Kiơ̆ đơ̆ng Tiến sĩ Lương Bạch Vân, Kơdră chĕp pơgơ̆r Khul pơchoh trong Jang tơbôl păng Kon pơlei oei tơ̆ teh đak đe kơ Hơnih bơ̆ jang MTTQ Việt Nam pơlei tơm HCM, dôm trong tơlĕch jang tơplih ‘nao tih tên jei đei hloi tơdrong rơvơn păng tơdrong long, păng mă kăl ‘noh kăl pơjing đei hơnih vă pơtrŭt rim kang ƀô̆ hơbĕch hơbal, tơchăr hơgei, pơ̆n pơma, pơ̆n iung jang hloi.

Yă akhan, lơ̆m jơ ‘năr proh hơmet, pơm kơtoei khul kơdră chĕp pơgơ̆r hrei ou ‘nao lăp pơdơ̆h ƀơ̆t pơm kơ toei măt bơngai, lơ̆m mă tơdrong kăl hloh ‘noh tơplih jơhngơ̆m đon tơchĕng, trong bơ̆ jang, vă rim kang ƀô̆ gơh iung jang dôm tơdrong hơpơi ‘meh vă tơplih ‘nao đei jing tơpă.“Hrei ou tŏk bŏk tôch tơnap tap, kang ƀô̆ măh bơ̆ jang lơ hloh ƀar ‘măng, lơ̆m mă tơdrong gre nơnăm, trong nơnăm oei tôch tơnap tap, kăl hơdrin yak hloh. Dôm tơdrong hơpơi gô gơnang lơ̆m khul hle, pơ koel kăl hloh vao, bơ̆ jang hơgei hloh dơ̆ng. Bơ̆n hơmŏ, hơpơi ‘meh vă, mă lei pơm ăn tơdrong hơpơi ‘meh vă đei jing tơpă ‘noh rim bơngai kăl kơrŭn đĭ ai, hơdrin kơtang hloh dơ̆ng. Ăp mă iung jang lơ loh ‘nei, bơ̆n mă kĕ iŏk đei jơnei hloh”.

Luật sư Trương Thị Hòa, Kơ iĕng Kơdră chĕp pơgơ̆r Hơnih Kơdranh mơdro sa pơlei tơm Hồ Chí Minh akhan, vă kang ƀô̆ pơ̆n chă tơchĕng, pơ̆n iung jang hloi ‘noh hơnăp jang kơ bơngai chĕp kơ̆l hơnih bơ̆ jang jĭ tôch kăl hloh. “Trong ou hrei ‘nou đei lơ nơ̆r chă pơma tơ̆ ou tơ̆ to, lơ bơngai drơ̆ng drơ̆t mă lei kiơ̆ kơ ĭnh bơngai bu pơ̆n jang ‘noh jang, băt hlôh lơ tơdrong ‘noh pơ̆n. Jang ƀlep hli pơm kiơ. Tôch hơdăh mălei tơdrong kăl hloh ‘noh khôi luơ̆t kăl tơpăt. Kơna dôm tơdrong tơchơ̆t kơ Đảng kăl tơtom, đei pơm pơjing hloi jing khôi luơ̆t. Đảng ‘noh tơlĕch trong tơchăr, yak hrôih ... đĭ đăng jei pran kơtang mă lei khôi luơ̆t tim mă druh tơm lei pơnăt ăn dôm bơngai kang ƀô̆ tơpă mơ̆n”.

Vei lăng năng tông kang ƀô̆ pơ̆n iung jang ‘noh ưh khan dŏng găh dôm tơdrong pơm glăi, mă lei vei lăng năng tông dôm tơdrong tơchăr hơ iă kơ yuơ đei iŏk yoa ăn tơpôl. Lơ̆m trong anai dơ̆ng, yă Phạm Thị Quyên, Kơ iĕng Kơdră chĕp pơgơ̆r Jơnŭm vei lăng bơngai jang tơdrong jang dêh char Tây Nguyên pơma hơdăh akhan, hăm kang ƀô̆ kŏng đoàn, jơhngơ̆m đon pơ̆n tơchĕng, pơ̆n iung jang, pơ̆n chiu pŭ kăl tơklep kơjăp hăm tơdrong vei lăng năng tông tơdrong đei iŏk yoa trŏ lăp ăn bơngai jang.“ Dôm trong tơchơ̆t bơ̆ jang ‘noh kăl đei pơjing jing khôi luơ̆t hloi. Hrei ou, bơ̆n hlôi đei Khôi luơ̆t Kŏng đoàn, lơ̆m ou tơchơ̆t hơdăh găh dôm tơdrong gơ̆h jang, hơnăp jang kơ kang ƀô̆ kŏng đoàn. ‘Ngoaih kơ ‘noh jei đei dôm khôi luơ̆t vei lăng năng tông kang ƀô̆ kŏng đoàn ưh iung jang dôm hơnăp jang, tơdrong jang kơ dih, mă kăl lơ̆m tơdrong tang măt, vei lăng tơdrong pơm tơm kơdih păng đei iŏk yoa trŏ lăp kơ bơngai jang. Kơna ‘noh jĭ mĭnh tơdrong tôch gĭt kăl mă bơngai kang ƀô̆ kŏng đoàn hrei ou đei”.

‘Moi kiơ̆ lơ̆m lơ sơnăm tơklep kơjăp hăm Măt trân, ƀok Nguyễn Hoàng Năng, Kơdră so chĕp pơgơ̆r Hơnih bơ̆ jang MTTQ Việt Nam pơlei tơm HCM, akhan, trong bơ̆ jang ou tôch ƀlep păng kăl hloh, mă lei vă iung jang hloi lei kăl đei trong tơlĕch ăn mă hơdăh, mă lei lăi đơ̆ng kơpal jur tơ̆ hơla.“Ĭnh tơchĕng Hop akŏm tih kơ Đảng lơ̆m teh đak gô tơlech ăn mĭnh trong jang lơ liơ ‘lơ̆ng hơ iă hloh, vă tơgŭm ăn bơngai kang ƀô̆ bơ̆ jang ‘lơ̆ng hơ iă hloh. Mă kăl hrei ou khul kơdră chĕp pơgơ̆r tơring lăp pă ƀar kâp ‘noh tơdrong đei ƀơm pơm lơ liơ tơjê̆ hloh. Pơtih gia sơ̆, phương năm tơ̆ kuân mă lei dang ei đơ̆ng phương năm tơ̆ pơlei tơm jĭ tôch kơ kăl mă lei dôm tơdrong rơvơn ou to jei ưh kơ ƀônh ƀŏ ôh. Hơpơi ăn khei năr truh ou kơnh rim kơdră tang măt gô tơgop nơ̆r hăm Đảng  vă đei trong bơ̆ jang trŏ lăp hloh, ‘lơ̆ng hơ iă hloh”.

Tơdrong yan ou đei ƀôh, mă đơ̆ng hlôi đei Tơdrong tơchơ̆t 73/2023/NĐ-CP găh vei lăng kang ƀô̆ hơbĕch hơbal, tơchăr hơgei, oei đei tơdrong pơjăh pơjăng kơ yuơ kang ƀô̆ “hli glăi”, “hli athei chiu pŭ”. Trong vă pơjing Tơdrong tơchơ̆t ‘nao kơ Hơnih tơm Nô̆i vŭ găh xek tơlang kih luơ̆t kang ƀô̆ tơmơ̆t dơ̆ng tơchơ̆t ưh kơ ki luơ̆t kang ƀô̆ jang blep tơdrong, ưh kơ iŏk yoa sa hơpăh kơdih mă lei tơƀơ̆p tơdrong sar bar ưh kơ rơ̆ng ‘noh ji tơdrong kăl hloh, tơdrong tơchơ̆t pơm kiơ̆ trong bơ̆ jang vei lăng bơngai pơ̆n tơchĕng, pơ̆n iung jang, pơjing “jơhngơ̆m đon lui kơjăp lơ̆m khôi luơ̆t” vă kang ƀô̆ sơđơ̆ng jơhngơ̆m bơ̆ jang kơ yuơ đei iŏk yua ăn tơpôl.