Đơ̆ng rŏng kơ 'mi kial đak hơbông, đơ̆ng jên mong tơgŭm, Hơnih jang vei lăng kon pơlei dêh char Khánh Hòa hlôi pơkăp tơgŭm ăn rim măt bơngai đei hnam ƀơm đak lơ̆p 1 triu hlj. 'Nguaih kơ noh, hŏk tro đơ̆ng jăl kơđeh tŏk tơ̆ kơpal đei tơgŭm atăm 800 rơbou hlj. Truh dang ei Anih jang gah Jên hu dêh char Khánh Hòa hlôi akŏm păng asong 445 tih hlj vă dôm xah, phương tơgŭm ăn kon pơlei.

Kơdră Hơnih jang vei lăng kon pơlei dêh char Khánh Hòa Trần Phong ăn tơbăt, khul kan ƀô̆ tơ̆ dôm xah, phương tŏk bŏk oei tơlĕch lơ tơdrong jang nhen: hơmet răm, tơlĕch trong jang vă hơtŏk mŭk drăm – tơpôl, hơmet dôm tơdrong kăl đơ̆ng kon pơlei... Mă thoi noh, tơdrong tơgŭm jên ăn kon pơlei jĭ gĭt kăl păng tơtenh. Ƀok Trần Phong tơbăt, mưh tơlĕch jang adar gô pơm tơjur tơdrong kăp gĭt đơ̆ng tơdrong tơgŭm.