‘Mi tih tơ̆ găh tu pơm ăn đak tơ̆ đak kroong Lũy brai ưh kơ tom băt, pơm ăn đak lơ̆p vă jê̆ 800 pơbŭng hnam tơ̆ tơring Lương Sơn, dêh char Lâm Đồng păng pơm ăn trong gre rĕnh Phan Thiết – Dầu Giây găn hloh tơring Tân Lập răm kơ đak lip. Hơdrô̆ teh tơdrŭt hơlih tơ̆ trong hông hang krang nak Mimosa (Trong glung 20), Khul bơ̆ jang hlôi tĕch koăng ăn gre iung jang, truh ‘năr dơng năr 4/12 hlôi hơmet keh đang  păng gơh ăn gre kơdou vih vơ̆t. Dêh char Lâm Đồng tŏk bŏk hơnơ̆ng dăr lăng hơlen ‘mi kial, dăr lăng hơlen tơring hơmơt kơtang vă pơm sơđơ̆ng ‘lơ̆ng hơ iă ăn kon pơlei păng vei kơjăp gre kơdou hiôk hian tơ̆ rim jăl trong nơnăm.

Pơgê 4/12, đak tih tơ̆ đak krong Cái Nha Trang oei hơnơ̆ng tŏk đơ̆ng rŏng 1 kơmăng ‘mi tih, pơm ăn lơ tơring kon pơlei oei xa tơter đak krong đei đak lơ̆p jrŭ. Đak krong âu ro đơ̆ng tơring groi kông kơ Khánh Hòa lĕch tơ̆ Ving Nha Trang, lơ anih đei đak kơsŏk, ro tôch jăng păng blai mât  tơ̆ hnam pơlei. Kon pơlei tơ̆ 2 păh jih đak krong tơroi, đak tih tŏk tôch hrĕnh pơting hăm dôm năr adrol kơ ‘nŏh, athei lơ unh hnam chông tơlĕch bơngai kră, đe hơioh păng pơdŭ tơmam, ô tô tŏk tơ̆ tơring groi kông.

Tơ̆ phường Tây Nha Trang, khul linh Công an, Dân quân, Druh dăm năm jang tơgŭm hơnơ̆ng pơih aloa roi tơbăt, pơtho ăn kon pơlei răp mơ̆ng rim tơdrong tơroi găh đak tih vă đei trong tơjră tơtom. Mĭnh ƀar jăl trong tơ̆ tơring thŭng đei đak lơ̆p pơm ăn tơdrong yak vih vât tôch pơmat tat.