Tơ̆ tơring groi kông Pà Cò, dêh char Phú Thọ, ƀok Sùng A Chênh, Bí thư Đảng tơring, Kơdră chĕp pơgơ̆r Jơnŭm vei lăng kon pơlei tơring tơbăt: Bơ̆ jang kang ƀô̆ đei Hơnih Đảng tơring sơkơ̆t hơdăh ‘noh jĭ tơdrong jang tơm hloh, kăl hloh. Lăp đơ̆ng rŏng hơgrop tơring, tơring hlôi iung jang dăr lăng, lăng hơlen dơ̆ng khul kang ƀô̆ păng đei trong proh hơmet ăn tơdrong jang trŏ lăp hăm gơ̆h jang mưh jang kiơ̆ trong bơ̆ jang khul kơdră tơklep, tơjê̆ hăm kon pơlei. “Vă trŏ lăp hăm khei ‘năr iung jang đunh đai păng sơđơ̆ng tơdrong khul kơdră chĕp pơgơ̆r 2 kâp bơ̆ jang ‘lơ̆ng, khei năr kơnh hăm tơring hơtăih yăih nhôn apĭnh dêh char, Trung ương đei trong jang tơgum djru pơtrŭt kang ƀô̆ năm bơ̆ jang tơ̆ tơring kon kông, tơring atăih yăih lơ̆m rim tơdrong jang nhen jang kmăi kmŏk kơtơ̆ng ang, bơ̆ jang vei lăng groi teh, oei sa joh ayŏ tơpôl …, ‘noh dôm khul mă tơring ‘meh vă hloh”.

Tơgŭm djru pơtho pơjing kang ƀô̆ bơngai kon kông, tơgăl hăm tơdrong ‘meh vă tơplih ‘nao kang ƀô̆ gơh hơgei đơ̆ng tơring hloi ‘noh hơyak kăl hloh vă tơring groi kông, tơring kon pơlei kon kông atŏk tơ iung kơtang lơ̆m jăl jang truh ou kơnh.

Ƀok Lê Anh Đức, Kơ iĕng Kơdră chĕp pơgơ̆r Nội vụ dêh char Lào Cai tơbăt: Hăm dêh char groi kông, tơring sơlam teh đak, lơ hơdrĕch hơdrung hơrih sa, dêh char sơkơ̆t hơdăh ‘meh vă atŏk tơ iung kơtang păng kơjăp ‘lơ̆ng ‘noh mĭnh lơ̆m dôm tơdrong jang kăl hloh ‘noh kăl tơ iung pơjing khul kang ƀô̆, mă kăl kang ƀô̆ chĕp pơgơ̆r, bơ̆ jang ‘lơ̆ng, đei jơhngơ̆m đon ‘lơ̆ng, oei sa ‘lơ̆ng hơ iă, nơ̆r pơma tơ-‘ngla iung jang hloi păng hlôh vao tôm tong lơ̆m tơring.

Khei năr ou ki, Hop akŏm tih Đang ƀô̆ dêh char Lào Kai ‘măng mă blŭng, jăl jang 2025-2030 hlôi pơdrơ̆ng kiơ̆ tơdrong tơchơ̆t păng rim trong jang kơ jăl jang truh ou kơnh; lơ̆m ou đei trong chĕp pơgơ̆r găh tơ iung pơjing khul kơdră chĕp pơgơ̆r păng khul kang ƀô̆, đang viên, ‘noh: “Tơ iung pơjing khul kơdră chĕp pơgơ̆r tơjê̆ kon pơlei, tơklep hăm kon pơlei, oei sa ‘lơ̆ng, bơ̆ jang hơgei; khul kang ƀô̆ jang gơ̆h, tơnăp, phăl hơlăng, pơvih pơvăn ăn kon pơlei”.

Adoi sơkơ̆t hơdăh 1 lơ̆m 5 tơdrong jang tơm hloh ‘noh: “Tơ iung pơjing khul kang ƀô̆, mă kăl kang ƀô̆ chĕp pơgơ̆r, bơngai chĕp kơ̆l đei jơhngơ̆m đon ‘lơ̆ng, bơ̆ jang gơh, hơbĕch hơbal, trŏ lăp hăm trong tơlĕch ăn, ling lang đei jơhngơ̆m đon plang ăn, bơ̆ jang pơnam, tơchăr hơgei, tơpă tơjê̆ hăm kon pơlei, tơklep hăm kon pơlei, pơvih pơvăn ăn kon pơlei; lăng kơjăp hăm kang ƀô̆ sơnăm mơlôh, kang ƀô̆ bơngai drŏ kăn, kang ƀô̆ bơngai kon kông”. Tơroi găh tơlĕch jang kiơ̆ tơdrong jang ou, ƀok Lê Anh Đức, tơbăt:“Truh ou nhôn gô akŏm lơ̆m mĭnh ƀar tơdrong jang tơm: Mă blŭng ‘noh akŏm dăr lăng hơlen, hơmet ming, tơmơ̆t dơ̆ng, pơm pơ ‘lơ̆ng rim tơdrong tơchơ̆t, trong bơ̆ jang găh bơ̆ jang pôk hơtŏk kang ƀô̆ vă trŏ lăp, kơjăp ‘lơ̆ng ƀlep tơdrong pơkăp lơ̆m pơgơ̆r jang kiơ̆. Mă ƀar ‘noh bơ̆ jang ‘lơ̆ng hloh dơ̆ng lơ̆m proh hơmet, chă rơih păng tơmơ̆t kang ƀô̆, sơđơ̆ng ƀlep tơpăt, rơhao, lăng jơhngơm đon ‘lơ̆ng, bơ̆ jang hơgei ‘noh pơm ‘long pơtŏ ăn. Adoi pơtrŭt, pơjing trong tơgum djru vă hơvơn păng gơ̆t jơ̆ng kang ƀô̆ sơnăm mơlôh, kang ƀô̆ bơ̆ jang gơh hơgei”.

Măt bơngai kon kông tơ̆ dêh char Lào Kai hrei ou tơmơ̆t 66,2% măt bơngai kon pơlei lơ̆m dêh char. Kơ yuơ lơ loh, tơdrong atŏk tơ iung kang ƀô̆ ‘noh bơngai kon kông đei sơkơ̆t hơdăh jing tơdrong jang kăl hloh lơ̆m tơ iung pơjing khul jang chinh trĭ gơ̆h hơgei, sơđơ̆ng trŏ lăp ăn atŏk tơ iung tơring groi kông, tơring sơlam teh đak.