Tổng Bí thư Tô Lâm pơma hơdăh: Pơtho pơhrăm, jang pơgang păng tơdrong oei sa joh ayŏ ‘noh tơdrong tơm dơnơm kơ teh đak, mĭnh păh trong tơlĕch jang, mĭnh păh jing jơhngơ̆m pran vă atŏk tơ iung kon bơngai - khul jang kăl hloh kơ teh đak. Tổng Bí thư akhan, Tơdrong jang tơm teh đak lơ̆m khei ‘năr ou ki oei hơgrop lơ, tim mă akŏm khul jang, tim mă pơm hơdăh trong tơlĕch jang tơm păng tim mă sơkơ̆t hơdăh hơnih bơ̆ jang chiu pŭ hơnăp jang tơm.

Hăm tơdrong jang pơgang, Tổng Bí thư athei lăng kơjăp lơ̆m tơdrong jang vei lăng năng tông jơhngơm pran jăng đơ̆ng blŭng păng tang găn hơlou jĭ jăn, hơmet pơ ‘lơ̆ng đơ̆ng tơm rim tơdrong đei ƀơm đơ̆ng cham char, đak rơgoh, rơgoh ‘lơ̆ng tơmam drăm sa - dôm tơdrong tơm pơm ăn đei jĭ jăn. Tơdăh ưh kơ iung jang xek tơlang đơ̆ng blŭng, mă đơ̆ng tơmơ̆t jên jang dang yơ hnam pơgang jei ưh kơ kĕ jang keh đang ‘lơ̆ng tơdrong hơpơi ‘meh vă.“Hăm tơdrong jang pơgang, kăl hloh ‘noh vei lăng năng tông jơhngơ̆m pran jăng grăng akou đơ̆ng blŭng, kăl tơlĕch jang tang găn pơrang jĭ ‘noh kăl hloh. Găh dang ei ‘noh lăng kăl lơ̆m khăm ming hơmet jĭ jăn, nhen lĕ tŏk bŏk iung jang hăt hot ƀơ̆t măt đĕch - kơ yuơ tang găn hơlou ưh kơ tang kơna tơdrong jĭ jăn mă atŏk tơ iung. Kăl hơlen mă hơdăh kiơ̆ rim tơdrong, tơdrong yă kiơ tŏk bŏk oei ƀôh? 5 sơnăm dơ̆ng bơ̆n hăm kĕ tang găn kĕ hloi dăh mă ưh? Kăl pơm hơdăh lơ loh. Jĭ hyĕn hiang lơ̆m apŭng plĕnh teh đe tang găn kĕ đơ̆ng sơ̆ bơih, tơdăh lê̆ tơpoh tơ̆ yơ ‘noh vă iung jang tang găn hơlou tơhoach kon jên jang tôch kơ lơ. Jĭ klơm lơ liơ, chă tơpoh lơ liơ? Kiơ̆ kơ ĭnh ‘noh Tơdrong jang tơm teh đak kăl iung jang mă hơdăh, dôm trong tơlĕch jang ‘noh”.

Găh pơtho pơhrăm, Tổng Bí thư pơma hơdăh, kăl tơmơ̆t jên jang ƀlep lơ̆m hnam trương pơtho pơhrăm, khul ƀok thây kô pơtho, trong pơtho pơhrăm, hơmet ming pơ ‘lơ̆ng hnam trương lăm hŏk, hơlen mă hơdăh găh ƀiên chê̆ kiơ̆ măt bơngai hŏk tro hŏk pơhrăm, pơm hơtŏk bơ̆ jang gơh hơgei kơ ƀok thây kô pơtho, mă kăl ‘noh tơdrong gơh pơtho nơ̆r Anh păng tơdrong pơtho, pơhrăm rim tơdrong hŏk pơhrăm hăm nơ̆r Anh. Tổng Bí thư sơkơ̆t hơdăh, trong jang tơgŭm djru kăl ƀlep hăm trong tơlĕch jang hloi: kon pơlei đei iŏk yoa sa hơpăh tơpă, đei hŏk pơhrăm, vei lăng năng tông jơhngơ̆m pran jăng grăng akou, hơrih sa sơđơ̆ng păng oei sa gơh găt. Ăp mă lơ loh rim tơdrong jang atŏk tơ iung mă tơpă đei iŏk jơnei kơjăp ‘lơ̆ng.

Ăn tơgop nơ̆r găh trong tơlĕch jang Tơmơ̆t jên jang Tơdrong jang tơm Teh đak tơpôl vang iung jang, atŏk ‘lơ̆ng pơtho pơhrăm jăl jang 2026-2035, Kơdră chĕp pơgơ̆r Kuô̆k hô̆i Trần Thanh Mẫn akhan, lơ̆m khei năr hrei ou đei ƀơm kơtang đơ̆ng tơdrong jang gơh hơgei kmăi kmŏk 4.0, tơdrong atŏk tơ iung kmăi kmŏk hơgei AI păng tơdrong pơkoel đei khul bơ̆ jang gơ̆h hơgei. Kơ yuơ lơ loh, trong tơlĕch jang ưh khan lăp dơ̆ng ƀơ̆t pơtho ‘lơ̆ng, hŏk ‘lơ̆ng kiơ̆ joăt joe sơ̆ ki mă lei kăl iung jang kơtang hloh dơ̆ng, tơpă hloh dơ̆ng găh jơhngơ̆m đon tơchĕng păng tơmam drăm vă pơtho pơhrăm atŏk tơ iung: “Tơdrong jang ‘noh kăl lăng truh iung jang kiơ̆ đunh đai tai sơnăm, tơdra hơdrol mă ƀlep găh tơdrong atŏk tơ iung kơ tơpôl, găh hơnih tơchă bơngai jang lơ̆m hơnô̆ hơnăp kơnh. Tơdrong jang tơm teh đak kăl xek tơlang keh đang dôm tơdrong tơm dơnơm hloh kơ hơnih jang ,pơtho pơhrăm. Kiơ̆ kơ ĭnh akŏm lơ̆m tơplih kơsô̆, pơtho pơhrăm tơdrong jang gơh hơgei dăh mă pơtho pơhrăm tơring hơtăih yăih vă đei trong pơchoh ăn tơmơ̆t jên jang mă tơgăl. Mă ƀar ‘noh kăl sơđơ̆ng, khul jang hơlen vei lăng jên hu, dăr lăng, lăng hơlen kon jên bơ̆ jang. Jên tŏ sĕt mă lei pơm lơ liơ bơ̆ jang pơm hla bơar keh đang ‘lơ̆ng hơ iă, tĕnh koăng, sơđơ̆ng ăn lơ̆m khei ‘năr iung jang ming man ‘noh hoei chă tơhoach pă tơdrong tơdrơ̆r, hoei kơ đei ưh kơ ‘lơ̆ng hơ iă”.

Kiơ̆ đơ̆ng Kơdră chĕp pơgơ̆r Kuô̆k hô̆i, lăp đơ̆ng rŏng Kuô̆k hô̆i tơlĕch ăn Tơdrong jang kăl hlôih proh hơmet rim hla bơar pơtho tơbăt, pơjao jang mă hơdăh lơ̆m rim hơnih iŏk bơ̆ jang păng pơjao ăn kon jên jang mă tơtom. ‘Nou jing tơdrong kăl hloh lơ̆m tơdrong jang yan ou. ‘Ngoăih kơ ‘noh kăl hơnơ̆ng dăr lăng, lăng hơlen. Kơdră chĕp pơgơ̆r Kuô̆k hô̆i pơma hơdăh, ‘nou jĭ ƀar tơdrong jang đei ƀơm truh hăm kon pơlei, tơdăh iung jang ‘lơ̆ng kon pơlei lăng kiơ̆ kơ ‘noh kơna kon pơlei băt, kon pơlei pơma dơnuh, kon pơlei dăr lăng hơlen, kon pơlei đei iŏk yoa sa hơpăh tơpă.