Chông sâu năm hŏk năr mă blŭng tơ̆ Hnam trưng Mầm non Sao Mai – hnam trưng yoa Binh đoàn 15 (Anih tơm vei lăng khul linh teh đak) ‘nao man ăn kon mon tơ̆ xăh Ia Krel, kră pơlei Rah Lan Vọng tơ̆ plei Ngol Le ưh kĕ ôn tơdrong hơiă. Hnam trưng ‘nao kơjăp ‘lơ̆ng, 5 lăm hŏk tôch rơgoh, đei hnam hnam gŏ, lăm pơtâp hơkâu jăn, anih pơm ngôi, gara… tôm măh ăn 300 ‘nu hơioh ngôi pơchơt, hŏk pơhrăm. Kŭm hăm anih hŏk, tơmam drăm, hnam hŏk đei răt hơmet tôm tơmam pơtho pơhrăm, ngôi pơchơt, jĭ tơdrong hơpơi ‘mĕh đơ̆ng đe kon hơ ‘lơ̆p tơ̆ pơlei pơla găh tơring sơlam. 

Kră pơlei Rah Lan Vọng ăn tơbăt, ‘nâu ưh lăp đon hơpơi đơ̆ng đe hơioh đĕch mă hăm bơngai ‘lŏ hai, yoa đe sư hơđơ̆ng jơhngâm gơih kon mưh năm choh jang, vang vei kơjăp tơdrong sơđơ̆ng tơ̆ tơring sơlam: “Hnam trưng kơjăp ‘lơ̆ng, ‘you rơgoh, kon mon nhôn đei hŏk pơhrăm ‘lơ̆ng, hŏk truh tâp truh tôch, đơ̆ng rŏng ning mônh kơnh ‘lŏ bơ̆ jang pơvih ăn teh đak. Nhôn tôch hơiă păng lui kiơ̆ Đảng, teh đak, yoa sư pơngơ̆t ăn đe kon mon tôch ‘lơ̆ng, đei yoa ăn kon mon ning mônh kơnh kơ đe kon mon”.

Ưh lăp tơ̆ xăh Ia Krel, tơ̆ 7 xăh Ia Mơr, Ia Púch, Ia Pnôn, Ia Nan, Ia Dom, Ia Chia păng Ia O, dêh char Gia Lai tơlĕch jang man Hnam trưng teh đak rong jăl mônh păng jăl ƀar, đei 212 lăm hŏk, akŏm đĭ đăng jên man 1.516 ti. Kiơ̆ rup vă man, dôm hnam trưng đei man hrơ̆ch ‘lơ̆ng hăm tôm lăm bơ̆ jang, lăm hŏk ki thuơ̆t, pơjing anih hŏk pơhrăm sơđơ̆ng ‘lơ̆ng ăn hlŏh 7.000 ‘nu hŏk tro, mă lơ ‘nŏh jĭ kon hơ ‘lơ̆p bơngai kon kông.

Oh Rơ Châm Lan Thúy, hŏk tro lăm 8D Hnam trưng THCS Phan Bội Châu (xăh Ia Nan) pơma: “Oh ƀôh tôch hơiă yoa ning mônh kơnh oh đei hŏk 2 vât 1 năr. Hnam trưng oei đei hloi lăp pơtâp pơhrăm, oh gơh ngôi pơchơt păng truh hăm dôm tơdrong hơlen năng hoá học, vật lý, oei đei sŏng xa ‘năr dơ̆ng hai, tôch hiôk hian ăn mĕ ƀă, vă đe sư da ƀiơ̆ chông ba năm hŏk vih vât”.

Dang ei, Gia Lai đei vă jê̆ 200.000 ‘nu hŏk tro kon kông oei hŏk pơhrăm tơ̆ rim jăl hŏk, mă lơ ‘nŏh jĭ kon hơ ‘lơ̆p bơngai Jarai, Bahnar, Hrê… Ƀok Phạm Văn Nam – Kơdră Anih vei lăng pơtho pơhrăm dêh char ăn tơbăt vă hơtŏk tơdrong ‘lơ̆ng mưh pơtho hŏk tơ̆ tơring kon kông păng tơring sơlam, dêh char oei jang hơdoi tơdrong hơmet ming hnam hŏk păng pơjing khul thây kô mă lăp, pơm ‘lơ̆ng ăn tơdrong pơtho, hŏk pơhrăm tơ̆ tơring. Kŭm hăm ‘nŏh, truh âu kơnh, Anih vă roi tơbăt ăn Jơnŭm pơgơ̆r kon pơlei dêh char tơlĕch tơdrong tơgŭm ăn hŏk tro tơ̆ tơring pơmat tat dêh hlŏh; atŭm hăm ‘nŏh hơmet pơ ‘lơ̆ng tơdrong tơgŭm vă thây kô hơđơ̆ng jơhngâm pơtho đunh đai tơ̆ tơring hơtăih yăih. Kŭm hăm dôm trong jang, dêh char oei tơlĕch hloi tơdrong jang pơm pơ ‘lơ̆ng Hnam trưng teh đak rong đơ̆ng 2025-2030, vă vei kơjăp kơsô̆ hŏk tro năm hŏk păng pơih xă tơdrong ‘lơ̆ng mưh hŏk pơhrăm ăn hŏk tro tơnuh păng vă jê̆ tơnuh.

Ƀok Phạm Văn Nam akhan: “’Nâu jĭ trong jang tih, gĭt kăl đơ̆ng Đảng păng teh đak vă hơtŏk đon hlôh vao ăn kon pơlei, pơtho pơhrăm khul bơngai jang kơtă tơ̆ tơring, mă loi jĭ khul bơngai jang ăn tơring kon kông, tơring sơlam. Kiơ̆ đơ̆ng âu hơtŏk tơdrong ‘lơ̆ng ăn anih jang chinh trĭ tơ̆ tơring, hơmet kơjăp tơdrong tơgŭm ăn hơdrĕch kon kông, hơtŏk tơdrong mât 1 ƀơ̆r đon, vei kơjăp tơdrong sơđơ̆ng, hiôk chơt tơ̆ tơring sơlam.”

Lơ hnam trưng kơjăp ‘lơ̆ng tơ̆ tơring kon kông păng tơring sơlam ăn ƀôh đon pơngơ̆t tôch ai ăn tơdrong pơtho pơhrăm tơ̆ tơring pơmat tat đơ̆ng Đảng păng teh đak bơ̆n. 'Nâu jĭ anih gơnang tôch hơđơ̆ng tơgŭm ăn đe oh bơngai kon kông đei hŏk pơhrăm tôm, vang tơgop pơjing tơring sơlam roi đunh roi sơđơ̆ng 'lơ̆ng rŏ, jang tŏk pran kơjăp tơ̆ dêh char Gia Lai.