3 tŏ rup hnam đei Khul kơdră teh đak ki vă man rok ăn kon pơlei tơ̆ tơring đak lơ̆p tơtă man kiơ̆ tơdrong hơgăt “3 kơjăp”: hơnă kơjăp – tơnăr kơjăp – bơbŭng kơjăp, vă tơjră ‘lơ̆ng ƀiơ̆ hăm ‘mi kial hơbŭt, đak lip tơjroh. Trong jang tơm ‘nŏh jĭ hơtŏk hơnă hnam, pơm hnam gak, hnam tơ̆ng mă kơjăp vă gơ̆h oei xa sơđơ̆ng, mưh đak tih tŏk dêh.

Lơ̆m kơsô̆ âu, đei 2 kơloăi hnam 2 tơ̆ng: Tơ̆ng hơla lê̆ hoh mă ưh ‘nŏh man tơnăr 1 puăt vă lê̆ đak tih ro klĕch; tơ̆ng kơpal pơm anih oei xa, ming muk mam. 1 kơloăi hnam 1 tơ̆ng, pơm gak đei jên man reh ƀiơ̆ mă lei oei pơm ‘lơ̆ng ăn tơdrong veh ver kơ ‘mi kial, đak lip.

Ƀok Cao Đình Huy, Kơdră Anih vei lăng ming man dêh char Đắk Lắk ăn tơbăt, dôm kơloăi hnam âu ưh lăp kơjăp đunh đĕch mă oei gơ̆h vei lăng sơđơ̆ng ‘lơ̆ng mưh đei ‘mi tih đak lip dơ̆ng: “Hnam pơm kơjung, nhôn jô̆ pơhlom kơjung ƀiơ̆ kơđak tih tŏk dêh hloh âu ki đơ̆ng 0,2–0,5m kiơ̆ tơdrong hơgăt 48 đơ̆ng Thủ tướng. Rim hnam đei man xă tŏ sĕt hlŏh ‘nŏh 44m², lơ̆m noh hơnă veh ver kơ đak lơ̆p đei 12m²”.

Dôm kơloăi hnam đei man kiơ̆ ki thuơ̆t ‘nao păng rup hnam so tơ̆ tơring Nam Trung Bộ, vă gơ̆h đei hnam ‘lơ̆ng, kơjăp păng hiôk hian ăn tơdrong arih xa. Hnam xă đơ̆ng 36–54m² tơgŭm ăn dôm unh hnam chă rơih mă lăp hăm teh kơdih đei, lăp hăm tơdrong ‘mĕh vă đơ̆ng unh hnam. Ƀok Trần Văn Khánh, tơ̆ plei Phú Hữu, xăh Hoà Thịnh, dêh char Đắk Lắk, hnam păk pơchăh đĭ đơ̆ng ‘mi tih đak lơ̆p âu ki. Đei ƀô đô̆i Quân khu 5 tơgŭm, ƀok rơih Hnam kơloăi 1, hăm tơ̆ng kơpal pơm anih veh ver kơ đak lơ̆p. Ƀok Khánh tơroi: “Kiơ̆ đơ̆ng đak tih tŏk tôch dêh âu, inh chă rơih hnam 1 mê vă man kiơ̆ vă đei hơnă kơjăp, kĕ tơjră hăm ‘mi kial. Adrol ki ‘mi tih đak tŏk ưh băt vă oei ƀât yơ, dang ei đei ƀô đô̆i tơgŭm pơm hnam ‘nao, inh hơđơ̆ng bơih.”

Thiếu tướng Trần Thanh Hải, Phŏ ƀok yŏng vei lăng khul linh Quân khu 5, ăn tơbăt, khul linh đe sư đei Khul kơdră teh đak păng Anih tơm vei lăng khul linh pơjao jang hơdoi hăm dôm khul linh, tơring tơrang kơ 3 dêh char Đắk Lắk – Gia Lai – Khánh Hòa man hlŏh 400 tŏ hnam ăn kon pơlei tơ̆ tơring đak lơ̆p: “’Nâu jĭ tơdrong tơblăh lơ̆m chăl rơngei. Dôm khul linh akŏm tôm tơmam, pơgơ̆r bơ̆ jang ming man ‘lơ̆ng hơiă, man đang trŏ năr hơgăt păng kơjăp ‘lơ̆ng. Mĭnh pôm hnam jĭ 1 anih tơgŭm ăn kon pơlei đei tơdrong arih xa sơđơ̆ng ‘lơ̆ng.”

Tơ̆ Đắk Lắk, tơring hiong răm dêh hlŏh hăm vă jê̆ 700 tŏ hnam păk, 1.400 tŏ hnam tơglơ̆h păng hlŏh 106.000 tŏ hnam đak lơ̆p. Ƀok Tạ Anh Tuấn, Kơdră vei lăng kon pơlei dêh char Đắk Lắk ăn tơbăt, dêh char krao akŏm kơ khul, mong akŏm lơ tơmam, jên jang, adrin man đang hnam adrol kơ ‘năr 31/1/2026, pơm hơmet ming hnam pơchăh, tơglơ̆h adrol kơ ‘năr 31/12/2025: "Nhôn kŭm mong akŏm jên, tơmam đơ̆ng teh đak, đơ̆ng tơring, jên tơmam đơ̆ng dôm bơngai đei đon ‘lơ̆ng păng kon pơlei vang tơgop vă bơ̆ jang tơdrong ‘nâu. Hơdai hăm man hnam ăn kon pơlei, nhôn oei man dang 300 tŏ hnam hŏk hôp tơpôl vă pơm anih veh ver kơ đak lơ̆p, tơgŭm ăn mih ma duch nă veh ver kơ ‘mi tih đak lơ̆p.”

Adrol kơ ‘nŏh, Thủ tướng Phạm Minh Chính hlôi jur truh tơ̆ tơring đak lơ̆p găh Hơlĕch kơ dêh char Đắk Lắk, bơ̆ jang hăm kơdră chĕp kơ̆l dôm dêh char Tây Nguyên – Nam Trung Bộ păng athei pơih tơdrong jang “Quang Trung mă hrĕnh” vă man dơ̆ng hnam ăn dôm unh hnam hiong hnam oei, pơm ‘lơ̆ng ăn kon pơlei tơ̆ tơring đei anih oei xa ‘nao adrol kơ Tết Nguyên đán Bính Ngọ 2026.

Thủ tướng athei pơm hơmet hnam oei tơ̆ tơring đak lơ̆p kiơ̆ trong “3 kơjăp”, atŭm hăm ‘nŏh hơmet hiă anih oei xă ƀiơ̆ tơ̆ hơnăp tơdrong krê tŏ ‘mi kial kơnê̆ roi dêh. Anih tơm vei lăng ming man đei pơjao čhơ̆ rup hnam vă man, man hăm jrăng bê tông mă ưh ‘nŏh jrăng pơsei đei pơm hơmet hơdrol vă gơ̆h bơ̆ jang hrĕnh, ƀônh đang. Vă hơtŏk hrĕnh tơdrong jang ming man, tơgŭm ăn kon pơlei tơtom đei hnam oei adrol kơ Tết, Thủ tướng oei athei Anih tơm vei lăng choh jang xa păng cham char pơtho ăn dôm tơring hơmet pơ ‘lơ̆ng teh hăm dôm unh hnam ưh pă đei anih oei xa. Dôm Anih tơm vei lăng khul linh, Công an, khul druh dăm păng rim anih jang chinh trĭ athei vang bơ̆jang mă ‘lơ̆ng.

Atŭm hăm ‘nŏh, Thủ tướng athei mong akŏm jên, tơmam, khul bơngai jang vang man, hơmet ming hnam vă gơ̆h jang đang hrĕnh hlŏh: “Mong akŏm jên, tơmam tơ̆ tơring, đơ̆ng teh đak, đơ̆ng dôm bơngai đei đon ‘lơ̆ng păng kơdih kâu dôm unh hnam chă mong măi kơdih hai. Bu đei kiơ tơgŭm ‘nei, bu đei năr rơhơi ‘nŏh tơgum năr jang, bu đei tơmam ‘nŏh tơgŭm tơmam, bu đei tŏ sĕt tơgŭm tŏ sĕt, bu đei lơ tơgŭm lơ, gơ̆h tơgŭm kiơ tơgŭm ‘nei, athei tơguăt đĭ đăng hơdrĕch hơdrung, mong akŏm đei ‘nŏh athei bơ̆ jang mă đei yoa ‘lơ̆ng.”

Đơ̆ng dôm hla ar čhơ̆ hnam păng nơ̆r pơtho tôch rơđăh, truh dang ei lơ kơmŏng hnam mă blŭng hlôi đei man đang. Hlŏh 1.500 tŏ hnam, hăm kơsô̆ jên man dang 255 ti, gô đei man tơ̆ Đắk Lắk, Khánh Hòa, Gia Lai… jing anih oei xa kơjăp ‘lơ̆ng vă kon pơlei tơ̆ tơring Nam Trung Bộ gơ̆h tŏk hlôi pơmat tat đơ̆ng ‘mi kial đak lơ̆p, oei xa hiôk sơđơ̆ng păng jang tŏk pran kơjăp tơ̆ hơnăp ning mônh kơnh./.