trong tơlĕch jang, iung jang kiơ̆ păng tơdrong ‘lơ̆ng vă sơkơ̆t hơdăh hơnăp jang pơchoh trong, pơjing ăn đơ̆ng Kuô̆k hô̆i păng Khul kơdră chĕp pơgơ̆r Teh đak”.

Kơdră chĕp pơgơ̆r Kuô̆k hô̆i akhan, khei năr kơnh ‘noh dôm khei ‘năr tuch luch kơ jăl jang Kuô̆k hô̆i jăl XV hăm tơdrong bơ̆ jang tôch kơ tih tên, lơ tơdrong jang chinh trĭ gĭt kăl hloh, hăm tơdrong pơkoel kơtang păng sơnong jang tih tên hloh. Kơ yuơ lơ loh, rim hơnih bơ̆ jang kơ Kuô̆k hô̆i kăl iung jang hơdoi kơjăp hăm Khul kơdră chĕp pơgơ̆r Teh đak, rim hơnih bơ̆ jang ƀơm truh, akŏm jang keh đang rim tơdrong jang hlôi pơjao lơ̆m tơdrong bơ̆ jang, trong pơprŏ jang hlôi tơlĕch ăn lơ̆m sơnăm 2025 păng pơđĭ jăl jang jăl XV. Adoi iung jang kiơ̆ ƀlep nơ̆r pơrô̆ jang đơ̆ng kơdră kơpal, iung jang hloi chă hơlen păng tơlĕch jang kiơ̆ hloi rim tơdrong jang hle, adoi, tĕnh koăng hơmet ăn dôm tơdrong pơtruh ăn Hơnih bơ̆ jang chĕp pơgơ̆r Kuô̆k hô̆i sơđơ̆ng ƀlep trong tơlĕch ăn, ƀlep ‘lơ̆ng, veh ver kơrŭn iung jang kơtang lơ̆m vă jê̆ dôm jơ ‘năr pơgơ̆r hop akŏm.