Kơsơ̆ năr 3/12, tơ̆ Hơnih bơ̆ jang Trung ương Đảng, Tổng Bí thư Tô Lâm pơm tơm jơ bơ̆ jang hăm rim hơnih tơm, hơnih jang vă pơma dơnuh găh trong vei lăng năng tông, tơgŭm djru bơngai hơven hơvo jo jăn. Teh đak bơ̆n hrei ou đei dang 7,2% măt bơngai ‘noh bơngai hơven hơvo jo jăn, hơtŏ hăm 8 triu ‘nu bơngai, lơ̆m ou đei hloh 1 triu ‘nu hơven hơvo kơtang, atŭm hăm dang 600.000 ‘nu hơ ioh hơven hơvo jo jăn anai.Pơma pơtôch hop akom, Tổng Bí thư Tô Lâm pơma hơdăh, tơdrong vei lăng năng tông bơngai hơven hơvo jo jăn ưh khan lăp găh tơdrong ‘mêm mơnat dih băl mă oei jing ‘long pơtŏ ăn tơdrong gơh hơgei oei sa ‘lơ̆ng, jĭ tơdrong kăl hloh kơ atŏk tơ iung kơjăp ‘lơ̆ng păng vang mơ̆t hơdoi lơ̆m apŭng plĕnh teh. Dôm sơnăm ou ki, lơ trong bơ̆ jang, trong tơgŭm djru, hơmet pơ ‘lơ̆ng jo jăn, pơtho pơhrăm, pơjing đei tơdrong jang sa hlôi iung jang ‘lơ̆ng. Tổng Bí thư athei rim hơnih tơm, hơnih jang hơnơ̆ng pơm pơkeh dôm trong jang, tơdrong tơchơ̆t, pơm hơtŏk kĕ jang lơ̆m jang pơgang, ming hơmet jo jăn păng dôm trong tơgŭm djru hơrih sa vă sơđơ̆ng ăn tơdrong đei iŏk yoa sa hơpăh trŏ lăp ăn bơngai hơven hơvo jo jăn.