Hăm 90,51% ‘nu kơdră tang măt Kuô̆k hô̆i drơ̆ng nơ̆r, Kuô̆k hô̆i hlôi pơdrơ̆ng kiơ̆ Tơdrong tơchơ̆t găh trong pơprŏ atŏk tơ iung mŭk drăm-tơpôl sơnăm 2026. Tơdrong Tơchơ̆t sơkơ̆t hơdăh 15 trong tơlĕch jang tơm, lơ̆m ou: Tŏk tơmam drăm lơ̆m teh đak (GDP) hơdrin iŏk đei đơ̆ng 10% năm tơ̆ lơ. GDP jô̆ hơtŏ măt bơngai iŏk đei 5.400-5.500 dolar Mi (USD). ‘Nou jĭ trong tơlĕch ăn tôch kơ lơ, mă lei kiơ̆ đơ̆ng lơ kơdră tang măt mưh chă pơma dơnuh găh tơdrong ou jei ƀôh hơdăh vă lui akhan gô iŏk đei trong tơlĕch jang hăm trong hlôi đei pơjing hơyak pran lơ̆m jăl jang ou. Bơngai tang măt Trần Văn Lâm, Khul Bắc Ninh sơkơ̆t hơdăh, dôm tơdrong iŏk jơnei tŏk muk drăm hlôi iŏk đei, atŭm hăm trong bơ̆ jang hlôi đei Kuô̆k hô̆i pơjing keh đang lơ̆m rim ‘măng hop akŏm tơjê̆ ou, jĭ hơyak pran vă Việt Nam yak mơ̆t lơ̆m sơnăm 2026 hăm jơhngơ̆m đon sơđơ̆ng păng lui kơjăp:“Tŏk mŭk drăm lơ̆m sơnăm ou iŏk đei 8%. Păng jơ rơvơn ăn jăl đơ̆ng rŏng hlôi đei Kuô̆k hô̆i lơ̆m lơ ‘măng hop akom ou ki pơma dơnuh dih băl vă sơkơ̆t hơdăh hơmet ming rim trong bơ̆ jang khôi luơ̆t, pơjing đei lơ trong bơ̆ jang gĭt kăl pran kơtang tơgŭm ăn Khul kơdră chĕp pơgơ̆r Teh đak vă pơtrŭt kơtang tŏk mŭk drăm lơ̆m sơnăm 2026 păng pơđĭ lơ̆m jăl đơ̆ng rŏng hăm trong tơlĕch ăn lơ hloh dơ̆ng păng bơ̆n lui akhan hăm dôm tơdrong mă bơ̆n hlôi păng tŏk bŏk jang ‘noh gô iŏk đei trong tơlĕch jang.”

Hăm 88,61% ‘nu kơdră tang măt drơ̆ng nơ̆r, Kuô̆k hô̆i hlôi pơdrơ̆ng kiơ̆ Tơdrong tơchơ̆t găh kon jên bơ̆ jang teh đak sơnăm 2026. Kiơ̆ kơ ‘noh, tơchơ̆t pơdrơ̆ng kiơ̆ kon jên jang teh đak sơnăm 2026 hăm thuê̆ ăn hơnih mong jên bơ̆ jang teh đak ‘noh hloh 2 triu 500.000 ti hlak jên. Akŏp kon jên tơlĕch ăn bơ̆ jang teh đak ‘noh hloh 3 triu ti hlak jên (mă kăl ăn asong dơ̆ng rim tơring sơđơ̆ng jang kiơ̆ kla ăn kon jên khei 2 triu 340.000 hlak jên lơ̆m 1 khei)

Mĭnh tơdrong jang anai jei đei rim kơdră tang măt Kuô̆k hô̆i păng bơngai tăh hla lơ̆m teh đak lăng truh, ‘noh tơdrong live stream tĕch tơmam drăm. Mưh ăn tơgop nơ̆r găh trong vă pơjing Khôi luơ̆t mơdro sa điên tư, rim kơdră tang măt hơlen ‘nou jĭ mĭnh khôi luơ̆t tôch gĭt kăl, ưh khan lăp hơmet ming tơdrong jang tĕch răt lơ̆m mạng mă oei jing hơnih kăl kơ tơdrong jang mŭk drăm kơsô̆ teh đak. Bơngai tang măt Hoàng Thị Thanh Thúy, khul Tây Ninh akhan, mă đơ̆ng trong vă pơjing khôi luơ̆t hlôi tơchơ̆t hơnăp chĭu pŭ đơ̆ng bơngai live stream tĕch mơdro tơmam drăm mă lei oei đei lơ hơnih lon nhen: tim mă đei tơdrong tơchơ̆t dăr lăng hơlen hơdrol vă pơgơ̆r pơdăh tơmam drăm đei ƀơm truh jơhngơ̆m pran jăng, khei vei gei kơjăp yưh lĭu ưh kơ đunh, tim mă tơchơ̆t hơdăh tơdrong chĭu pŭ ƀơm truh mưh tơƀôh tơbăt ăn dôm tơdrong kơtơ̆ng ang ưh kơ ƀlep.“Vă sơđơ̆ng ăn trong vă pơjing trŏ lăp hloh hăm tơdrong yan ou tŏk bŏk ƀôh tôch kơ tĕnh koăng kơ mơdro sa ‘moi kiơ̆ live stream, athei kăl lăng mă brĕ tơmơ̆t dơ̆ng trong jang dăr lăng hơlen hơdrol kơ pơgơ̆r kơ rim ‘măng live stream tơƀôh tơbăt dôm tơmam drăm đei ƀơm truh jơhngơ̆m jăn; Pơm hơdăh tơdrong chiu pŭ ƀơm truh đơ̆ng bơngai pơgơ̆r live stream lơ̆m tơdrong tơbăt kơtơ̆ng ang hloh tơdrong dăh mă ưh kơ ƀlep tơpă pơtêng hăm tơmam drăm ‘noh; Pơih să jơ ‘năr mong răk yưh lĭu live stream; Tơmơ̆t dơ̆ng tơdrong jang kiơ̆ tơƀôh hơdăh live stream, dăr hơlen vei lăng kơjăp nơ̆r pơma dơnuh, seeding ảo păng trong jang tơbăt ăn mưh ƀôh tơdrong chă mơ̆t lăng lơ hloh tơdrong”.

Hăm 15 triu ‘nu kon pơlei kơsô̆ tih vơ̆ djơ̆ ‘lơ̆ng atŭm hăm điên thoăi hơgei mă lei trong vă pơjing khôi luơ̆t tă tim mă tơchơ̆t kơdih vă vei lăng năng tông tơdrong đei iŏk yoa păng tơdrong sơđơ̆ng ăn đe hơ ioh lơ̆m tơdrong tĕch răt điên tư. Kơ yuơ lơ loh, bơngai tang măt Nguyễn Thị Việt Nga, khul Hải Phòng athei:“Adoi, mưh ƀôh livestream đei tơdrong ưh kơ trŏ lăp hăm tơdrong oei sa joăt joe sơ̆ ki, tơdrong tơchơ̆t kơ Khôi luơ̆t pơm kơnê̆ ăn đe hơ ioh ‘noh kăl đei trong jang tơƀôh tơbăt jang hơdoi ƀar hơnih bơ̆ jang vei lăng vă sut hŭt hloi dôm kơtơ̆ng ang ưh kơ trŏ ƀlep ‘noh”.

Pơm hơdăh găh tơdrong ‘nou, Kơ iĕng Thủ tướng Bùi Thanh Sơn tơbăt:“Trong vă pơjing khôi luơ̆t hrei ou jei tôch hơdrin tơmơ̆t dôm tơdrong mă bơ̆n gơ̆h vei lăng ‘lơ̆ng ăn bơngai iŏk yoa adoi nhen bơngai vang mơ̆t lăng lơ̆m hơnih mơdro sa điên tư. ‘Ngoăih kơ ‘noh, khôi luơ̆t jei sơkơ̆t hơdăh hơnăp jang chiu pŭ đơ̆ng bơngai livestream păng bơngai tĕch. Năr ou bơ̆n gô hơnơ̆ng tơgoăt iŏk nơ̆r tơgop đơ̆ng rim kơdră tang măt vă pơrô̆ athei hơnih chih tơlĕch hơnơ̆ng chih tơmơ̆t dơ̆ng, pơm pơkeh găh tơdrong ‘nou, mă kăl ‘noh tơdrong vei lăng năng tông ‘lơ̆ng hơ iă ăn hơ ioh”.