Tơ̆ dơnŏk Quy Nhơn, kơ mơjĭt ‘nu kang ƀô̆, ƀô̆ đô̆i Khul Ƀô̆ đô̆i đak dơsĭ vei lăng sơlam teh đak 2 păng Kơđông Ƀô̆ đô̆i ‘Măng dơnok duk Quy Nhơn tĕnh koăng chă pơdŭ 120 tân phe kơ yuơ Hơnih mong răk Teh đak ƀơk ăn dêh char Gia Lai. Đak pơ uh pơ ang hơnhŭl hơnhăl tơ̆ sơngiĕng mă lei bu bu jei kơrŭn đĭ ai vă tơtom ba tơmam drăm tơgŭm ăn truh tơ̆ kon pơlei rim tơring Quy Nhơn Bắc, Quy Nhơn Đông păng Tuy Phước, dôm tơring răm kơtang hloh đơ̆ng ‘mi kial đak lip pơrăm. Trung tá Nguyễn Tùng Giang, Chính trị viên Kơđông ƀô̆ đô̆i vei lăng ‘Măng sơlam Dơnŏk Quy Nhơn, tơbăt:“Nhôn chă hơvơn dôm bơngai đei jơhngơ̆m đon ‘lơ̆ng tơgŭm djru hloh 3.000 tơnô̆ tơmam drăm, 300 hlăh khăn buk, 30 khô̆i đak sŏ nhă vă tơgŭm ăn kon pơlei răm ‘mi kial đak lip pơrăm. Khei năr kơnh, nhôn hơnơ̆ng ăn khul jang tơgŭm kon pơlei vih hơlơ̆k hơrih sa hiôk chơt nhen ki hei dơ̆ng.”

‘Ngoăih akŏm khul jang ăn bơ̆ jang sơng iŏk păng chơ pơdŭ tơgŭm djru, rim kơđông kơ Hơnih Ƀô̆ đô̆i vei lăng sơlam teh đak oei yak năm truh hăm rim tơring vă tơgŭm ăn kon pơlei jang sa. Tơ̆ tơring Ngô Mây păng Cát Khánh, 20 ‘nu kang ƀô̆, ƀô̆ đô̆i găh Kơđông Ƀô̆ đô̆i vei lăng sơlam teh đak Cát Khánh iung jang hơdoi hăm khul bơ̆ jang tơring chă ƀơk ăn 15 tong gre chơ tơmam drăm tơgum ăn truh hăm  rim thôn Chánh Hữu, Chánh Định, Chánh Hội păng Vân Trim. Khul ƀô̆ đô̆i anai năm truh tơ̆ rim jăl trong teh tơdrŭt hơlih, chă kôch hơmet pơ ‘lơ̆ng teh tơmo, tơguưm djru kon pơlei tung choĕn tơmam drăm, hơpuih ôp pơ ‘lơ̆ng hnam oei. Thiếu tá Nguyễn Hữu Tự Thắng, Chính trị viên Kơ iĕng Kơdră chĕp pơgơ̆r Kơđông Ƀô̆ đô̆i vei lăng sơlam teh đak Cát Khánh, tơ băt:“Hrei ou, lơ jăl trong gre hlôi gơ̆h ăn gre chă kơdou hiôk hian. Kơđông ƀô̆ đô̆i vei lăng sơlam Teh đak Cát Khánh iung jang hơdoi hăm khul bơ̆ jang lơ̆m tơring chă krao hơvơn rim bơngai đei jơhngơ̆m đon ‘mêm kơnat hơnơ̆ng tơgŭm djru ăn kon pơlei găh đak nhă, tơmam drăm iŏk yoa kơ ‘năr, tơmam drăm sa, pơgang ba ăn truh tơ̆ kon pơlei vă kon pơlei đei iŏk yoa, chă kôch hơmet dơ̆k vĭ, ôp hơmet hnam trương vă đe hŏk tro hrôih đei mơ̆t hŏk pơhrăm.”

Tơ̆ Hnam trương jăl ƀar Nguyễn Bá, tơring Tuy Phước, Lữ đoàn 573 (Quân khu 5) kôch hơmet dơ̆k vĭ, ôp hơmet rơgoh lăm hŏk, pơdơ̆ng hơmet kơƀang tang dŏ, hơmet ăn ‘lơ̆ng hơ iă hloh ăn đe hŏk tro vih hŏk pơhrăm hơlơ̆p dơ̆ng. Kô pơtho Hồ Thị Minh Phụng chhưu lơ̆m jơhngơ̆m tơbăt:“Ƀô̆ đô̆i hlôi tơgŭm hnam trương, tơdăh gô chang đe ƀok thây kô ‘noh ‘nhŏ hnam kơdih oei hlul hlăl tim mă văn truh. Kơna tôch bơnê kơ rim khul ƀô̆ đô̆i hlôi tơgum djru rim hnam trương vă tơtom ăn đe oh năm hŏk pơhrăm dơ̆ng.”

Lơ̆m 'măng 'mi kial đak hơbông ou ki, kơ rơbou kang ƀô̆, ƀô̆ đô̆i Kuân khu 5, Kuân đoàn 34 păng Anih tơm Ƀô̆ đô̆i dêh char Gia Lai hlôi pơtruh khul ƀô̆ đô̆i iung jang atŭm hăm khul kŏng an păng jơnŭm pơgơ̆r tơring chă tơgŭm dŏng sar bar, 'nhăk kơ hrĕng kon pơlei lĕch đơ̆ng tơring hli hlơt; chă tơgŭm dôm jĭt rơbou 'nu bơngai tơ̆ tơring hli hơmơt hloh yuơ 'mi kial pơrăm. Gơnơm tơdrong iung jang tenh kuăng păng tơnăp noh, mă răm gah mŭk drăm hloh 1.000 ti hlj,  Gia Lai adoi oei kĕ găn ga tơdrong rơka hơbur lôch răm. Hăm tơring đak hơbông Gia Lai, khul ƀô̆ đô̆i jing khul tơm tơgŭm dŏng, hơnih gơnơm kơjăp sơđơ̆ng, yak hơdoi hăm kon pơlei yak hloh tơdrong tơnap tap hli hlơt.

Oei tơ̆ tơring Đồng Xuân, dêh char Đăk Lăk, Đại tá Nguyễn Trường Sinh, Kơdră khul ƀô̆ đô̆i Sư đoàn 2, Kuân khu 5 ăn tơbăt, đak hơbông tih pơrăm lơ tơdrong pơyua ăn tơpôl păng hnam kon pơlei. Tơdrong jang kơ ƀô đô̆i tơgŭm kon pơlei noh lơ tơpă, đơ̆ng chă pơ-'nguaih rơgoh pơ-'lơ̆ng cham char, tang găn 'mê̆ 'mach, chă tơgŭm rah kon pơlei hơmet ming hnam oei. Hăm hơnăp jang kơtang, iung jang đĭ ai, khul ƀô̆ đô̆i hơdrin keh đang hrôih tơdrong jang đei pơjao pơm jang tơ̆ tơring đak hơbông: “Kang ƀô̆, khul ƀô̆ đô̆i Sư đoàn 2 hăm pơkăp tơnăp hloh, hăm khei năr tenh kuăng hloh, gô hơdrin atŭm hăm jơnŭm pơgơ̆r tơring, rim khul jang tơ̆ tơring, gô hơmet ming keh đang tơ̆ dôm tơring dơnơm, vă tenh kuăng sơđơ̆ng ăn jơnŭm pơgơ̆r tơring pơm jang, mă kăl noh hơnih pơtho pơhrăm, anih jang pơgang hơmet jĭ jăn, păng hơnih jang kơ jơnŭm pơgơ̆r tơring, kon pơlei tơ̆ tơring gơh sơđơ̆ng jơhngơ̆m hơrih jang xa”

Đại tá Đinh Văn Hưng, Chĭnh uy Anih tơm Ƀô̆ đô̆i dêh char Đăk Lăk ăn tơbăt, đơ̆ng rŏng keh đang tơdrong chă tơgŭm dŏng, dang ei rim anih ƀô̆ đô̆i akŏm tơgŭm kon pơlei pơ-'nguaih rơgoh hăm rim unh hnam păng tơring kon pơlei oei xa, hơmet ming trong nơnăm, hơmet ming hnam pơgang, hnam oei mă ƀơm răm, asong tơmam drăm xa, pơgang, tơmam drăm hơmet jĭ jăn, asong khăn buk, hơbăn ao, tơmam pai xa vă kon pơlei sơđơ̆ng tơdrong hơrih:“Pơkăp tih tên hloh kơ đe kang ƀô̆, ƀô̆ đô̆i Hơnih tơm vei lăng khul ƀô̆ đô̆i, rim hơnih ƀô̆ đô̆i Kuân khu, khul ƀô̆ đô̆i tŏk bŏk oei bơ̆ jang tơ̆ tơring 'noh athei hơmet keh đang 'mi kial đak hơbông pơrăm, mă kăl noh 'mi kial đak hơbông 'măng mă ou, 'noh rim anih ƀô̆ đô̆i pơtơm keh đang tơdrong pơjao jang păng ƀơ̆t doh pơtơm gơh vih tơ̆ hơnih ƀô̆ đô̆i oei vă pơtoi kơ sơnong jang kơ po”

Lơ̆m 'mi kial đak hơbông, um rup bơngai ƀô̆ đô̆i minh 'măng dơ̆ng oei lơ̆m đon bơnôh kon pơlei, ưh hơdrô̆ jĭ khul ƀô̆ đô̆i tơblah vă vei lăng teh đak, mă oei jing hơnih gơnơm kơjăp ăn kon pơlei mưh ƀơm tơdrong sar bar. Kơplah tơdrong hơrih oei ƀơm lơ tơnap tap, rim tơpang ti đe ƀô̆ đô̆i hăt hot tơgŭm kon pơlei hơmet ming rim bơbŭng hnam, pơ-'nguaih rơgoh rim jăl trong, pai por 'nhot ăn kon pơlei. Ƀô đô̆i tơgŭm kon pơlei tơring đak hơbông ưh hơdrô̆ hăm jơhngơ̆m pran, mă hăm đon bơnôh hloi. 'Noh jing sơnong jang đei đơ̆ng plei nuih kơ bơngai ƀô̆ đô̆i Ƀok Hô lơ̆m khei năr rơngei hiôk hian hrei ou.