Khul bơ̆ jang Pơlei tơm Hải Phòng hlôi năm truh tơ̆ tơring đak hơbông đak lip kơ Đăk Lăk vă tơgŭm djru tơmam drăm păng băt hơdăh tơdrong vă tơlĕch trong jang tơgŭm djru ăn kon pơlei tơring đak lip. Pơlei tơm Hải Phòng hlôi ba ăn 500 ‘nu ƀok thây pơgang ăn dêh char Dak Lăk vă iung jang dôm tơdrong jang pơgang đơ̆ng rŏng đak lip och. Kơ iĕng kơdră chĕp pơgơ̆r Hơnih vei lăng kon pơlei kơ pơlei tơm Hải Phòng hlôi pôk ăn dơ̆ng kon jên tơgŭm djru 40 ti hlak jên, pơm akŏp kon jên tơgŭm djru mă pơlei tơm tơgŭm ăn Đắk Lắk lơ̆m ‘măng ‘mi kial hơbut hơbông ‘măng mă ou truh 50 ti hlak jên. Atŭm hăm ‘noh, Hải Phòng tơgŭm djru kmăi kmŏk, tơmam drăm, pơgang, kmăi hlŏng đak rơgoh ... tơgŭm ăn bơ̆ jang tang găn jĭ jăn đơ̆ng rŏng ‘mi klal pơrăm, đak lip pơrăm hăm kơjă kơjên hloh 2 ti hlak jên. Ƀơ̆t măt, pơlei tơm ăn 21 ‘nu bơngai joăt jang găh tang găn pơrang jĭ jăn năm truh tơgum djru ăn dêh char Đắk Lắk.  Ƀok Nguyễn Minh Hùng sơkơ̆t hơdăh, pơlei tơm Hải Phòng hlôi iung jang vang tơgum djru ăn Đắk Lắk:“Lăp đơ̆ng rŏng Hơnih tơm Chinh trĭ tơchơt, Khul kơdră chĕp pơgơ̆r Đảng pơlei tơm Hải Phòng hlôi đei trong jang găh tơgŭm djru ăn dêh char Đắk Lắk. Đơ̆ng rŏng ‘mi kial hơbŭt hơbông, mĭnh tơdrong kăl hloh ‘noh vei lăng rơgoh cham char păng tang găn pơrang jĭ jăn. Nhôn hlôi đei trong jang hơdăh găh hơmet ăn tơmam drăm jang pơgang, găh bơngai jang. Nhôn hlôi proh hơmet ăn đơ̆ng 300-500 ‘nu ƀok thây pơgang ăn năm tơgum djru dêh char Đắk Lắk iung jang tang găn hơlou pơrang jĭ jăn adoi nhen ming hơmet jĭ jăn”.   

Pơlei tơm HCM hlôi hơvơn akŏm khul jang tơgŭm ăn Khánh Hòa đơ̆ng rŏng ‘mi kial hơbut hơbông, đơ̆ng tơdrong khăm jĭ-ƀơk ăn pơgang, tơgŭm ăn tơmam drăm iŏk yoa kăl, hyum hơpuih rơgoh cham trong truh ming hơmet hnam trương, hnam pơgang păng vei kơjăp hnam gŏ pai por ‘nhot ăn kon pơlei tơring đak hơbông đak lip sŏng sa đĕch. Khul hlôi năm truh tơ̆ tơring đak lip kơtang nhen Nha Trang, Diên Khánh, Khánh Vĩnh. Ƀak si Phạm Minh Công, Khul Ƀok thây pơgang sơnăm mơlôh pơlei tơm Hồ Chí Minh tơbăt, rim ƀok thây pơgang lơ̆m khul hlôi sơng iok nơ̆r tơchơ̆t păng iung năm jang hloi, proh hơmet tôm tơmam drăm ăn chă khăm ming hơmet jĭ jăn ăn kon pơlei tơring đak hơbông pơrăm:“Lơ̆m jơ ‘năr kơ đeh, nhôn hlôi krao hơkŏm khul năm iung jang lơ̆m gơmăng hloi. Hơpơi ‘meh vă vang tơgum djru ăn kon pơlei tơnap tap. Adoi pơm hơtŏk đei jơhngơ̆m hiôk chơt ăn kon pơlei tơring đak hơbông đak lip kĕ yak hloh tơdrong tơnap tap”.

Atŭm hăm ‘noh, khul oei pơjing mĭnh ƀar hơnih pai por ‘noh pơtruh ăn 10.000 - 12.000 hơnŭng sa lơ̆m năr vă tơgŭm ăn rim tơring, phương răm kơtang hloh păng khul jang tơgum dŏng. Hơnih jang Co.opmart - Jơnŭm Hơp tak xah Mơdro sa pơlei tơm Hồ Chí Minh tơ̆ Nha Trang atŏk kơtang răt tơmơ̆t tơmam drăm, sơđơ̆ng ưh kơ tŏk kơjă, ưh kơ lê̆ ưh kơmăh tơmam drăm lơ̆m khei ‘năr kăl hloh. Ƀok Nguyễn Phước Lộc, Kơ iĕng Kơdră chĕp pơgơ̆r Đảng pơlei tơm HCM sơkơ̆t hơdăh, pơlei tơm gô hơnơ̆ng tơgŭm djru Khánh Hòa trŏ lăp hloh, ‘moi kiơ̆ ‘măng dăr lăng hơlen yan ou; adoi atŏk kơtang iung jang hơdoi ming hơmet trong hnam:“Rim hơnih bơ̆ jang dăr lăng, dơ̆ng pang tang măt ming hơmet hnam trương hŏk păng hnam pơgang hư răm kơtang, sơđơ̆ng ăn đe hŏk tro năm hŏk hrôih păng hơnih jang pơgang đei iung jang hrôih hloh”.

Jang kiơ̆ nơ̆r krao hơvơn đơ̆ng Hơnih bơ̆ jang MTTQ Việt Nam dêh char Đăk lăk, lơ̆m dôm năr ou ki, lơ hơnih jang, khul jang atum hăm rơbou ‘nu kon pơlei tơring păh Pơmơ̆t dêh char hlôi tơgum djru kơhrĕng tân tơmam drăm kăl, đak sŏ nhă, hơbĕn ao ... ăn pơlei tơring đak hơbông đak lip găh Hơlĕch. Ƀok Y Giang Gry Niê Knơng, Kơ iĕng Kơdră chĕp pơgơ̆r Đảng dêh char-Kơdră chĕp pơgơ̆r Hơnih bơ̆ jang MTTQ Việt Nam dêh char Đắk Lắk tơbăt, bơ̆ jang sơng iŏk păng klăh asong tơgum djru oei tŏk bŏk tơlĕch jang kơtang. “Hăm jơhngơ̆m đon tơgoăt tơgoăl tơgum djru đơ̆ng kon pơlei lơ̆m dêh char păng dêh char anai, chă hơvơn rim koeng kơphô̆, hơnih lui khop pai por ‘nhot, ‘nŭng pai ƀĕng chư̆ng, ƀĕng tek ... vă chơ pơtruh tơtom ăn kon pơlei tơring đak hơbông đak lip. ‘Ngoăih kơ ‘noh, nhôn jei hơnơ̆ng krao hơvơn, sơng iŏk pơ đĭ găh kon jên păng tơmam drăm sa tơgum djru kon pơlei hrôih sơđơ̆ng hơrih sa.”