Pơjao vei lăng đei lăng jĭ trong kăl hloh vă pơm hơtŏk bơ̆ jang ‘lơ̆ng lơ̆m jang kiơ̆ khôi luơ̆t lơ̆m choh jang sa, mă kăl tơ̆ rim dêh char đei tơdrong choh jang sa kơtang lang să. Bơngai tang măt Phạm Văn Hòa, Khul Đồng Tháp, akhan, tơdrong pơjao gơ̆h jang ăn tơring lơ̆m vei lăng pơm tơlĕch tơmam hiĕm kon tơrong ‘noh kăl hloh, tơgŭm ăn dă ƀiơ̆ jang lơ pơm hla bơar păng atŏk tơdrong chiu pŭ hơnăp jang:“Ĭnh athei pơjao kơtang hloi ăn tơring găh tơdrong iŏk tơvih, ƀơk ăn hla bơar drơ̆ng nơ̆r gơh pơm tơlĕch tơmam hiĕm kon tơrong, ưh kơ kăl gô chang đơ̆ng Hơnih tơm. Pơjao ăn Kơdră chĕp pơgơ̆r Hơnih vei lăng kon pơlei dêh char gơ̆h kĭ tơchơ̆t ăn asong, iŏk tơvih hla bơar ăn gơh jang, tơdăh hơnih jang đei tôm rơvơn ‘noh tơring chiu pŭ tơm hloh.”

Mă lei, atŭm hăm pơjao gơh jang, lơ kơdră tang măt pơma hơdăh kăl atŏk kơtang gơ̆h jang păng khul jang tơ̆ tơring, mă kăl khul jang pơgang vei lăng kon tơrong, hơnih tŏk bŏk ưh kơmăh lơ đơ̆ng rŏng proh hơmet, pơm kơtoei khul bơ̆ jang. Bơngai tang măt Chu Thị Hồng Thái, khul Lạng Sơn pơma hơdăh dôm tơdrong jang tim mă ‘lơ̆ng hơ iă lơ̆m khul jang pơgang vei lăng kon tơrong tơring mưh lơ tơring, apŭng pă đei kang ƀô̆ joăt jang, lơ̆m mă trong vă pơjing tă pơjao dơ̆ng lơ tơdrong jang tang găn pơrang jĭ ăn tơring. Bơngai tang măt athei kăl đei tơchơ̆t mă hơdăh găh tơdrong ăn khul kang ƀô̆ jang pơgang vei lăng kon tơrong tơ̆ mĭnh ƀar tơring, vă vei lăng sơđơ̆ng ăn bơ̆ jang tang găn pơrang jĭ lơ̆m rong kon tơrong:“Hăm khôi luơ̆t jang pơgang vei lăng kon tơrong ‘noh ĭnh đei nơ̆r tơgop athei hơnih bơ̆ jang chih tơlĕch păng hơnih jang dăr lăng hơlen kăl chă tơchĕng hơlen mă brĕ vă pơjing đei tơdrong tơchơ̆t pơ koel ‘noh mĭnh ƀar tơring kăl đei hloi bơngai bơ̆ jang tơgŭm ăn lơ̆m jang pơgang vei lăng kon tơrong. Hăm rim tơdrong tơchơ̆t lơ̆m trong vă pơjing khôi luơ̆t ou ‘noh kiơ̆ kơ ĭnh ƀôh găh lơ tơdrong jang kơ bơ̆ jang pơgang vei lăng kon tơrong tơ̆ apŭng ‘noh pơjao ăn tơring ngăl bơih mă hơdrol ou ki ‘noh đei hơnih jang veilăng jang pơgang vei lăng kon tơrong tơ̆ apŭng. Dang ei pă đei dôm khul ou ‘noh vih tơ̆ tơring lei bơngai bu bơ̆ jang tơdrong ou?”

Tơdrong yan ou đei ƀôh, tơdrong jang pơgang vei lăng kon tơrong tơ̆ tơring đei pơtih ăn “ ‘noh hla đon, măt păng jơ̆ng” kơ Hơnih jang vei lăng rong kon tơrong, hơnih jang pơgang vei lăng kon tơrong, tơdăh ưh kơmăh gô pơm ăn ưh kơ đei lơ̆m bơ̆ jang dăr lăng hơlen pơrang jĭ. Kơ yuơ lơ loh, tơdrong pơjao kăl yak hơdoi hăm pơtho tơbăt hơdăh găh bơngai jang, tơdrong pơkăp păng hơnăp jang đơ̆ng khul kơdră chep pơgơ̆r tơring.

Atŭm hăm ‘noh, bơngai tang măt Nguyễn Thị Sửu, Khul pơlei tơm Huế akhan: Pơjao kơtang ăn tơring kăl tơlĕch hloi trong jang chĕp pơgơ̆r trŏ lăp, vă sơđơ̆ng ăn hrơ̆p mĭnh ‘măng păng veh ver hơgrop lơ̆m chĕp pơgơ̆r, mă kăl lơ̆m tơdrong jang choh pơtăm păng choh jang sa rơgoh ‘lơ̆ng.“Mưh hơgrop ƀar Hơnih tơm vei lăng Choh jang sa păng Cham char, bơ̆n kăl pơjing đei hơnih bơ̆ jang chĕp pơgơ̆r vă bơ̆ jang vei lăng ‘lơ̆ng đơ̆ng Trung ương truh tơ̆ tơring. Ĭnh athei pơjing hloi Hơnih bơ̆ jang Pơchoh trong Teh đak găh Choh jang sa rơgoh ‘lơ̆ng păng Sinh hŏk, pơm hơnih tơm chĕp pơgơ̆r, veh ver tơdrong mĭnh tơdrong jang phara dih băl, pơm ăn ưh kơ lei lăi păng ưh kơ jơnei ‘lơ̆ng.”

Rim nơ̆r tơgop đơ̆ng kơdră tang măt đei ƀôh dôm tơdrong lei lăi: Pơjao ăn ưh khan lăp pơjao gơh jang, mă oei jing pơjao gơh jang yak hơdoi hăm pơchoh trong, dăr lăng, chiu pŭ. Mưh tơring đei pơjao chĕp pơgơ̆r kơtang, lei bơ̆ jang chĕp pơgơ̆r kăl gơh hơgei, kmăi kmŏk chih răk lei lăi păng trong bơ̆ jang dăr lăng mă hơdăh vă sơđơ̆ng jang kiơ̆ ‘lơ̆ng, jơnei lơ̆m tơdrong bơ̆ jang yan ou.