Gru kơnăl hơdah kơ jăl jang Kuô̆k hô̆i jăl 15 jĭ tơdrong chih akŏm khôi luơ̆t hăm tơdrong tơplih 'nao pran kơtang gah đon tơchĕng, hơnhăk trong pơkăp jang jing tơdrong tơgar jang. Mă kăl noh tơplih hơmet minh ƀar tơdrong lơ̆m Khôi luơ̆t 2013 pơm trong dơnơm vă pơm jang jơnŭm pơgơ̆r tơring 2 tăl, hơtŏk asong sơnong pơgơ̆r. Bơnê kơ tơdrong đei jơnei noh, bơngai tang măt Nguyễn Thị Thủy, khul Thái Nguyên hơpơi 'meh: “Vă pơtoi pơm kiơ̆ tơdrong tơplih 'nao đon tơchĕng lơ̆m chih akŏm khôi luơ̆t hăm tơdrong tơchơ̆t hơdrô̆ gah tơdrong tơm, dôm tơdrong pơkăp hơdah gah trong pơm jang gô oei lơ̆m tơchơ̆t đơ̆ng Jơnŭm pơgơ̆r teh đak. Kơyuơ noh, nhôn pơtruh nơ̆r hăm Jơnŭm pơgơ̆r teh đak lơ̆m chih akŏm, hăm dôm trong pơkăp jang athei đei pơm jang lang să, pơtruh hăm Jơnŭm pơgơ̆r teh đak iŏk nơ̆r tơgop 'mơ̆i hơdrol kơ tơbang Tơchơ̆t”.

Kiơ̆ bơngai tang măt Dương Khắc Mai, khul Lâm Đồng, lơ̆m jăl jang truh, tơdrong tơm ưh kơsĭ tơbang lơ luơ̆t mă kăl tơplih kơtang gah tơdrong sơđơ̆ng, gơh jang, tơroi hơdrol gah jên huach trŏ ƀlep hăm dôm hla bar chih luơ̆t. Mă kăl, athei hơtŏk hơlen kơpal đei tơlĕch jang kăl hloh kơ layơ, ah lơ tơdrong đei ƀôh kăl, athei hơlen mă tơnăp păng sek tơlang mă keh: “Khei năr truh, tơdrong kăl gĭt kơ tơchơ̆t noh athei pơtoi keh đang trong jang vă hơlen, pơgơ̆r păng hơlen lăng dơ̆ng dôm pơkăp, pơtruh đơ̆ng rŏng kơ hơlen. Tơpă ăn ƀôh, mưh gah tơdrong hơlen ưh đei pơgơ̆r pơm jang drơ̆ng minh, kơjăp noh tơdrong pơm kiơ̆ tơpă kơ tơdrong jang hơlen oei tơjruh păng tam mă kơtang ôh. Kơyuơ noh, inh pơtruh nơ̆r hla bar kăl tơroi tơbăt athei tơdrong hơdah hloh tơdrong ou lơ̆m pơkăp trong jang ăn jăl jang truh ou kơnh păng lăng ou jĭ minh lơ̆m dôm tơdrong tơm vă hơtŏk jang đei jơnei tơdrong jang hơlen đơ̆ng Kuô̆k hô̆i”.

Ră hơdah jăl jang Kuô̆k hô̆i jăl 15 hlôi đei lơ tơchơ̆t kăp gĭt, tơrĕk kơtă truh tơdrong hơtŏk mŭk drăm tơpôl, pơjao dôm trong pơm jang kăp gĭt, mă kăl noh lơ̆m ming man trong nơnăm, ăn dôm tơdrong tơchơ̆t jang kơ teh đak păng jang hơdrol minh ƀar trong jang kăp gĭt hơtŏk tơ-iung 10 dêh char, pơlei tơm, bơngai tang măt Tô Ái Vang, khul Cần Thơ pơtruh nơ̆r: “Pơjao ăn Jơnŭm pơgơ̆r teh đak hơlen lăng, sơkơ̆t tơdrong jang đei jơnei đơ̆ng pơm jang dôm Tơchơ̆t dơnơm, trong pơkăp jang, kăl pơm hơdah, trong pơkăp jang ayơ tơpă pơyua lơ hloh, pơjing trong jang kơtang, trong pơkăp jang ayơ tam mă tơnăp păng tơroi tơdrong tơm kơlih kiơ vă sơkơ̆t đei trong jang tơtom ăn jăl jang đơ̆ng rŏng, tang găn pơjing tơdrong lê̆ hoh păng huach jơhngơ̆m jang. Tơdrong pơjao păng iŏk jang đơ̆ng 2 jăl jang Kuô̆k hô̆i athei vei sơđơ̆ng pơtoi băl lơ̆m pơm kiơ̆ dôm Tơchơ̆t, pơm ăn dôm trong pơkăp jang jing jơhngơ̆m pran vă hơtŏk mŭk drăm tơpôl tơpă ăn dôm tơring păng jơ̆p teh đak”.

Hăm tơroi gah tơdrong jang lơ̆m jăl jang 2021-2026 đơ̆ng jơnŭm pơgơ̆r teh đak, rim bơngai tang măt sơkơ̆t hơdah, lơ̆m khei năr tơpôl lơ̆m teh đak păng lơ̆m apŭng plenh teh đei lơ tơsŭl tơsăl, mă lei hăm tơchơ̆t khŏm mă jang đei, pơm jang ưh đei pơdơh, hơbĕch hơbal lơ̆m pơgơ̆r jang, Jơnŭm pơgơ̆r teh đak hlôi keh đang lơ pơkăp tơlĕch jang, dôm Tơchơ̆t đơ̆ng Kuô̆k hô̆i tơlĕch. Tơdrong hơmet hơtŏk mŭk drăm tơpôl, hơvơn asong jang đei tơrĕk, yak atŭm hăm hơmet dôm tơdrong jang mŭk drăm kơ Teh đak lơ̆m lơ sơnăm "pơdơh ưh đei pơm jang" vă gơh đei cheh. Tơbang tơdrong hơpơi 'meh ăn jăl jang truh ou kơnh, bơngai tang măt Trần Hoàng Ngân, khul  pơlei tơm Hồ Chí Minh pơtruh nơ̆r: “Yak ah jăl jang anglŏ sơnăm 'nao, tơchơ̆t kơjung hloh păng kăl hloh mă lei bơ̆n athei jang mă đei jơnei. Inh pơtruh nơ̆r Jơnŭm pơgơ̆r teh đak athei tơrĕk atŭm hăm hơtŏk tenh vei sơđơ̆ng kơjăp đunh khei năr, mă kăl athei tơrĕk truh tơdrong sơđơ̆ng gah mŭk drăm păng tŏ 'mi kial tơplih dang ei vă asong jang ăn teh đak, hơtŏk jang mŭk drăm tơpôl đei jơnei sơđơ̆ng, dah hrôih hơmet, pơm 'nao trong gre treng oei đei dang ei”.

Dôm nơ̆r tơgop kăp gĭt, tơnăp đơ̆ng rim bơngai tang măt ăn Kuô̆k hô̆i ăn ƀôh, pơkăp pơtoi tơplih 'nao pran kơtang lơ̆m chih akŏm khôi luơ̆t, hơlen păng pơgơ̆r jang, vă pơtrŏ tơnăp hloh tơdrong tơchơ̆t hơtŏk tơ-iung teh đak lơ̆m jăl jang 'nao. Rim bơngai tang măt hơpơi 'meh đơ̆ng dôm tơdrong tơm hlôi đei pơjing lơ̆m jăl jang Kuô̆k hô̆i jăl 15 gô đei pơtoi iŏk yua, keh đang păng hơtŏk, vă rim tơchơ̆t jang ah tơbang adoi đei tơmơ̆t iŏk yua lơ̆m tơdrong hơrih.