Hue lăng truh tơ̆ 2 xăh pŭ hiong răm dêh hlŏh đơ̆ng ‘mi tih, đak lơ̆p âu ki tơ̆ găh Hơlĕch kơ dêh char Đắk Lắk (dêh char Phú Yên so), khul kăn ƀô̆, bơngai jang tơ̆ Anih Radio nơ̆r pơma VN tơ̆ Tây Nguyên (VOV Tây Nguyên) kŭm hăm 1 kơsô̆ bơngai đei đon ‘lơ̆ng vang tơgop, tơgŭm phe ăn kon pơlei. 200 tơpu tơmam, 1 tơpu đei 10 kĭ phe, hlôi gơih ăn 200 unh hnam kon pơlei tơ̆ 2 xăh Hòa Thịnh păng Đông Hòa – dôm unh hnam pŭ hiong răm lơ hlŏh.

Ƀok Lê Hải Sơn, Kơdră chĕp kơ̆l VOV Tây Nguyên ăn tơbăt, đơ̆ng rŏng lơ năr chih tơdrong kơtơ̆ng ang găh ‘mi tih đak lơ̆p, lăng ƀôh tơdrong hiong răm tôch lơ đơ̆ng kon pơlei, kăn ƀô̆- bơngai jang lơ̆m anih jang vang tơra tơgop, răt phe vă tơgŭm ăn kon pơlei. Dôm năr âu ki, gơnơm tơdrong tơgŭm tôch pơneh đơ̆ng kon pơlei lơ̆m teh đak, tơdrong arih xa kơ kon pơlei tơ̆ tơring đak lơ̆p sơđơ̆ng ‘lơ̆ng ƀiơ bơih, ưh pă đei pơngot rơvĕt, tơngiĕt găng. Mă lei, đơ̆ng rŏng lơ năr chă xa săi mi tôm, bu bu kŭm hơpơi ‘mĕh đei tơmam sŏng xa ‘lơ̆ng ƀiơ̆. Tơdrong tơgŭm phe ‘măng mă âu tơƀôh hơdăh jơhngâm đon băt ‘mêm băl, chĕp vei kơjăp tơdrong juăt ‘lơ̆ng đơ̆ng sơ̆ “Hla ‘lơ̆ng bơ̆ng ăn hla hiă” đơ̆ng hơdrĕch Việt Nam.