Tơ̆ hop akŏm, kon pơlei choh jang sa, hơnih mơdro sa păng hơp tak xah pơtruh ăn vă jê̆ 400 nơ̆r apĭnh kơtă 25 nơ̆r apĭnh găh tơdrong bơ̆ jang, tơ iung pơjing tơring pơjing đei tơmam drăm, jang kiơ̆ khoa hŏk-kmăi kmŏk, tơchă băt hơnih pơtăm, pơm tơlĕch ‘lơ̆ng, sơđơ̆ng choh jang sa, cham char tơring choh jang sa păng sơđơ̆ng tơpôl.

Rim bơngai tang măt pơma dơnuh lơ trong jang kăl nhen pơm dă ƀiơ̆ hiong răm đơ̆ng tŏ ‘mi kial pơrăm, atŏk tơ iung choh jang sa gơh hơgei, pơih să hơnih tĕch răt-pơm hơtŏk ‘lơ̆ng tơmam drăm păng kĕ pơjei tĕch răt tơmam drăm, pơtrŭt kơtang Hơp tak xah-trong jang sa hơdoi, hơmet pơ ‘lơ̆ng kon jên tơmơ̆t jang, groi teh păng kơtơ̆ng ang hơnih tĕch răt.

Lơ nơ̆r tơgop tôch ưh kơ lăp đon hăm tơdrong chă pơlơ̆m mơdro sa, pơm ya tơmam drăm choh jang sa Đà Lạt pơm pơrăm truh kon pơlei choh jang sa. Yă Lương Thị Yến Vân, Kơdră chĕp pơgơ̆r Hơp tak xah Vườn Nhà Đà Lạt, tơbăt:“Mĭnh kĭ pơmur tây ba pơtăm ‘noh kơjă re hloh jei 100.000 hlak jên, mưh sơ̆k kro 10 kĭ hơdrih ‘noh mă iŏk đei 1 kĭ kro. Jô̆ hloi jên ŭnh hơyuh, bơngai jang ‘noh akŏp kon jên jang sơ̆k kro lơ̆m 1 kĭ pơmur ‘noh tơhoach 1 triu 200.000 hlak jên. Mă lei dôm tơmam drăm đe tĕch mơdro tơ̆ kơchơ Đà Lạt đei tĕch lăp 250.000 hlak jên lơ̆m 1 kĭ, lơ̆m mă ưh kơ đei hla bơar ayơ tơbăt hơdăh hơnih pơtăm, hơnih pơm tơlĕch mă lei jei đei tăh lơ̆m kơchai păng pơklep hơnăn pơmur tây sơ̆k kro Đà Lạt. Ba ƀôh ưh kơ đei hơnih bơ̆ jang ayơ iung jang vă vei lăng năng tông tơdrong đei iŏk yoa sa hơpăh ăn kon pơlei choh jang sa, nhôn tôch lao đon hăm dôm tơdrong lơ lou”.

Kơdră chĕp pơgơ̆r rim hơnih bơ̆ jang hlôi tơl hơdăh dôm tơdrong; dôm tơdrong tim mă gơh vă tơl hơdăh tôm tong gô đei chih akŏm păng tơl hơdăh ăn kon pơlei kiơ̆ chih pơtruh ăn hla bơar.

Iung pơma tơ̆ hop akŏm, Kơdră chĕp pơgơ̆r Hơnih vei lăng kon pơlei dêh char Lâm Đồng Hồ Văn Mười pơma hơdăh, hăm trong “tơl hơdăh, xek tơlang tĕnh koăng”. Dêh char pơkăp xek tơlang tơtom dôm nơ̆r tơgop trŏ lăp đơ̆ng kon pơlei; dôm tơdrong mă hloh tơdrong gơ̆h jang gô chih tơroi tơbăt ăn kơ Trung ương. Găh tơdrong tơmam drăm đơ̆ng tơring anai tơmơ̆t tơ̆ ou đơ̆ng noh pơm pơgơ̆m akhan tơmam drăm tơring pơm tơlĕch. Ƀok Hồ Văn Mười sơkơ̆t hơdăh gô xek tơlang kơhret:“Đơ̆ng rŏng hop akŏm ou, nhôn gô pơrô̆ athei rim hơnih bơ̆ jang ƀơm truh,. Lơ̆m ou hơnăp jang kăl hloh ‘noh khul kŏng ang, Hơnih vei lăng Mơdro sa dêh char, hơnih vei lăng tĕch mơdro păng rim hơnih bơ̆ jang anai. Tơdrong mă ou ưh kơ đei tơnap yă kiơ ôh tơdăh bơ̆n kơrŭn đĭ ai, iung jang tơnăp”.

Hop akŏm hơmŏ pơjing dơ̆ng jơhngơm pran vă tơdrong choh jang sa Lâm Đồng atŏk tơ iung kơjăp ‘lơ̆ng, pơm hơtŏk jang sa iŏk yoa kơjăp păng hơrih sa ăn kon pơlei choh jang sa lơ̆m khei ‘năr tơplih tŏ ‘mi kial roi năr roi kơtang.