Năr ‘nâu (1/12), Lêh tơlĕch jang "jăh ming man, pơm hơmet ming hnam oei ăn kon pơlei tơ̆ tơring ‘mi kial đak lip" hrơ̆ch pơgơ̆r 1 ‘măng tơ̆ dêh char Đắk Lắk tơring hiong răm dêh hlŏh jô̆ hloi găh bơngai păng tơmam lơ̆m ‘măng ‘mi tih, đak lơ̆p âu ki. Tơchĕng adrol hlŏh 680 tŏ hnam đei man ‘nao. Kŭm hăm Đắk Lắk, Lêh tơlĕch jang man hơmet ming hnam oei tơgŭm ăn kon pơlei tơ̆ tơring đak lơ̆p kŭm đei pơgơ̆r tơ̆ dêh char Gia Lai, Khánh Hoà hăm kơsô̆ jên man tŏ sĕt hlŏh ‘nŏh 170 triu hlak jên 1 pôm hnam.

Lêh tơlĕch jang đei bơ̆ jang kiơ̆ nơ̆r athei đơ̆ng Thủ tướng Phạm Minh Chính găh tơlĕch tơdrong iŏk bưng ai ƀok pơtao Quang Trung, bơ̆ jang ming man mă hrĕnh, jăh hơmet ming ‘lơ̆ng hnam oei ăn dôm unh hnam đei hnam păk, pơchăh yoa đơ̆ng ‘mi kial đak lip âu ki tơ̆ dôm dêh char găh Tơring Tŏk bŏk. Tuy An Bắc jĭ tơring Anih vei lăng kon pơlei dêh char Đắk Lắk jang hơdoi hăm khul linh pơgơ̆r lêh ming man hnam mă hrĕnh ăn kon pơlei tơ̆ tơring đak lơ̆p âu ki. Anih vei lăng kon pơlei dêh char Đắk Lắk tơchơ̆t tơlĕch man ‘nao 684 tŏ hnam; pơm hơmet ming hlŏh 1.500 tŏ hnam păng man 333 tŏ hnam hŏk hôp tơpôl hơdai hăm anih oei xa pơgia vă veh ver kơ ‘mi tih đak lơ̆p tơ̆ pơlei, kueng kơphô̆, hăm kơsô̆ jên dang 800 ti.