Lơ̆m hơnă hnam so oei hơkơ̆p hơkăp đơ̆ng rŏng đak jroh pơm ăn hnam hơlih, ‘nhŏng Nguyễn Thế Kiên (thôn Chánh Hữu, tơring Ngô Mây, dêh char Gia Lai) mơdŭk atŭm hăm kang ƀô̆, ƀô̆ đô̆i Hnam trương Quân sự (Quân đoàn 34) pơm jrăng pơsei, hơmet ăn tuh chuơ̆h tơmo jrăng man ăn pơbŭng hnam ‘nao.

Kial hơbŭt kơsô̆ 13 pơm ăn hnam Kiên hlơk pơbŭng. Tim tom hơmet ‘noh đak lŏk hlôi jrŏh pơm ăn hnam hơlih hloi. Đei Teh đak tơgŭm ăn 60 triu hlak jên, đei ƀô̆ đô̆i tơgŭm ming man. ‘nhŏng tơchơ̆t chă tŏk iŏk dơ̆ng 40 triu hlak jên vă kơ tôm 100 triu hlak jên ming man hnam kơjăp ƀiơ̆. ‘Nhŏng Nguyễn Thế Kiên tơbăt, pơbŭng hnam oei ‘nao gô đei să 30m2 ming man kơjăp ‘lơ̆ng:“Đe mih ma ƀô̆ đô̆i jĭ tôch tơnăp. Ƀô̆ đô̆i tơgŭm klo hơkăn nhi pơm hnam kơjăp ‘lơ̆ng hloh kơ hnam so. Dang ei pơm hnam tuh man jrăng kơna kơjăp hloh hnam so bơih. Dang ei ba răt mam pơm hơdrơ̆r tơ̆ kơpal, mưh đei ‘mi kial đak lip ‘noh tŏk oei tơ̆ kơpal, pă đei chă pơbŭ tơmam drăm năm oei tơ̆ nai bơih.”

Jei tơ̆ thôn Chánh Hữu, ƀô̆ đô̆i Hnam trương Quân sự Quân đoàn 34 tŏk bŏk tơgum djru ŭnh hnam ‘nhŏng Ngô Đình Vị man hnam. Pơbŭng hnam tơ̆ koeng, trong chhep chhop, teh thŭng kơna ƀô̆ đô̆i hlôi chơ teh hơtŏk drơ̆h kơjung vă kơ hoei đak lip. ‘Nou gô jing pơbŭng hnam tôch ‘lơ̆ng liĕm, kơ yuơ ‘ngoăih 60 triu hlak jên đơ̆ng teh đak tơgŭm ăn, ‘nhŏng hlôi mong răk đei 120 triu hlak jên vă răt tơmam drăm ming man, găh đe ƀô̆ đô̆i tơgŭm ming man ăn. Jĭ bơngai joăt jang man hnam ‘nhŏng Vị vang iung jang hơdoi tôch hơbĕch hơbal lơ̆m ming man hnam. ‘Nhŏng pơma:“Ƀôh đe mih ma tŏ ‘mi tôn pă pơdơ̆h mơnat dêh. ‘năr ‘mi, ĭnh athei đe ma ƀô̆ đô̆i pơdơ̆h ‘mơ̆i, mă lei oei kơsu ao ‘mi jang hơnơ̆ng. Đe mih ma ưh kơ chă sŏng sa nhă đak bơ̆n. Đe mih ma vang tơgum djru ŭnh hnam bơ̆n, ba chhôk dêh. Ŭnh hnam hơvơ̆h yă kiơ, đe sư jang yă ‘noh. Rŏ năng, lơ̆m 45 năr pơm keh đang hnam ‘nou bơih.”

Lơ̆m "Iung jang Quang Trung" ‘măng mă ou, Quân đoàn 34 đei pơjao ming man 70 tŏ hnam tơ̆ tơring đak hơbông đak lip pơrăm tơ̆ dêh char Gia Lai păng 30 pơbŭng hnam tơ̆ tơring ‘mi kial pơrăm tơ̆ Dak Lăk.

Lăp đơ̆ng rŏng iŏk đei nơr athei, hloh 600 ‘nu kang ƀô̆, ƀô̆ đô̆i atŭm hăm lơ kmăi kmŏk, gre hlôi iung yak năm truh tơ̆ tơring, pơjao khul jang iŏk jang dôm tơdrong, iung jang hơdoi hăm kơdră tơring păng ŭnh hnam kon pơlei vă tĕnh koăng dăr lăng, pơjing trong jang păng pơgơ̆r jang ming man hloi.

Đại tá Phạm Hồng Sơn, Kơ iĕng Kơdră jang chĭnh trĭ Hnam trương Quân sự Quân đoàn 34 iŏk jang tơ̆ tơring Ngô Mây, dêh char Gia Lai tơbăt:  đĭ đăng khul jei đei ăn iung năm jang vă iung jang ming man keh đang. Quân đoàn 34 tơlech trong jang ming man keh đang rim hnam oei hơdrol kơ năr 20/1/2026, tơgŭm ăn kon pơlei hrôih sơđơ̆ng hơrih sa păng tom sơng Têt lơ̆m pơbŭng hnam ‘nao.“Găh trong proh hơmet vă pơm hnam ‘noh kơdră tơring hăm ŭnh hnam iŏk jang, găh hơnih ou iŏk jang ming man păng khul chă tung pơdŭ tơmam drăm ming man. Tơdrong sŏng sa ‘noh hơnih ou chă pơvih pơvăn kiơ̆ ƀlep tơdrong pơkăp khul ƀô̆ đô̆i. Nhôn proh hơmet pai por ‘nhot mĭnh hơnih đơ̆ng noh klăh asong năm ba truh tơ̆ rim khul ming man hnam kon pơlei vă ‘nhŏng oh sŏng sa, sơđơ̆ng jơhngơ̆m pran jăng grăng akou vă iung jang ‘lơ̆ng keh đang tơdrong jang kơdih.”

Hăm dôm ŭnh hnam ‘nao răm đơ̆ng ‘mi kial pơrăm, dôm pơbŭng hnam kơjăp ‘lơ̆ng tŏk bŏk roi năr vă keh đang ưh khan lăp hơdrô̆ hơnih oei ‘nao, mă oei jing hơnih gơnang kơtang jơhngơ̆m đon tơgŭm ăn pơm dă ƀiơ̆ tơdrong ưh sơ ‘ngon, hiong răm kơ yuơ đơ̆ng ‘mi kial pơrăm. Tơ̆ rim tơnăr, rim pơbŭng hnam jei đei đak pơ uh pơ ang păng jơhngơ̆m đon kơ rim Ƀô̆ đô̆i Ƀok Hô, mĭnh ‘măng dơ̆ng sơkơ̆t hơdăh jơhngơm đon ‘mêm kơ eng dih băl ƀô̆ đô̆i-kon pơlei kơjăp ‘lơ̆ng păng lơ̆m khei ‘năr đei tơdrong, ưh kơ đei bơngai bu hơchăng hŭt tơ̆ rŏng.